Гуфта-Къуаиса фӕндаг

Къуаисамӕ фӕндаджы арӕзтад балхынцъ уыдзӕн азы кӕронмӕ Хуссар Иры Комавтодоры сӕрдар

21
Ацы аз фӕндагон службӕтӕ баиу кӕндзысты трассӕйы дыууӕ фадыджы

ЦХИНВАЛ, 28 апр – Sputnik, Гӕбӕраты Элина. Гуфта-Къуаиса фӕндагыл уагъд цӕуынц цалцӕггӕнӕн куыстытӕ – исынц зӕххцъар ӕмӕ уадзынц доны хӕтӕлтӕ, фехъусын кодта Sputnik Хуссар Ирыстоны автомобилон фӕндӕгты арӕзтад ӕмӕ эксплуатацийы фӕдыл комитеты сӕргълӕууӕг Гуыззыттаты Эдуард.

Фӕндаджы цалцӕггӕнӕн куыстытӕ райдыдтой 2017 азы. Иу азмӕ фӕндагон службӕтӕ сцалцӕг кодтой трассӕйы фадыг Хъемултайы хъӕуы онг. Арӕзтады дыккаг этап уагъд цыд 2018 азы, куыстытӕ райдыдтой горӕт Къуаисайы рдыгӕй. Асфальт сӕвӕрдтой Кӕсагджыны хъӕуы онг. Ацы аз кусджытӕ баиу кӕндзысты асфальтӕй ацы дыууӕ фадыджы ӕмӕ трассӕ цӕттӕ уыдзӕн эксплуатацимӕ.

"2020 азы февралы райдыдта Гуфта-Къуаиса фӕндаджы арӕзтады ӕртыккаг, кӕронбӕттӕн этап. Ацы аз асфальт кӕндзысты 15 километрмӕ ӕввахс. Ныртӕккӕ автотрассӕйыл уагъд цӕуынц зӕххон куыстытӕ, уадзынц доны хӕтӕл. Асфальт ӕвӕрын райдайдзыстӕм июлы райдайӕны", - радзырдта Гуыззыттаты Эдуард.

Уый банысан кодта, абоны бон объекты кӕй кусынц ӕртын адӕймагмӕ ӕввахс.

"Куыстытӕ нывӕндӕм балхынцъ кӕнын ацы азы кӕронмӕ", - банысан кодта Комавтодоры сӕрдар.

Гуфта-Къуаиса – у республикӕйы сӕйраг магистральтӕй сӕ иу. Йӕ дӕргъ у 40 километры. Фӕндаджы арӕзтад бахастой Республикӕ Хуссар Ирыстоны Инвестицион программӕмӕ.

21
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

9
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

9
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

12
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

12