Уалдзыгон ӕрсидт

Хъахъхъӕнынады министрады радзырдтой, кӕд райдайдзӕн уалдзыгон ӕрсидт Хуссар Иры ӕфсадмӕ

10
(ранӕуӕггонд 13:19 23.04.2020)
Хъахъхъӕнынадон уагдоны куыд банысан кодтой, афтӕмӕй ӕххӕст цӕуынц профилактикон мадзӕлттӕ коронавирусы пандемийы фӕдыл, кӕцытӕ бандӕвтой ӕрсидты процессыл дӕр

ЦХИНВАЛ, 23 апр — Sputnik, Козаты Диана. Хуссар Ирыстоны 4 майы райдайдзӕн уалдзыгон ӕрсидт ӕфсадмӕ, уый уагъд цӕудзӕн сӕрмагонд уавӕрты коронавирусы пандемийы фӕдыл. Ӕрсидты датӕ фехъусын кодтой Хъахъхъӕнынады министрады сӕргълӕууӕг Гассеты Ибрагим ӕмӕ республикӕйы Гарзджын тыхты къухдариуӕгады рабадтыл, фехъусын кодтой уагдоны пресс-службӕйы.

Марты кӕрӕтты президент Бибылты Анатолий бафыста барамынд республикӕйы ӕмбӕстӕгты ӕрсидты фӕдыл ӕфсадмӕ. Амӕйразмӕ хъахъхъӕнынады министры хӕдивӕг Ӕлборты Игорь фехъусын кодта Sputnik, кӕй нывӕндынц ӕрсидын сӕдӕ адӕймагмӕ ӕввахс.

"Инӕлар-лейтенант Гассеты Ибрагим басгӕрста уалдзыгон ӕрсидты кампани ауадзыны цӕттӕдзинад. Министры хӕдивджытӕ ӕмӕ ӕндӕр бӕрнон гоймӕгтӕ фехъусын кодтой ӕвзонг фӕлтӕр райсынмӕ цӕттӕдзинады тыххӕй. Уагдоны ис ӕнӕмӕнгхъӕуӕг ӕрмӕджытӕ ӕрсиддонтимӕ ӕвзонг ӕфсӕддоны программӕ рацӕуыны фӕдыл", - банысан кодта Хъахъхъӕнынады министрады пресс-службӕйы хистӕр Чехойты Инга.

Йӕ ныхӕстӕм гӕсгӕ, министры сӕйраг хъусдард здӕхт у ӕрсиддонты хсӕн COVID-19-ы апарахат ма ‘руадзынмӕ.

"Ӕвзонг ӕфсӕддоны программӕмӕ гӕсгӕ цӕттӕкӕнынадмӕ ӕрвитдзысты ӕрсиддонты, кӕцыты ӕнӕниздзинадмӕ зӕрдӕ не ‘хсайы. Мӕйы дӕргъы ротӕйы сизоляци кӕндзысты Хъахъхъӕнынады министрады ахуырадон центры, уым уагъд цӕудзысты дезинфекцион мадзӕлттӕ, ӕххӕст цӕудзӕн карантинон режим", - бафтыдта уый.

Гарзджын тыхты ӕфсӕддон службӕмӕ ӕрсидтысты 18-27 азы кары ӕмбӕстӕгтӕм. Республикӕйы ӕфсӕддон комиссариаттӕ ивгъуыд къуыри райдыдтой ӕрвитын ӕрсидты фӕдыл гӕххӕттытӕ ӕмбӕстӕгтӕм.

10
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

9
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

9
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

12
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

12