Евроцӕдисы минӕвӕрттӕ

ПӔК: Гуырдзыстон ӕмӕ Евроцӕдисы минӕвӕрттӕ фехӕлдтой Хуссар Иры арӕны режим

12
(ранӕуӕггонд 11:08 26.05.2020)
Гуырдзыстон дарддӕр аразы къахдзӕфтӕ, кӕцытӕ ӕркӕнынц ӕндыгъд уавӕрмӕ Хуссар Ирыстоны паддзахадон арӕныл

ЦХИНВАЛ, 26 май - Sputnik. Хуссар Ирыстоны Паддзахадон ӕдасдзинады комитет (ПӔК) фехъусын кодта гуырдзиаг полицийы кусджытӕ ӕмӕ Евроцӕдисы цӕстдарды миссийы минӕвӕрттӕ кӕй фехӕлдтой республикӕйы паддзахадон арӕн, афтӕ ма гуырдзиаг фарс нывӕнды саразын блокпосттӕ арӕны хаххыл.

ПӔК Арӕнгӕрон службӕйы информацимӕ гӕсгӕ, 2020 азы 21 майы Цхинвалы районы Ксуисы хъӕуы цур Гуырдзыстоны полици ӕмӕ Евроцӕдисы миссийы минӕвӕрттӕ фехӕлдтой республикӕйы арӕн. Иннӕ бон, 22 майы, гуырдзиаг полицийы кусджытӕ фехӕлдтой паддзахадон арӕны режим Цхинвалы районы Хелчуайы хъӕуы цур ӕмӕ бацыдысты дӕс метры Хуссар Ирыстоны территоримӕ.

"ПӔК сбӕрӕг кодтой, гуырдзиаг тыхон структурӕтӕ кӕй нывӕндынц саразын цӕстдарӕн посттӕ РХИ ӕмӕ Гуырдзыстоны хсӕн паддзахадон арӕны алыгъуызон хӕйттыл. Ныртӕккӕ гуырдзиаг полици нывӕнды сӕвӕрын йӕ кусджыты Ленингоры районы Дзеглеуы хъӕуы цур, арӕнмӕ хӕстӕг", - дзырдӕуы ПӔК пресс-службӕйы хъусинаджы.

Ахӕм архӕйдтытӕ гӕнӕн ис ӕркӕной конфликты эскалацимӕ, банысан кодтой уагдоны.

ПӔК ма бахахх кодтой, зӕгъгӕ, Евроцӕдисы минӕвӕрттӕ нӕ уромынц Гуырдзыстоны агрессивон политикӕ, фӕлӕ ма сӕхӕдӕг дӕр активон хайад исынц мадзӕлтты паддзахадон арӕныл.

12
Дзӕуджыхъӕу

Иумӕйаг проекттӕ: Иры дыууæ хайы Ӕхсæнадон палатæтæ сфидар кодтой бадзырд

8
(ранӕуӕггонд 13:04 23.09.2020)
Бадзырд фидар ӕрцыд 22 сентябры Дзӕуджыхъӕуы ӕхсӕнадон палатӕты сӕргълӕууджытӕ Куыдзеты Сергей ӕмӕ Чиплакова Ирина къухфысттӕй

ЦХИНВАЛ, 19 сен — Sputnik, Плиты Фатимæ. Хуссар Ирыстон ӕмӕ Цӕгат Ирыстоны ӕхсӕнадон палатӕтӕ бафыстой ӕмгуыстады бадзырд. Суагъӕйы фӕлгӕтты дыууӕ республикӕйы уагдӕттӕ ӕххӕст кӕндзысты иумӕйаг проекттӕ, цайадагъ кӕндзысты кӕрӕдзи фӕлтӕрддзинадыл, фехъусын кодта Sputnik баиугонды разамонӕг Куыдзеты Сергей.

"Уый нӕ фыццаг ӕмгуыстады бадзырд цӕгатирыстойнаг коллегатимӕ. Уый фӕлгӕтты ӕххӕст цӕудзысты иумӕйаг проекттӕ, кӕрӕдзийӕн ӕххуыс кӕндзыстӕм, стӕй ма исдзыстӕм уыдон фӕлтӕрддзинад. Хуссар Ирыстоны ӕхсӕнадон палатӕ фӕзынд ӕрмӕст 2009 азы кӕрон, уыдонӕн та сты фӕлтӕрддӕр", - загъта ӕхсӕнадон палатӕйы хистӕр.

Йӕ ныхӕстӕм гӕсгӕ, уыдонӕн сӕ нывӕзты ис ӕнгӕс документтӕ сфидар кӕнын ӕндӕр хӕларадон республикӕтимӕ.

"Фӕстӕдӕр ахӕм суагъӕтӕ фӕнд кӕнӕм сфидар кӕнын Кӕсӕг-Балхъары, Абхазимӕ ӕмӕ дарддӕр кӕндзыстӕм ацы куыст", - бафтыдта уый.

Бадзырд фидар ӕрцыд 22 сентябры Дзӕуджыхъӕуы ӕхсӕнадон палатӕты сӕргълӕууджытӕ Куыдзеты Сергей ӕмӕ Чиплакова Иринайы къухфысттӕй.

8
Парламент

Спикер: депутатты архайд у закондӕттӕг органы куысты ӕргом саботаж

24
(ранӕуӕггонд 12:04 23.09.2020)
Ӕртыццӕджы фӕуд кӕны закондӕттӕг органы ӕркасты ӕмгъуыд президенты æнхърæнмæ Хуссар Ирыстоны хицауады сӕрдар снысан кӕнынӕн

ЦХИНВАЛ, 23 сен — Sputnik, Плиты Фатимæ. Хуссар Ирыстоны парламент нырма не 'ркаст Хуссар Ирыстоны хицауады сӕрдарӕй Бекъойты Геннадийы снысан кӕныны ӕнхъарӕнмӕ. Къорд парламентарий кӕй нӕ цӕуынц сессимӕ, уый парламенты спикер Тадтаты Алан схуыдта закондӕттӕг органы куысты ӕргом саботаж.

Ӕртыццӕджы фӕуд кӕны закондӕттӕг органы ӕркасты ӕмгъуыд президенты æнхърæнмæ Хуссар Ирыстоны хицауады сӕрдар снысан кӕнынӕн. Депутатты иу къорд фӕхъусын кодтой, сӕ хӕстӕ кӕй не 'ххӕст кӕнындзысты, цалынмӕ паддзахады разамонӕг нӕ сӕххӕст кӕна сӕ домӕн - Генералон прокурор Дзӕгъиаты Уырызмӕджы йӕ бынатӕй ссӕрибар кӕнынмӕ.

"Депутаттӕ не 'рымбырд сты. Абон ӕнӕмӕнгӕй хъуамӕ радтон дзуапп президентӕн ӕмӕ йӕ ратдзӕн. Никуы никӕцы законы фыст ис, ныридӕгӕн цы аразынц депутаттӕ, уый. Уый у парламенты куысты ӕргом саботаж", - загъта Sputnik парламенты сӕрдар Тадтаты Алан.

16 сентябры президент Бибылты Анатолий парламенты ӕркастмӕ бавдыста Бекъойты Геннадийы кандидатурӕ премьер-министры бынатмӕ. Конституцимӕ гӕсгӕ, фарстмæ сессийы агъоммӕ ӕркӕсынц комитет æмæ президиумы.

Раздӕры хицауад ацыд отставкӕйы Цхинвалы митингты фӕстӕ. Столицӕйы адӕм се 'неразыдзинад равдыстой Цхинвалы цӕрӕг Дзабиты Иналы мӕлӕты фӕстӕ, кӕцы амард Мидхъуыддӕгты министрады криминалон милицийы рӕстӕгмӕ дарӕн изоляторы нады фæстиуæгæн.

Уый фæстæ митингты адӕм домдтой МХМ хистӕр ӕмӕ Генералон прокуроры отставкӕтӕ. 16 сентябры президент йӕ пресс-конференцийы комкоммӕ эфиры фехъусын кодта йӕ дзуапп депутаттӕн, генералон прокуроры йӕ бынатӕй ссӕрибар кӕнынӕн кӕй нӕй бындур. Уымӕй размӕ закондӕттӕг органты депутатты ӕмбис сӕ куыст ӕххӕст кӕныныл нал саразы сты, цалынмӕ президент сӕххӕст кӕна сӕ домӕн.

18 сентябры парламентон фракци "Иугонд Ирыстон"-ы скондæй йæ рахызты тыххæй фехъусын кодта депутат Мулдарты Гарри, уымæй уый равдыста йе ʻнæразыдзинад депутатты фылдæр хайы домæн æххæст кæй не ʻрцыд, уый тыххæй.

24