Цхинвалы цалдӕр уынгыл ивынц зӕххы бын коммуникацитӕ

Цхинвалы цалдӕр уынгыл ивынц зӕххы бын коммуникацитӕ

51
(ранӕуӕггонд 13:08 02.06.2020)
Ранымайгӕ адрестыл коммуникацитӕ ивд никуы рцыдысты. Хӕтӕлтӕ сты аварион уавӕры, радгӕсон службӕмӕ цӕрджытӕ арӕх фӕдзурынц сӕ проблемӕйы тыххӕй

ЦХИНВАЛ, 2 июн - Sputnik, Плиты Фатимӕ. Паддзахадон унитарон куыстуат "Водоканал" ивы зӕххы бын коммуникацитӕ столицӕйы къорд уынгыл. Кусджыты хъусдард ныридӕгӕн здӕхт у Джиоты Аланы проспекты 130, 130А, 128, 128А ӕмӕ 128В хӕдзӕртты кӕртытӕм, фехъусын кодта Sputnik уагдоны сӕйраг инженер Джиоты Инга.

Ранымайгӕ адрестыл коммуникацитӕ ивд никуы рцыдысты.

"Арӕзтадон-монтажон куыстӕм банӕлдтой 26 майы. Хӕтӕлтӕ сты аварион уавӕры, ӕвзӕр тӕф сӕ кӕлы, нӕ радгӕсон службӕмӕ цӕрджытӕ арӕх фӕдзурынц сӕ проблемӕйы тыххӕй. Хӕтӕл ссыгъдӕг кӕнӕм, фӕлӕ та дыууӕ боны фӕстӕ проблемӕ сног вӕййы. Бынаты кусы дыууӕ бригадӕ улӕфт бонты дӕр ӕмӕ дыууӕ къуырийы ӕмгъуыдмӕ фӕнд кӕнӕм фӕуын куыстытӕ", - загъта уый.

Инженеры ныхӕстӕм гӕсгӕ, администрацийы хӕслӕвӕрдмӕ ӕнгӕс куыстытӕ балхынцъ сты ӕндӕр уынгтыл дӕр.

"Сталины 96, 98, Фидауынгӕнджы уынгтыл 5,6,8 ӕмӕ 10 хӕдзары, стӕй ма Путины уынгыл ныридӕгӕн фесты коммуникацитӕ ивыны куыст", - загъта уый.

Уыимӕ иумӕ ма столицӕйы цӕуынц арӕзтадон куыстытӕ 2020 азы Инвестицион нывӕзты фӕлгӕтты дӕр, ӕмткӕй хъусдард аздахдзысты 8 уынгмӕ.

"Майы кӕрон балхынцъ сты Кимы уынгтыл куыстытӕ. Дарддӕр кусынынц Белинский ӕмӕ Базарадон уынгтыл,  сомӕй райдайдзысты Табуты Родион ӕмӕ Революцийы уынгтыл. Нывӕзты ма ис ноджы Нӕузӕххонты, Плиты Ароны ӕмӕ Хъайтарты уынгтыл куыстытӕ", - бафтыдта Джиоты Инга.

Уый ма радзырдта, ацы куыстыты фӕстӕ дӕр нырма коммуникациты проблемӕ лыг кӕй не 'рцӕудзӕн - 2021 ӕмӕ 2022 ӕзты дӕр ӕнгӕс куыстытӕ цӕудзысты фӕйнӕ аст уынгтыл.

51
COVID-19

Хуссар Иры сбӕрӕг кодтой 37 ног рынчыны коронавирусӕй

1
(ранӕуӕггонд 16:10 20.01.2021)
Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты

ЦХИНВАЛ, 20 янв - Sputnik, Хъуылымбегты Зӕлинӕ. Хуссар Ирыстоны рынчындоны интенсивон терапийы хайады ис цыппар пациенты коронавирусимӕ, радзырдта Sputnik "Югосетпотребнадзор"-ы хистӕр Коцты Марина.

Хуссар Ирыстоны коронавирусы пандемийы райдианӕй сарӕзтой 14577 иртӕсты, уыдонӕй 2652 равдыстой тӕссаг инфекцион низы уӕвынад.

"Ивгъуыд суткӕйы сарӕзтӕуыд 132 тесты, уыдонӕй 37 адӕймагӕн разынд COVID-19", - загъта Коцты Марина.

Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты.

Сӕйраг санитарон дохтыры ныхӕстӕм гӕсгӕ, Ленингоры рынчындоны коронавирусимӕ тох кӕнынц ӕхсӕз рынчыны, Къуаисайы та - авд.

1
Фадзайты Арсен

Фадзайты Арсен Хуссар Иры уавӕры тыххӕй: цӕттӕ дӕн хайад райсын баныхасы

1
(ранӕуӕггонд 15:39 20.01.2021)
Республикӕйы къухдариуӕгады диалог оппозицон депутаттӕ ӕмӕ Дзабиты Иналы хиуӕттимӕ фӕнд кӕны ӕрнывыл кӕнын хуссарирыстойнаг политикты къорд, сӕ нымӕцы экс-президенттӕ ӕмӕ фыццаг ӕрсидты парламенты депутаттӕ

ЦХИНВАЛ, 20 янв – Sputnik, Козаты Диана. Уӕрӕсейы Федерацийы Советы уӕнг Цӕгат Ирыстонӕй Фадзайты Арсен загъта йӕ хъуыды Хуссар Ирыстоны уавӕры тыххӕй. Уый банысан кодта, республикӕйы кризис кӕй къуылымпы кӕны политикон ӕмӕ экономикон райрӕзт, афтӕ ма банхъардта йе ‘ххуыс хицауад ӕмӕ оппозицийы диалогы.

Цхинвалы 4 декабрӕй фӕстӕмӕ цӕуы Дзабиты Иналы хиуӕтты акци. Уыдон ӕвдисынц се нӕразыдзинад лӕппуйы мӕлӕты сгарӕн куысты фӕдыл ӕмӕ домынц, цӕмӕй йӕ бынатӕй ссӕрибар кӕной генералон прокурор Дзӕгъиаты Уырызмӕджы ӕмӕ бӕрндзинад хӕсса МХМ раздӕры министр Наниты Игорь.

"Ӕз никӕимӕ дзырдтон ацы уавӕрыл. Республикӕ у чысыл, мах иууылдӕр кӕрӕдзи зонӕм, ӕмӕ мӕн уырныдта, иудзинадмӕ кӕй ӕрцӕудзыстӕм. Дыууӕ экс-президенты ӕмӕ ӕндӕр фӕлтӕрд политиктӕ куы бадзырдтой къухдариуӕгадмӕ ӕмӕ куы фембӕлдысты Дзабиты Иналы бинонтимӕ, уӕд мӕнмӕ цалдӕр хатт бадзырдтой Хуссар Ирыстоны цӕрджытӕ", - загъта Фадзайты Арсен йӕ интервьюйы Sputnik-ӕн.

Йӕ ныхӕстӕм гӕсгӕ, уый куыд ирон, сенатор ӕмӕ Федерацийы Советы Къамисы уӕнг Хуссар Ирыстоны парламентимӕ ӕмгуыстады фӕдыл, йӕхи нӕ аиуварс кӕндзӕн ацы цаутӕй.

Фадзайты Арсен бахахх коджта, республикӕйы разамынад кӕй хъуамӕ ссара компромисс.

"Дзабиты Иналы бинонты зӕрдӕмӕ нӕ цӕуы фӕдагуырд куыд цӕуы, уый. Бирӕ фарстытӕ ис тыхон структурӕтӕм, фӕлӕ мӕн уырны, республикӕйы къухдариуӕгад кӕй ссардзӕн фадат рахизын ацы уавӕрӕй", - бафтыдта Фадзайты Арсен.

Уый размӕ Фадзайты Арсен ныммыхуыр кодта йӕ фарсыл Instagram-ы куырдит, цы ран бахахх кодта, цӕттӕ кӕй у хайад райсын баныхасы.

Гобозты Вячеслав ӕмӕ Цоциты Борис фехъусын кодтой Sputnik, Фадзайты Арсен нырма кӕй нӕ ныхас кодта ацы фарсты фӕдыл инициативон къорды уӕнгтимӕ.

Амӕйразмӕ хъусын кодтой, дыууӕ экс-президенты, парламенты фыццаг ӕрсидты депутаттӕ ӕмӕ Централон ӕвзарӕн къамисы (ЦӔК) фыццаг сӕргълӕууӕг сарӕзтой куырдиат, кӕцыйы банхъардтой хайад райсын хицауад ӕмӕ оппозицийы диалогы.

1