Хуссар Иры Тагъд ӕххуысы кусджытӕ

Хуссар Иры Тагъд ӕххуысы кусджытӕ исынц арфӕтӕ сӕ бӕрӕгбоны цытӕн

22
(ранӕуӕггонд 12:20 28.04.2020)
Дыццӕджы Хуссар Ирыстоны Тагъд æххуысы кусджытӕ нысан кӕнынц сӕ профессионалон бӕрӕгбон. Уыдонӕн сæ куыст у адæймаджы хæрзиуæгæн аккагæй лæггад кæныны цæвиттон

ЦХИНВАЛ, 28 апр – Sputnik, Дриаты Лейла. Дунейы бӕстӕтыл инфекцион низ коронавирус кӕй апарахат ис æмæ алы æнæнхъæлæджы уавæртæм дӕр цæттæ уæвын кæй хъæуы, уый фылдæр бæрндзинад домы хуссар Иры Тагъд æххуысы станцы кусджытæй. Хæцгæ низ республикæмæ ма æруадзыны тыххæй тагъд æххуысы медиктӕ дæр кусынц æхсæвæй-бонæй. Алыхуызон мадзæлттæ æххæстгонд цæуынц, уымæ гæсгæ коронавирусы ног хуызæй фæрынчыны цау Хуссар Ирыстоны иунæг дæр нæма ис.

Тагъд æххуысы кусæджы бон фадат дæтты, цæмæй сын бузныг зæгъæм сæ аудындзинады тыххæй. Сæ професси у, адæймаджы хæрзиуæгæн аккагæй лæггад кæныны цæвиттон.

Тагъд æххуысы кусджытæ, æхсæв æмæ бон не ‘взаргæйæ, мæлæты ныхмæ тохы куы бацæуынц, æмæ сæ къухты арæхстдзинад, сæ зонындзинæдтæ æмæ уды хуыздæр миниуджыты руаджы рынчыны цардмæ куы раздахынц, уæд уыцы урсхалатджынтæ рынчын æмæ йæ хиуæттæм зæххон лæг нал фæкæсы, фæлæ уæларвон. Уый стыр æмæ уæззау уаргъ у: дохтыры ном хæсгæйæ мыдадз цырагъау адæмы хæрзæбонæн судзын.

Тагъд ӕххуысы дохтыртӕ сæ тыхтыл æмæ зонындзинæдтыл æнæ ауæрдгæйæ, стыр хайбавæрд хæссынц адæмы æнæниздзинад бахъахъхъæныны хъуыддагмæ. Се ‘рвылбонон удуæлдай куыстæй уыдон адæмæн цард лæвар кæнынц, сомбоны ныфс сын дæттынц.

Царды цыдæриддæр дæсныйæдтæ ис, уыдонæй дохтыры дæсныйад у æппæтæй ахсджиагдæр, зындæр æмæ вазыгджындæр. Тæригъæд кæнын, фæлмæнзæрдæ уæвын, искæй рыст хи рыстау æнкъарын - уыдон сты дохтырæн йæ сæйраг миниуджытæ.

Адæм сæм фенхъæлмæ кæсынц, ныфс сæ æвæрынц… Рынчын дохтыры хъару, зонындзинæдтæ æмæ арæхстдзинадыл куы баууæнда, йæхимидæг фидарæй куы зæгъа, адзæбæх мæ кæндзæн, зæгъгæ, аирвæзын мæ кæндзæн, уæд уымæн æнæрцæугæ нæй. Æууæнкæй аразгæ у алцы дæр…

Хорз дохтыры алы хатт дæр Хуыцауæй лæвæрд фæхонынц, ома йæм Хуыцауæй лæвæрд курдиат ис.

Паддзахады райрæзты иууыл ахсджиагдæр бæрæггæнæнтæй иу у æнæниздзинад хъахъхъæныны стыр æмвæзад. Хуссар Ирыстоны дӕр бындуронæй рацарæзтой медицинон объекттæ. Архайдзысты дохтыртæ æмæ медицинон кусджытæн сæ царды уавæртæ хуыздæр кæныныл, сæ мызды фӕфылдӕрыл. Архайдзысты, кусын кæй фæнды æмæ размæ чи тырны, медицинæйы къабазы ахæм курдиатджын фæсивæд агурыныл æмæ сын куысты фадæттæ аразыныл.

22
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

139
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

139
МСНК кусджытӕ

МХМ къордтӕ райдыдтой цӕттӕ кӕнын Уӕлахизы парадмӕ Цхинвалы

7
(ранӕуӕггонд 16:00 02.06.2020)
Хуссар Ирыстоны Мидхъуыддӕгты министрады кусджытӕ райдыдтой рӕнхъон тренировкӕтӕ Милицийы сӕрмагонд нысаниуӕджы къорды бӕстыхайы

ЦХИНВАЛ, 2 июн - Sputnik. Хуссар Ирыстоны Мидхъуыддӕгты министрады (МХМ) парадон къордтӕ, кӕцытӕ хайад райсдзысты бӕрӕгбонон маршы Цхинвалы центры, райдыдтой рӕнхъон цӕттӕкӕнынад, хъусын кӕны МХМ пресс-службӕ.

Амӕйразмӕ республикӕйы президент Бибылты Анатолий фехъусын кодта, Стыр Фыдбӕстон хӕсты Уӕлахизы 75 азы юбилейы цытӕн бӕрӕгбонон парад кӕй ацӕудзӕн Хуссар Ирыстоны столицӕйы 24 июны. Майы республикӕйы ацыдысты сӕрмагонд парадтӕ Стыр Фыдыбӕстон хӕсты ветерантӕн.

"Ныртӕккӕ парадон къордтӕ кусынц рӕнхъон цӕттӕкӕнынадыл. Парады хайад райсынмӕ цӕттӕ кӕнынц мидхъуыддӕгты органты 200-мӕ ӕввахс кусӕджы – сылгоймӕгты парадон къорд, милицийы сӕрмагонд нысаниуӕджы къорды кусджытӕ, афтӕ ма Хуссар Ирыстоны МХМ курсанттӕ, кӕцытӕ ахуыр кӕнынц УФ МХМ профилон ахуырадон уагдӕтты", - радзырдтой уагдоны.

Афтӕ ма парады рацӕудзӕн милицийы сӕрмагонд нысаниуӕджы къорды (МСНК) бронетехникӕ дӕр – цыппар БТР-80. Нырма репетицитӕ цӕуынц МСНК бӕстыхайы, уый фӕстӕ уыдон адарддӕр уыдзысты республикӕйы Хъахъхъӕнынады министрады ӕмӕ УФ 4-ӕм ӕфсӕддон базӕйы плацыл. Уӕлахизы парады генералон репетицитӕ уагъд цӕудзысты Театралон фӕзуатыл 19-22 июны.

7