Хуссар Иры медиктӕ райстой хъахъхъӕнӕн костюмтӕ

Хуссар Иры медиктӕ райстой хъахъхъӕнӕн костюмтӕ

9
(ранӕуӕггонд 14:38 07.05.2020)
Ӕнӕниздзинад хъахъхъӕнынады министр ӕрсидт ӕхсӕнадмӕ, цӕмӕй ма паникӕ кӕной республикӕйы COVID-19-ӕй фыццаг фӕрынчынуӕвджыты фӕзынды тыххӕй

ЦХИНВАЛ, 7 мая – Sputnik, Коцты Анна. Хуссар Ирыстоны медицинон организацитӕ сифтонг кодтой хъахъхъӕнӕн костюмтӕй, фехъусын кодта Sputnik ӕнӕниздзинад хъахъхъӕнынады министр Тотчиты Георгий. Республикӕйы Ӕнӕниздзинад хъахъхъӕнынады министрад радта заказ БТК-4  куыстуатӕн, цӕмӕй сын саразой 300 хъахъхъӕнӕн костюмы медицинон кусджытӕн.

"Костюмты фыццаг хай ныридӕгӕн сцӕттӕ кодтой БТК-4 куыстуаты ӕмӕ сӕ радтой медицинон организацитӕн", - загъта Тотчиты Георгий.

Ӕртыццӕджы сбӕрӕг кодтой COVID-19-ӕй фыццаг фӕрынчынуӕвджыты Хуссар Ирыстоны. Фыццаг рынчын у ӕнахъом лӕппу Цхинвалӕй, ноджы дыууӕ рынчыны та – мад ӕмӕ йӕ лӕппу сты Ленингоры районӕй. Ӕнӕниздзинад хъахъхъӕнынады министр банымадта рынчынты уавӕр рӕстӕмбисыл.

"Ӕртӕ рынчыны изоляци сты инфекцион рынчындоны. Сӕ уавӕр у рӕстӕмбис. Уыдон иудадзыг сты медицинон персоналы хъусдарды бын", - загъта министр.

Афтӕ ма министр ӕрсидт ӕхсӕнадмӕ, цӕмӕй ма паникӕ кӕной.

"Республикӕйы медицинон уагдӕты цы ӕмбӕстӕгтӕн хос кӕнынц, уыдоны хиуӕттӕ хӕлцадон продукттӕ хъуамӕ дӕттой ӕрмӕстдӕр нывӕзтон графикмӕ гӕсгӕ", - загъта Тотчиты Георгий.

Хуссар Ирыстон ацы къуырийы онг ӕнтыстджынӕй тох кодта республикӕмӕ коронавирусон инфекцийы ӕрбахызтимӕ. Марты кӕрӕттӕй ӕхгӕд сты ахуырадон уагдӕттӕ, тобӕ сӕвӕрдтой адӕмы массон ӕмбырдтыл ӕмӕ автотранспорты змӕлдыл.

Уӕрӕсеимӕ арӕны уылты хизыныл тобӕ сӕвӕрдтой 5 апрелы ӕмӕ адарддӕр уыдзӕн 31 майы онг, кӕронмӕ ӕхгӕд у республикӕйы арӕн Гуырдзыстонимӕ.

9
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

8
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

8
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

11
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

11