Фильмӕй кадртӕ

Геноциды 100 азмӕ: Хуссар Иры бавдисдзысты документалон киноныв

99
(ранӕуӕггонд 15:20 08.06.2020)
Кинонывыл куыст цӕуы ныр азы дӕргъы, ис ӕлхынцъгӕнӕн этапы. Йе сфӕлдисджытӕ сты киностуди "Allonfilm"-ы курдиатджын къорд

ЦХИНВАЛ, 8 июн – Sputnik, Плиты Фатимӕ. Хуссар Ирыстоны национ киностуди "Allonfilm" ирон адӕмы геноциды амӕттӕгты мысӕн бонмӕ сцӕттӕ кӕндзӕн документалон киноныв, иу ӕнусы дӕргъы Гуырдзы Ирыстонӕн цы фыдракӕндтӕ ракодтой, уыдон фӕдыл. Лентӕйы 1920 ӕзты цауты ӕвдисӕнтӕ ӕмӕ фӕдонты раныхастӕй дарддӕр уыдзӕн историон цауты реконструкцитӕ, фехъусын кодта Sputnik киностудийы директор Мамиты Григорий.

Кадры из фильма
Киностудия "Allonfilm"
Фильмӕй кадртӕ

Сфӕлдыстадон къорд фильм, йӕ кусӕгон ном "Геноциды сӕдӕ азмӕ", бавдисдзысты 20 июны.

"Кинонывыл куыст цӕуы ныр азы дӕргъы, ис ӕлхынцъгӕнӕн этапы. Йе сфӕлдисджытӕ сты киностуди "Allonfilm"-ы курдиатджын къорд", - загъта Мамиты Григорий.

Директоры ныхӕстӕм гӕсгӕ, кинонывы централон бынӕттӕ ахсынц XX ӕнусы райдайӕны ӕрцӕугӕ цауты сӕйраг хъайтартӕй дыууӕ - Санахъоты Мате ӕмӕ Гаглойты Рутен.

"Уацмыс "Хур скӕсӕны рдӕм нӕ ныгъуылы"-йӕ райстам бындур, йӕ ном дӕр ӕвзарӕм уый ӕмӕ "Геноциды 100 аз"-ы хсӕн. Сӕйраг хъайтарӕ сты ацы дыууӕ гоймаджы, уымӕн ӕмӕ Санахъоты Мате ӕмӕ Гаглойты Рутены равдыстой стыр тых, уыдон фӕрцы уыцы рӕстӕг скъуыддзаг цыдысты Иры ахсджиаг фарстытӕ", - радзырдта уый.

Фильм ахӕсдзӕн дыууӕ сахаты бӕрц ӕмӕ йӕ сфӕлдисджытӕ нымайынц зондзонӕн историон ӕрмӕгыл.

"Ис дзы, уыцы цауты централон бынат чи ахсы, уыдон зӕнӕджы интервьютӕ. 13 коммунары истори чи федта, уыдонӕй иуы ӕмбалы чызг, кӕцы ис 85 кары, фӕлӕ сӕ тынг хорз хъуыды кӕны", - загъта Мамиты Григорий.

Уый бамбарын кодта, зӕгъгӕ ма кинонывы канд 20-ӕм ӕзты геноцидӕй дарддӕр равдисдзысты уый фӕстӕ культурон геноцид ӕмӕ ирон адӕмы цӕгъдӕнтӕ дӕр.

"Мах бафӕлвӕрдтам ӕрӕмбырд кӕнын, 100 азы дӕргъы нын Гуырдзыстон цы разиан кодтой, уыдон ӕппӕт дӕр. Ирыстоны ахуырад ракодтой гуырдзиаг ӕвзагмӕ, цагътой интеллигенцийы минӕвӕртты, ирон лӕппуты, кӕцытӕ бафӕлвӕрдтой сӕ мадӕлон ӕвзаджы сӕр сдзурын", - загъта уый.

Киностудийы разамонӕджы ныхӕстӕм гӕсгӕ, уыдон ныр дыккаг хатт раздӕхтысты 1920 азы геноциды цаутӕм. Уый фӕстӕ та фӕнд кӕнынц, ирон лигъдӕтты Дыгуры куыд хорз райстой, уый дӕр уӕрӕх экранмӕ рахӕссын.

99
Коронавирус

Сӕйраг санитарон дохтыр коронавирусы апарахаты тыххӕй Хуссар Иры: ӕнӕстабилон уавӕр

6
(ранӕуӕггонд 16:30 23.10.2020)
Низ арӕхдӕр бахӕцы 18-69 азы кары адӕмыл, ацы кары къордмӕ хауы вирусӕй рынчынты ӕртыккаг хай, банысан кодта Коцты Марина

ЦХИНВАЛ, 23 окт — Sputnik, Козаты Диана. Хуссар Ирыстоны коронавирусӕй рынчынты ӕртын процентӕй фылдӕр хоскӕнынад цӕуынц медицинон уагдӕтты, радзырдта йӕ интервьюйы Sputnik республикӕйы сӕйраг санитарон дохтыр Коцты Марина.

Югосетпотребнадзоры сӕргълӕууӕг схуыдта коронавирусы апрахаты уавӕр Хуссар Ирыстоны "ӕнӕстабилон". Уый радон хатт ӕрсидт цӕрджытӕм, цӕмӕй ӕххӕст кӕной дохтыртӕ ӕмӕ эпидемиологты рекомендацитӕ, дарой маскӕтӕ ӕмӕ сӕхи хизой адӕмы массон ӕмбырдтӕй.

"Фӕрынчынуӕвджыты ӕртын иу проценты сты стационарты. Инфекцион рынчындон ӕмӕ сывӕллӕтты рынчындоны сты 84 пациенты коронавирусимӕ. Се хсӕн ис уӕззау рынчынтӕ дӕр. Дохтыртӕ аразынц алцыдӕр, цы ис сӕ тыхты, фӕлӕ уыцы тыхтӕ фаг не сты", - загъта Коцты Марина.

Йӕ ныхӕстӕм гӕсгӕ, фӕрынчынуӕвджыты 70 проценты сты 18-69 азы кары адӕм. 12 процентмӕ ӕввахс сты сывӕллӕттӕ 17 азы онг, ӕмӕ 18 проценты та сты 65 азӕй хистӕрдӕр адӕм.

Сӕйраг санитарон дохтыр бахахх кодта, уагдонмӕ кӕй ис тест-системӕтӕ 10 000 басгӕрст ауадзынӕн.

"Хардзгӕнӕн ӕрмӕджытимӕ проблемӕ нын уыд, фӕлӕ сӕ тагъд райстам. Уыдон дефициты сты Уӕрӕсейы дӕр. Мах алкӕмӕндӕр аразӕм тесттӕ, фӕлӕ лабораторийы хъомыс ӕмӕ адӕймагон ресурс нӕ фаг кӕнынц" – банысан кодта Коцты Марина.

Уый ма бафтыдта, зӕгъгӕ, Югосетпотребнадзорӕй дарддӕр ӕмбӕстӕгтӕн фадат ис раттын анализтӕ хисӕрмагонд лабораториты "Гемотест" ӕмӕ "КДЛ"-йы.

6
Уӕззау рӕстӕг: куыд кусы Тагъд ӕххуыс Цхинвалы

Уӕззау рӕстӕг: куыд кусы Тагъд ӕххуыс Цхинвалы

13
(ранӕуӕггонд 22:08 23.10.2020)
Тагъд ӕххуысы службӕйы куысты егъау гуырахстӕн бамбарӕн ис сӕ хӕдтулгӕты змӕлдӕй горӕты, столицӕйы уынгтыл азилгӕйӕ ӕнӕмӕнг фембӕлдзынӕ дохтырты бригадӕтыл

ЦХИНВАЛ, 23 окт — Sputnik, Плиты Фатимӕ. Хуссар Ирыстоны тагъд ӕххуысы станцы медиктӕ кусынц уӕлвӕткон уавӕрты. Дохтырты бахъӕуы ӕртӕ суткӕ фӕд-фӕдыл кусын.

Тагъд ӕххуысы дохтыр Ӕрсойты Дианайы ныхӕстӕм гӕсгӕ, бригадӕтӕ станцмӕ цӕуынц ӕрмӕст сӕ хызынтӕ медикаменттӕй баххӕст кӕнынмӕ.

"Тынг бирӕ нӕм сидынц, бирӕ ис коронавирусӕй рынчынтӕ. Абон дӕр фӕхӕццӕ кодтам рынчындонмӕ сылгоймагджы уӕззау уавӕры, кӕцыйӕн йӕ рӕуджыты 60% джиздард сты, ис ын сӕкӕрниз. Фӕлӕ ма уыимӕ иумӕ бирӕ адӕм тасӕй дӕр дзурынц 37,5 тӕвдимӕ",- загъта дохтыр.

Фӕстаг ӕртӕ къуырийы сарӕх сты коронавирусӕй рынчынтӕ, зынгӕ фӕфылдӕр ис тагъд ӕххуысы службӕйы куыст, уыимӕ иумӕ ма ис рынчынтӕ медикты хсӕн дӕр.

"Мӕ къӕхтыл ма тыххӕй лӕууын. Ӕртӕ суткӕ кусын ӕнӕрлӕугӕйӕ. Афтӕ кусынц мӕ коллегатӕ дӕр. Иу бон хъуамӕ баулӕфон ӕмӕ та уый фӕстӕ рахидзӕн радгӕсмӕ. Нӕ дохтыртӕй ӕртӕ рынчын сты, уымӕ гӕсгӕ аннӕты куыст фӕфылдӕр ис. Ӕппынӕдзух нӕм кусы цыппар бригадӕ. Алкӕцы дохтыр дӕр адӕм ӕмӕ нӕ сӕйраг дохтыры ӕфсӕрмӕй кусы уӕлвӕткон режимы", - бафтыдта медик.

Дохтыры ныхӕстӕм гӕсгӕ, хъахъхъӕнӕг ӕрмӕгӕй сты ӕххӕст. Коронавирусы апарахаты масштаб хынцгӕйӕ тагъд ӕххуысы службӕ рынчындонмӕ кӕнынц ӕрмӕст уӕззау рынчынты.

"Уӕззау рынчын чи нӕу, уыдонӕн дӕттӕм рекомендацитӕ ӕмӕ сӕ радтӕм фадыгон дохтыры бӕрнмӕ", - загъта дохтыр.

Ӕрсойты Диана ма бахахх кодта, фӕстаг ӕртӕ къуыри нырма рынчынты ӕмӕ рбадзырдты нымӕц кӕй хизы уӕлӕмӕ.

"Иууыл тынгдӕр тыхсӕм ӕнӕрлӕугӕ куыстӕй. Улӕфынӕн иу уысм дӕр рӕстӕг нӕй. Ӕхсӕв цъус вӕййы сабырдӕр", - загъта Ӕрсойты Диана.

Дохтыры ныхӕстӕм гӕсгӕ, сӕ службӕ тыхсы ӕрмӕст дохтырты цухдзинадӕй, астӕуккаг медперсонал фаг кӕны.

"Тагъд ӕххуысы сӕйраг дохтыр бахатыд, цӕмӕй нӕм фӕкӕсой кадртӕй, фӕлӕ нырма фарст скъуыддзаг нӕу", - бафтыдта уый.

13