Цхинвалы рынчындон

Хуссар Иры 25 курсанты алыгъдысты карантинæй, радзырдтой цæстæйфенджытæ

16
(ранӕуӕггонд 10:39 22.05.2020)
Инцидент æрцыд республикон бирæпрофилон медицинон центры, цы ран дыууæ къуырийы æмгъуыдмæ уыдысты карантины Уæрæсейæ æрцæугæ курсанттæ

ЦХИНВАЛ, 21 май – Sputnik, Плиты Фатимæ. Уæрæсейаг æфсæддон уæлдæр ахуыргæнæндæтты курсантты иу хай, кæцытæ æрыздæхтысты Хуссар Ирыстонмæ майы райдайæны æмæ сты дыууæкъуырион карантины республикон бирæпрофилон медицинон центры, æртыццæджы хивæндæй ацыдысты рынчындонæй æмгъуыдæй раздæр.

Амæй размæ ма хъусын кодтам, ахуыры рæстæг æмгъуыдæй раздæр кæй фæцис, уымæ гæсгæ Хуссар Ирыстонмæ æрыздæхтысты 250 курсанты Уæрæсейы æфсæддон вузтæй. Сæ райгуырæн бæстæм æрцыды фæстæ уыдон бакодтой карантины.

Цæстæйфенджыты ныхæстæм гæсгæ, æдæппæт карантинæй алыгъдысты 25 курсанты, уайтагъд сæ агурын райдыдтой барадхъахъхъæнæг органты минæвæрттæ.

"Боны дыууæ сахатмæ æввахс æвзонг лæппутæ æвæрдтой сæ хызынтæ хæдтулгæйы рынчындоны цур. Фыццаг ахъуыды кодтон, сæ карантины æмгъуыд кæй фæцис, фæлæ фæстæдæр бамбæрстон, уыдон цæуынц хивæндæй. Рынчындоны цур æрæмбырд сты адæм æмæ милицийы кусджытæ. Уый фæстæ ацыдысты, сæ фæстæ та милицийы машинæ",  - загъта Sputnik инциденты фенæг. 

Фæстæдæр рабæрæг ис, курсантты кæй раздæхтой фæстæмæ карантинмæ.

МХМ æмæ Ӕнæниздзинад хъахъхъæнынады министрадты нырма комментаритæ нæ радтой цауы фæдыл.

Амæй размæ æнгæс цау уыд Абхазы республикæйы дæр, уым дæр фæткхалджыты нымæцы уыдысты Уæрæсейы уæлдæр ахуыргæнæндæтты курсанттæ.

16
Цхинвал

Хуссар Иры цӕрджытӕм ацы къуыри ӕнхъӕлмӕ кӕсынц дӕргъвӕтин улӕфт бонтӕ

2
Республикӕйы цӕрджытӕ улӕфдзысты ӕртӕ боны фӕд-фӕдыл Хуссар Ирыстоны хӕдбардзинад расидыны Акт райсыны боны цытӕн

ЦХИНВАЛ, 28 май — Sputnik. Хуссар Ирыстон ацы къуыри нысан кӕны РХИ хӕдбардзинады Акт райсыны бон, уый фӕдыл республикӕйы цӕрджытӕ улӕфдзысты ӕртӕ боны.

Бӕргбонон датӕ майрӕмбонмӕ кӕй ӕрхаудта, уый фӕдыл кусӕгон цӕрджытӕн дӕргъвӕтин улӕфт бонтӕ уыдзысты 29-31 майы.

Хуссар Ирыстоны хӕдбардзинад расидыны Акт райста республикӕйы Уӕлдӕр совет 1992 азы 29 майы. Президенты барамындмӕ гӕсгӕ, ацы датӕ бахастой Хуссар Ирыстоны бӕрӕгбонтӕ ӕмӕ зӕрдылдарӕн датӕты къӕлиндармӕ.

2
Хуссар Ир карантины

"Зынаргъ коронавирус": цас лӕууы Хуссар Ирӕн COVID-19-имӕ тох

5
(ранӕуӕггонд 15:26 27.05.2020)
Фӕрӕзтӕ, сӕйраджыдӕр, хицӕн кӕнынц паддзахады сӕргълӕууӕг ӕмӕ хицауады фӕстауӕрцон фондтӕй

ЦХИНВАЛ, 27 мая – Sputnik, Козаты Диана. Коронавирусон инфекцийы апарахат ма ‘руадзынӕн ӕмӕ COVID-19-ӕй рынчынты хоскӕнынадӕн Хуссар Ирыстон ныридӕгӕн рахицӕн кодта 11 милуан сомы. Президенты администрацийы бӕрӕггӕнӕнтӕм гӕсгӕ, фӕрӕзты фылдӕр хай рахицӕн кодтой президент ӕмӕ хицауады фӕстауӕрцон фондтӕй.

Цӕвиттонӕн, уазӕгдон "Алан" сцалцӕг кӕныныл бахардз кодтой 243 мин сомы. Дзауы районы рынчындон бацӕттӕ кӕнынӕн президенты фондӕй рахицӕн кодтой 142 мин сомы.

Югосетпотребнадзор райста иу милуан соммӕ ӕввахс сӕрмагонд хъахъхъӕнынады фӕрӕзтӕ, ифтонггарз ӕмӕ вирусологион лабораторийӕн ӕрмӕджытӕ балхӕнынӕн.

Республикӕйы ӕмбӕстӕгтӕн гуманитарон ӕххуыс ласыны хӕрдзтӕн пандемийы рӕстӕджы рахицӕн кодтой 263 мин сомы.

Ацы фӕрӕзтӕ – иу милуан ӕмӕ 600 мин сомы – рахицӕн кодтой президенты фӕстауӕрцон фондӕй.

Хицауадон фондӕй ӕхцатӕ рахицӕн кодтой Ӕнӕниздзинад хъахъӕнынады министрад, Дзауы район ӕмӕ Хъахъхъӕнынады министрадӕн.

Ӕнӕниздзинад хъахъхъӕнынад ӕмӕ социалон райрӕзты министрад райстой 6,5 милуан сомы хостӕ ӕмӕ медицинон ӕрмӕджытӕ балхӕнынӕн.

Дзауы районы администрацийӕн рахицӕн кодтой сӕдӕ мин сомӕй фылдӕр районон рынчындонӕн ифтонггарз балхӕнынӕн, афтӕ ма медицинон уагдоны рудзгуытыл хызӕгтӕ сӕвӕрынӕн.

Иу милуан сомы бахардз кодтой УФ ӕфсӕддон ахуырадон уагдӕтты курсантты ӕрласыныл, кӕцытӕ цыдысты сӕ фыдыбӕстӕмӕ Уӕрӕсейы ахуыр ӕмгъуыдӕй раздӕр кӕй фӕцис, уый тыххӕй.

Афтӕ ма ӕрдӕг милуан сомӕй фылдӕр бахардз кодта МХМ сӕрмагонд хъахъхъӕнынады ӕмӕ дезинфекцион фӕрӕзтӕ балхӕнынӕн.

Уымӕй дарддӕр, стыр суммӕ хардз кӕнынц карантиныл уӕвӕг адӕмы хӕлцадыл. Пациентты хиуӕтты нал уадзынц хӕссын медицинон уагдӕттӕм хӕлцадон продукттӕ.

Инфекциимӕ тох нырма нӕ фӕцис. Республикӕйы медицинон уагдӕтты хоскӕнынад нырма цӕуынц аст адӕймаджы коронавирусы диагнозимӕ. Афтӕ ма республикӕмӕ ӕрцӕудзысты МХМ курсанттӕ ӕмӕ республикӕйы ӕмбӕстӕгтӕ ФХМ хаххыл.

5