ЦХИНВАЛ, 24 апр – Sputnik, Козаты Диана. Хуссар Ирыстоны президент Бибылты Анатолий бахӕс кодта баххуыс кӕнын Цӕгат Ирыстонӕн, цы ран бонӕй бонмӕ ӕвзӕрдӕр кӕнын уавӕр коронавирусы апарахаты тыххӕй. Президент бахӕс кодта ӕнӕниздзинад хъахъхъӕнынады министр Тотчиты Георгийӕн бакусын Цӕгат Ирыстонмӕ рӕуджыты вентиляцийы аппараттӕ арвитыны фарстыл.
Амӕqразмӕ республикон бирӕпрофилон медицинон центры сӕйраг анестезиолог ӕмӕ реаниматолог Плиты Александр загъта Sputnik, Хуссар Ирыстоны кӕй ис рӕуджыты вентиляцийы 26 аппараты.
"Хъӕуы бакусын Цӕгат Ирыстоны коллегӕтимӕ рӕуджыты вентиляцийы аппараттӕ арвитыны фарстыл. Бирӕтӕ дзурынц, мах сӕ кӕй ма хъуамӕ арвитӕм. Фӕлӕ ӕз уый не мбарын. Фыццаджыдӕр, махмӕ ис фаг аппараттӕ, цӕмӕй сӕххӕст кӕнӕм республикӕйы ӕдасдзинад. Дыккаджыдӕр, ӕз не мбарын, де ‘фсымӕр рынчын куы уа ӕмӕ дӕм хостӕ куы уой, уӕдӕ ын сӕ куыннӕ хъуамӕ радтай", - загъта Бибылты Анатолий Ӕнӕниздзинад хъахъхънынады министрады сӕргълӕууӕгӕн.
Президент бахахх кодта, кӕй хъӕуы алцыдӕр банымайын, цӕмӕй республикӕйӕн ацы фадыг ма слӕмӕгъ уа, фӕлӕ Цӕгат Ирыстонӕн хъӕуы ӕнӕмӕнг баххуыс кӕнын.
"Уыдонӕн ис стыр проблемӕтӕ, ӕмӕ махӕн бар нӕй ма баххуыс кӕнын", - фехъусын кодта Бибылты Анатолий.
Фӕстаг суткӕмӕ Цӕгат Ирыстоны сбӕрӕг кодтой коронавирусӕй 30 фӕрынчынуӕвӕджы. Республикӕйы фӕрынчынуӕвджыты иумӕйаг нымӕц майрӕмбоны райсоммӕ у 305 адӕймаджы, хъусын кӕны Роспотребнадзор. Хуссар Ирыстоны абоны бонмӕ не сбӕрӕг кодтой коронавирусӕй фӕрынчынуӕвджыты.
