Хуссар Иры парламент

Хуссар Иры парламенты ӕрдзырдтой паддзахадон программӕтӕ сӕххӕст кӕныныл

12
(ранӕуӕггонд 16:00 22.05.2020)
Парламенты боны фӕткмӕ рахастой цыппар фарсты – сӕ нымӕцы ирон ӕвзаг бахъахъхъӕнын ӕмӕ монон-фӕткон хъомылады паддзахадон программӕтӕ

ЦХИНВАЛ, 22 мая - Sputnik, Гӕбӕраты Ян. Парламенты ахуырад ӕмӕ зонады фӕдыл комитеты сӕрдар Уырыгаты Инал ауагъта рабадт ахуырады министрады паддзахадон программӕты реализацийы фӕдыл, хъусын кӕны закондӕттӕг органы сайт.

Боны фӕткмӕ рахастой цыппар фарсты, кӕцытӕ хауынц ирон ӕвзаг бахъахъхъӕнын ӕмӕ монон-фӕткон хъомылады паддзахадон программӕтӕм. Рабадты хайадисджытӕ басгӕрстой, куыд ӕххӕст цыдысты ацы хӕслӕвӕрдтӕ 2011 азӕй 2019 азмӕ.

Парламенты юрист-консультант Цхуырбаты Инга радзырдта, ацы программӕты фӕлгӕтты республикӕйы ахуырадон уагдӕттӕ иууылдӕр кӕй сифтонг кодтой ахуырадон литературӕйӕ ирон ӕвзаг ахуыр кӕнынӕн, ӕлхӕд цыдысты музыкалон инструменттӕ, организаци кодтой конкурстӕ ӕмӕ улӕфт сывӕллӕттӕн.

"Балхӕдтой ирон ӕвзаг ӕмӕ литературӕйы чингуытӕ 1-11 кълӕстӕн, уагъд цыдысты конкурстӕ ахуырдзауты хсӕн, конференцитӕ, тымбыл фынгтӕ. Ныммыхуыр кодтой ирон ӕвзаг ӕмӕ литературӕйы хуыздӕр ахуыргӕнджыты методикон чингуытӕ. Дыккӕгӕм, ӕхсӕзӕм, фарастӕм ӕмӕ дыууӕдӕсӕм скъолаты, афтӕ ма гимнази "Альбион"-ы сарӕзтой ирон ӕвзаг ӕмӕ литературӕйы кабинеттӕ, мыхуыр кодтой чингуытӕ ирон ӕвзагыл ӕмӕ афтӕ дарддӕр. Уый тыххӕй мах дзурӕм стыр бузныг ахуырады министрадӕн", - банысан кодта Цхуырбаты Инга.

Уымӕй дарддӕр, Цхуырбаты Инга банысан кодта, паддзахадон программӕ "Республикӕ Хуссар Ирыстоны ахуырад ӕмӕ зонады райрӕзт 2013-2017 азтӕм" ӕххӕст бӕрцуаты кӕй нӕ сӕххӕст кодтой.

"Рӕзгӕ фӕлтӕры монон-фӕткон хъомылад 2017-2019 азтӕм" программӕйы тыххӕй Цхуырбаты Инга фехъусын кодта, кӕронмӕ йӕ кӕй сӕххӕст кодтой.

Республикӕйы ахуырады министр Гасситы Натали загъта бузныг депутаттӕн министрады куыстӕн саргъ кӕныны тыххӕй ӕмӕ банысан кодта, бӕстӕйы ӕнтыстджын фидӕны тыххӕй рӕзгӕ фӕлтӕрмӕ хъӕуы здахын сӕйраг хъусдард.

Комитет аскъуыддзаг кодта рахӕссын ацы хыгъдлӕвӕрдтӕ Хуссар Ирыстоны парламенты президиуммӕ.

12
Ерман

Ног маршрут: Хуссар Иры альпинисттӕ схиздзысты Хъӕдласӕны хохмӕ

3
(ранӕуӕггонд 11:51 22.10.2020)
Къорд ивгъуыд къуыри та ӕрыздӕхт Бурхохӕй, Хуссар Ирыстоны иууыл бӕрзонддӕр ӕфцӕгыл кувӕндоны бафӕдзӕхстой республикӕйы цӕрджыты коронавирусы апарахаты дуджы

ЦХИНВАЛ, 22 окт - Sputnik, Плиты Фатимӕ. Хуссар Ирыстоны альпинистты къорд схиздзӕн Дзауы районы Хъӕдласӕны хохы бӕрзӕнмӕ, фехъусын кодта Sputnik балцгӕнджытӕй иу Багаты Марат.

Къорд ивгъуыд къуыри та ӕрыздӕхт Бурхохӕй, Хуссар Ирыстоны иууыл бӕрзонддӕр ӕфцӕгыл кувӕндоны бафӕдзӕхстой республикӕйы цӕрджыты коронавирусы апарахаты дуджы. 

"Хъӕдласӕн хохмӕ никуыма ахызтыстӕм, нымад цӕуы зынвадатыл. Ис Ерманы хъӕуы сӕрмӕ галиу фарс. Нӕ планмӕ гӕсгӕ хъуамӕ афӕндараст уӕм майрӕмбоны ӕмӕ хуыцаубоны фӕстӕмӕ сӕмбӕлӕм нӕ хӕдзӕрттыл.  Йӕ бӕрзӕндыл ӕрсадздзыстӕм ирон тырыса", - загъта Марат.

Альпинист банысан кодта, Хъӕдласӕнмӕ уӕлӕмӕ сцыд кӕй ахсы ӕхсӕз сахатмӕ ӕввахс, фӕстӕмӕ та - цыппар.

3
Цхинвалы сӕйраг фонтаны фӕлвӕрдон скуыст

Театралон фӕзуатыл ауагътой Цхинвалы сӕйраг фонтаны фӕлвӕрдон скуыст

6
(ранӕуӕггонд 10:37 22.10.2020)
Фонтан хъуамӕ радтаиккой эксплуатацимӕ Паддзахадон драмон театры бӕстыхаимӕ иумӕ 2018 азы. Уый фӕстӕ объекты баконд цалдӕр хатт аргъӕвтой

ЦХИНВАЛ, 22 окт — Sputnik, Гӕбӕраты Элина. Хуссар Ирыстоны столицӕйы сӕйраг фӕзуатыл ауагътой фӕлвӕрдон скуыст республикӕйы иууыл егъаудӕр фонтанӕн.

Фонтаны арӕзтадӕн ис рагон истори. Фӕстаг хатт фонтан нывӕдысты раттын эксплуатацимӕ ацы аз уалдзӕджы, фӕлӕ уӕд специалисттӕн нӕ бантыст ӕрцӕуын республикӕмӕ карантины тыххӕй.

Ныртӕккӕ куыстытыл архайынц фирмӕ ООО "Про-Микс"-ы специалисттӕ, кӕцытӕ сарӕзтой бирӕ фонтантӕ Цӕгат Кавказы.

"Куыстытӕн фестӕм сӕ 98 проценты. Фонтаны скуыст у зын процесс. Куыстыты кӕронбӕттӕн этап цӕудзӕн дыууӕ къуырийы дӕргъы, мӕйы кӕронмӕ нывӕндӕм ауадзын фонтаны фӕлварӕн скуыст", - фехъусын кодта Sputnik фирмӕйы разамонӕг Евгений Иванидзе.

Уый ма банысан кодта, ныры куыстытӕ баст кӕй сты ифтоггарз компьютеры программӕтимӕ баиу кӕнынимӕ.

Знон изӕры ацыд фонтаны тестон скуыст. Цхинвалы цӕрджыты зӕрдиагӕй кастысты фонтаны рӕсугъддзинӕдтӕм.

"Нӕ мӕ уырны, кӕй банхъӕлмӕ кастыстӕм фонтаны скуыстмӕ. Бирӕ проблемӕтӕ уыд, фӕлӕ ныр фӕзуат сфӕлындзӕн фонтанӕй", - радзырдта Sputnik столицӕйы цӕрӕг Александр.

Фонтан хъуамӕ радтаиккой эксплуатацимӕ Паддзахадон драмон театры бӕстыхаимӕ иумӕ 2018 азы. Уый фӕстӕ объекты баконд цалдӕр хатт аргъӕвтой.

Тестирование фонтана в Цхинвале
© Sputnik / Элина Габараева
Тестирование фонтана в Цхинвале
6