Хуссар Иры ссардзысты ирӕтты геноциды амӕттӕгты рухс нӕмттӕ

Хуссар Иры ссардзысты ирӕтты геноциды амӕттӕгты рухс нӕмттӕ

18
(ранӕуӕггонд 12:44 17.06.2020)
Республикӕйы 20 июны ацӕудзӕн Ирӕтты геноциды амӕттӕгты фыццаг Мысӕн бон. Зӕрдылдарӕн датӕйы фӕдыл барамынд бафыста марты президент Бибылты Анатолий

ЦХИНВАЛ, 17 июн – Sputnik, Хъуылымбегты Азӕмӕт. Хуссар Ирыстоны сабаты ацӕудзысты мысӕн мадзӕлттӕ, кӕцытӕ нывонд сты геноциды амӕттӕгты Мысӕн бонӕн.

2020 азы сӕдӕ азы ӕххӕст кӕны ирон адӕмы геноцидыл, кӕцы сӕххӕст кодта Гуырдзыстоны къухдариуӕгад 1920 ӕзты. Ирӕтты геноциды амӕттӕгты Мысӕн бон банысан кӕндзысты 20 июны - 13 ирон коммунары гуырдзиаг ӕфхӕрджытӕ куы фехстой, уыцы цауы афӕдзы бон. Зӕрдылдарӕн датӕ сфидар кӕныны фӕдыл барамынд марты бафыста президент Бибылты Анатолий. Июны райдайӕны паддзахады сӕргълӕууӕг бафыста ноджы иу барамынд – ирӕтты геноциды амӕттӕгты Мысӕн боны фыдох расидыны фӕдыл.

Коронавирусимӕ уавӕры тыххӕй нывӕзтон егъау мадзӕлтты фылдӕр хай нал ауадздзысты.

Мысӕн датӕ банысан кӕндзысты альпинистты хӕрдмӕсцыдӕй ӕнӕном бӕрзӕндмӕ. 20 адӕймаджы скондӕй къорд ацӕудзӕн хӕххон фӕндӕгтыл, кӕцытыл сӕдӕ азы размӕ геноцидӕй лыгъдысты цӕгатмӕ лигъдонтӕ.

Фыдохы бон республикӕйы бӕстыхӕйтты ӕруадздзысты Паддзахадон тырысатӕ. Афтӕ ма республикӕйы къухдариуӕгад ӕмӕ ӕхсӕнад сӕвӕрдзысты дидинтӕ 13 коммунары цыртдзӕвӕнмӕ, кӕцы ссис ирон адӕмы хъайтардзинады символ.

ПТРК "ИР"-ы эфиры раныхас кӕндзӕн президент Бибылты Анатолий.

20 июны ӕмбисбон расидтдзысты Ӕппӕтнацион ӕдзӕмӕй алӕугӕйӕ уысм. Хуссар Ирыстоны аргъуанты ацӕудзысты панихидӕтӕ геноциды амӕттӕгты фӕдыл.

Уый фӕстӕ республикӕйы горӕттӕ ӕмӕ районты суаддзысты уӕлдӕфон тымбылӕгтӕ, кӕцытыл уыдзӕн фыст "Рухсаг ут!".

Театралон фӕзуатыл ӕнӕхъӕн бон уыдзӕн классикон ӕмӕ адӕмон фыдохы музыкӕ, ӕрвыл сахат та аргъуанты зӕлланг кӕндзӕн дзӕнгӕрӕг.

18
Чамоков Азӕмӕт

Бибылты Анатолий снысан кодта Хуссар Иры хицауады аппараты ног сӕргълӕууӕджы

1
(ранӕуӕггонд 11:47 20.01.2021)
Уый размӕ ацы бынаты авд азы дӕргъы куыста Гаглойты Олег, президент ӕй ссӕрибар кодта йӕ бынатӕй ивгъуыд аз декабры

ЦХИНВАЛ, 20 янв – Sputnik, Козаты Диана. Хуссар Ирыстоны хицауады аппараты ног сӕргълӕууӕг ссис Чамоков Азӕмӕт. Уый раивта ацы бынаты Гаглойты Олегы.

Хицауады рабадтыл президент Бибылты Анатолий фехъусын кодта, кӕй бафыста барамынд Чамоков Азӕмӕты снысан кӕныны фӕдыл.

"Чамоков Азӕмӕт бирӕ рӕстӕг кусы ацы фадыджы. Уый у хорз ахуырадимӕ адӕймаг", - загъта президент.

Чамоков Азӕмӕт загъта бузныг паддзахады сӕргълӕууӕгӕн ӕууӕнчы тыххӕй ӕмӕ банысан кодта, алцыдӕр кӕй араздзӕн йӕ хӕслӕвӕрдтӕ эффективонӕй ӕххӕст кӕныны тыххӕй.

Чамоков Азӕмӕт райгуырд 1986 азы Дзӕуджыхъӕуы. Иттӕг хорз нысӕнттимӕ каст фӕцис гимнази "Альбион" Цхинвалы.

2009 азы фӕцис Паддзахадон хӕххон аграрон университеты юриспруденцийы факультут.

2013 азӕй фӕстӕмӕ кусы Хуссар Ирыстоны хицауады аппараты. Уыд хицауады аппараты барадон хайады консультант, уый фӕстӕ та хъусдарды хайады хистӕр.

1
Коронавирус Хуссар Иры

Хуссар Иры хицауад рахицӕн кодта 6 милуан сомӕй фылдӕр медиктӕн фиддонтӕн

2
(ранӕуӕггонд 10:58 20.01.2021)
Фӕрӕзтӕ рахицӕн кодтой хицауад ӕмӕ президенты фӕстауӕрцон фондтӕй

ЦХИНВАЛ, 20 янв – Sputnik, Козаты Диана. Хуссар Ирыстоны хицауад аскъуыддзаг кодта рахицӕн кӕнын ӕхцайы фӕрӕзтӕ хицауады фӕстауӕрцон фондӕй РБМЦ кусджытӕн фиддонтӕ бафидыны фӕдыл коронавирусы ныхмӕ тохы тыххӕй.

Ӕнӕниздзинад хъахъхъӕнынады министрады бӕрӕггӕнӕнтӕм гӕсгӕ, медиктӕн фиддонтӕн хъӕуы рахицӕн кӕнын 6,5 милуан сомы. Фӕлӕ финансты министры хӕдивӕг Тыбылты Марина хицауады рабадтыл банысан кодта, бюджеты фӕдыл закон йӕ тыхы кӕй нӕ бацыд, уый фӕдыл ацы суммӕ нӕй гӕнӕн сисын уагдоны бюджетӕй.

"Уый фӕдыл мах банхъардтам рахицӕн кӕнын ацы суммӕйы хай хицауады фӕстауӕрцон фондӕй. Иннӕ хай та – президенты фондӕй. Хицауады фонды 12-ӕм хай – 5,7 милуан сомы, уыдонӕй хъӕуы рахицӕн кӕнын 5,5 милуан сомы, иннӕ хай та президенты фондӕй", - загъта Тыбылты Марина.

Президент Бибылты Анатолий йӕ хъус ӕрдардта къахдзӕфтӕм, кӕцытӕ хицауад хъуамӕ ӕххӕст кӕна, уымӕн ӕмӕ парламент нӕ ӕххӕст кӕны йӕ хӕслӕвӕрдтӕ.

"Мах бузныг дзурӕм медиктӕн сӕ хъайтардзинады тыххӕй. Ацы фиддонтӕ дӕр цъус сты, цӕмӕй сын саргъ кӕнӕм сӕ куыстӕн. Махӕн ацы ӕхцатӕ дӕр нӕ бон нӕу рахицӕн кӕнын, уымӕн ӕмӕ парламент нӕ райста ивындзинӕдтӕ фарон азы бюджетмӕ ӕмӕ ацы азы бюджет", - загъта президент.

Афтӕ ма, Бибылты Анатолий зӕрдыл ӕрбалӕууын кодта йӕ дзырдлӕвӕрд ссарын фӕрӕзтӕ медиктӕн фиддонтӕн, ӕмӕ банысан кодта, ахӕм фадат кӕй ис ӕрмӕстдӕр хицауад ӕмӕ президенты фӕстауӕрцон фондты руаджы.

Хуссар Ирыстоны парламент нӕ кусы 2020 азы сентябрӕй фӕстӕмӕ бойкоты тыххӕй, кӕцы расидтысты депутатты къорд, кӕцытӕ домынц генералон прокурор Дзӕгъиаты Уырызмӕджы отставкӕ.

2