ЦХИНВАЛ, 4 май - Sputnik, Гӕбӕраты Элина. Хъӕууон хӕдзарады министрад ацы уалдзӕджы прививкӕтӕ тӕссаг низты ныхмӕ сарӕзта ӕртӕ минмӕ ӕввахс хӕдзарон фосӕн Хуссар Ирыстоны хъӕуты, фехъусын кодта Sputnik министрады ветеринарийы хайады хистӕр Тедеты Ацӕмӕз.
Вакцинаци райдыдта уалдзӕджы ӕмӕ адарддӕр уыдзӕн декабры онг. Прививкӕтӕ аразынц тӕссаг низты ныхмӕ.
"Нӕ специалисттӕ уадзынц вакцинаци районты. Куыст уагъд цӕуы нывӕзтон ӕмгъуыдмӕ гӕсгӕ", - банысан кодта ветеринарон дохтыр.
Тедеты Ацӕмӕз банысан кодта, Хуссар Ирыстоны ветеринарон уавӕр кӕй у стабилон, республикӕйы не сбӕрӕг кодтой тӕссаг низтӕй рынчын фос.
Уый ма бафтыдта, зӕгъгӕ, фосы низты ныхмӕ тохы районон станцтӕ дӕр уадзынц дезинфекци фермерон хӕдзарадты.
"2020 азы нывӕзтмӕ гӕсгӕ, уагъд цӕуы фос дарыны бынӕтты дезинфекци. Мах уадзӕм дезинфеккци ӕмбӕстӕгты куырдиӕтты фӕстӕ дӕр", - фехъусын кодта министрады минӕвар.
Хуссар Ирыстоны 2018 азы, хъӕууон хӕдзарады министрады бӕрӕггӕнӕнтӕм гӕсгӕ, африкӕйаг емынӕйӕ амард 150 хуыйы. Фосы фӕрынчыны цаутӕ фыццаг сбӕрӕг кодтой Знауыры районы. Цӕмӕй инфекцион низ дарддӕр дӕр ма парахат кӕна, уый тыххӕй районтӕй рахизӕнты сарӕзтой дезинфекцион гӕрӕнтӕ.
