Арӕзтадон процесс

Коронавирус нӕ бандавдзӕн Инвестпрограммӕйы реализацийы ӕмгъуыдыл арӕзтады министрад

14
(ранӕуӕггонд 11:43 19.05.2020)
Ӕххӕст арӕзтадон процесс нывӕндынц райдайын июны ӕмӕ йӕ балхынцъ кӕндзысты азы кӕрӕттӕм, банысан кодта уагдоны сӕргълӕууӕг

ЦХИНВАЛ, 18 май - Sputnik, Хъуылымбегты Азӕмӕт. COVID-19-ы пандеми ӕмӕ йемӕ баст карантинон мадзӕлттӕ нӕ бандавдзысты 2020 азмӕ инвестицион программӕйы реализацийы ӕмгъуыдыл, фехъусын кодта Sputnik арӕзтады министр Зӕгъойты Эдуард.

"Нардуатон организацитимӕ сфидар кодам куыстыты график, кӕцымӕ гӕсгӕ ӕххӕст арӕзтадон куыст райдайдзӕн июны ӕмӕ балхынцъ уыдзӕн ацы азы кӕрӕтты", - банысан кодта министр.

Афтӕ ма уагдоны сӕргълӕууӕг бахахх кодта, практикӕйыл арӕнӕвӕрдтӕ хъыгдарынц куыстытӕ ӕмӕ цӕттӕкӕнынад уыдонмӕ. Аразджытӕн фӕзынд проблемӕ республикӕмӕ арӕзтадон ӕрмӕджытӕ ӕрласынимӕ, афтӕ ма арӕны сӕхгӕды тыххӕй сӕ бон нӕу ӕрцӕуын специалист-монтажниктӕн.

"Уӕрӕсейы бакодтой арӕнӕвӕрдтӕ бирӕ куыстуатты архайдыл, кӕцытӕ уадзынц арӕзтадон ӕрмӕджытӕ ӕмӕ ифтонггарз. Ныртӕккӕ уым арӕнӕвӕрдтӕ исынц. Нӕ республикӕйы паддзахадон арӕны баконд баст у Уӕрӕсекйы уавӕримӕ. Нырма нын бирӕ рӕстӕг ис. Уырны мӕ, июны кӕй рахиздзыстмӕ куысты нывӕзтгонд темптӕм ӕмӕ среализаци кӕндзыстӕм программӕ азы кӕронмӕ", - фехъусын кодта Зӕгъойты Эдуард.

Министры ныхӕстӕм гӕсгӕ, абоны бон уадзынц арӕзтадон куыстытӕ цхинвайлаг ӕртыккаг астӕуккаг скъолайы ӕмӕ дыууӕ 18-фатерон цӕрӕг хӕдзары Дзауы поселочы. Уагъд цӕуы Гуфта-Къуаиса фӕндаджы арӕзтады ӕртыккаг этап. Бирӕ объектты куыстытӕ ӕрурӕдтой карантины тыххӕй. Фыццаджыдӕр, уый баст у республикӕмӕ арӕзтадон ӕрмӕджытӕ ласынимӕ проблемӕты тыххӕй. Фӕлӕ Инвестпрограммӕйы объекттӕн рахицӕн кодтой автотранспортон фӕрӕзтӕ, кӕцытӕ ласдзысты арӕзтадон ӕрмӕджытӕ.

"Сӕ номхыгъд сын арвыстам экономикон райрӕзты министрадмӕ, цӕмӕй сӕ хыгъды сӕвӕрой  уӕзласӕн транспорт ахизынӕн арӕны уылты. Уымӕ гӕсгӕ хӕдтулгӕтӕ бацӕуынц республикӕмӕ, шофыртӕ кабинӕйӕ нӕ рахизынц ӕмӕ уаргъ куы райсынц хӕдтулгӕйӕ, уӕд фӕстӕмӕ аздӕхынц Уӕрӕсемӕ", - банысан кодта Зӕгъойты Эдуард.

2020-2022 азтӕм инвестицион программӕйы сконды ис 50 мадзалӕй фылдӕр.

Хуссар Ирыстон 6 майы онг ӕнтыстджынӕй тох кодта республикӕмӕ коронавирусон инфекцийы ӕрбахызтимӕ. Марты кӕрӕттӕй ӕхгӕд сты ахуырадон уагдӕттӕ, тобӕ сӕвӕрдтой адӕмы массон ӕмбырдтыл ӕмӕ автотранспорты змӕлдыл.

Уӕрӕсеимӕ арӕны уылты хизыныл тобӕ сӕвӕрдтой 5 апрелы ӕмӕ адарддӕр уыдзӕн 31 майы онг, кӕронмӕ ӕхгӕд у республикӕйы арӕн Гуырдзыстонимӕ.

14
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

9
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

9
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

12
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

12