Уалыты хъӕуы кувӕндон

Уалыты хъӕуӕй рацӕугӕтӕ сарӕзтой фӕндаг мыггаджы кувӕндонмӕ

8
(ранӕуӕггонд 16:46 22.06.2020)
Фӕндаг ауадзыны инициатор ссис Цхинвалы районы Уалыты хъӕуӕй рацӕугӕ Уалыты Федор

ЦХИНВАЛ, 22 июн – Sputnik. Хъуылымбегты Зӕлинӕ. Уалыты хъӕуы фӕзынд фӕндаг мыггаджы кувӕндонмӕ. Фӕндаг ауадзыны инициатор ссис Цхинвалы районы Уалыты хъӕуӕй рацӕугӕ Уалыты Федор, кӕцыйыл цӕуы 89 азы.

Хъӕу у Хуссар Ирыстоны иууыл рагондӕр цӕрӕг пункттӕй сӕ иу, уымӕн бындур ӕрӕвӕрдта Уалыты мыггаг. Фӕстӕдӕр ардӕм рацыдысты ӕндӕр мыггӕгты минӕвӕрттӕ дӕр.

"Ӕз райгуырдтӕн ам, мӕ ныййарджытӕ сты ам ныгӕд. Раст зӕгъгӕйӕ, арӕх мӕ фӕндыд цӕуын мӕ райгуырӕн хъӕумӕ, фӕлӕ дзы уыд зынвадат фӕндаг", - радзырдта Уалыты Федор.

Цхинвал-Арцеу фӕндаджы арӕзтады фӕстӕ Уалыты хъӕу лыг ӕрцыд сӕйраг магистралӕй. Фӕндагон кусджытӕм, ӕвӕццӕгӕн, афтӕ фӕкаст ӕмӕ хъӕуы цӕрджытӕ кӕй нал ис, уый тыххӕй йӕм бацӕуӕн дӕр нӕ хъӕуы аразын.

Уалыты Федор бадзырдта йӕ лӕппу Георгимӕ, цӕмӕй йын баххуыс кӕна аскъуыддзаг кӕнын проблемӕ. Уалыты Федоры ныхӕстӕм гӕсгӕ, фӕндаг ауадзынӕн бахъуыд цалдӕр сахаты куыст грейдерыл, ӕмӕ ныр рог хӕдтулгӕ ӕнцонтӕй цӕуы фӕндагыл.

"Фӕнды мӕ бузныг зӕгъын Уазӕгты Мевлуд ӕмӕ Уазӕгты Дмитрийӕн, кӕцытӕ баххуыс кодтой ауадзын фӕндагон куыстытӕ", - загъта Федор.

Уалыты Федор баныфсӕвӕрдта, хъӕумӕ ӕнцондӕр кӕй ссис бацӕуын, уый фӕстӕ бирӕты ногӕй ӕрфӕнддзӕн ӕрыздӕхын цӕрынмӕ хъӕумӕ.

8
Хуссар Иры ссардзысты Зары трагедийы амӕттӕгты рухс нӕмттӕ

Хуссар Иры ссардзысты Зары трагедийы амӕттӕгты рухс нӕмттӕ

1
(ранӕуӕггонд 15:30 17.05.2021)
Фыдохы мадзӕлттӕ ацӕудзысты 29 азы размӕ ӕвирхъау трагеди кӕм ӕрцыд, уыцы бынаты цур

ЦХИНВАЛ, 17 мая – Sputnik, Хъуылымбегты Азӕмӕт. Хуссар Ирыстоны цыппӕрӕмы, 20 майы, ацӕудзӕн фыдохы акци, кӕцы нывонд у Зары трагедийы амӕттӕгты мысӕнӕн, фехъусын кодтой Sputnik культурӕйы министрады пресс-службӕйы.

Зары трагеди нымад æрцыд Хуссар Ирыстоны ног историйы иууыл æгъатырдæртæй сæ иуыл, йæ амæттаг баисты 36 адæймаджы, 12 райстой цæфтæ. Фæмардуæвджытæй иууыл кæстæр уыд 11-аздзыд сывæллон, иууыл хистæрыл та цыд 76 азы.

"Ацы бон Зары хъӕумӕ бахизӕны ацӕудзӕн мысӕн акци "Зажги свечу в память о погибших! В душе зажги и никогда не задувай!". 12.03 сахатыл республикӕйы расидтдзысты Ӕппӕтнацион ӕдзӕмӕй алӕугӕйӕ уысм", - фехъусын кодтой культурӕйы министрады.

Фыдохы датӕмӕ паддзахадон телеуыныннад бацӕттӕ кодта тематикон алӕвӕрдты сери Цхинвалы цӕрджыты мысинӕгтимӕ ацы боны фӕдыл.

1
Хуссар Ирыстоны паддзахадон драмон театр

Ӕрхонгӕ режиссер Цхинвалы бавдисдзӕн комеди "Дон Жуан"

15
(ранӕуӕггонд 16:52 17.05.2021)
Спектакль Дон Жуан"-ы фыццаг хатт паддзахадон драмон театры сценӕйыл сӕ архӕстдзинад равдисдзысты ХИПУ театралон факультеты студенттӕ

ЦХИНВАЛ, 17 май — Sputnik, Плиты Фатимæ. Хуссар Ирыстоны паддзахадон драмон театр сцӕттӕ кодта спектакль "Дон Жуан" рауадзынмӕ. Дыгуры театры сӕйраг режиссер Джелиты Хъазыбеджы бакастӕй комеди уыдзӕн драмӕйы ӕууӕлтимӕ, фехъусын кодтой Sputnik ПДТ пресс-службӕйы.

Уагдоны банысан кодтой, къорд кӕй архайы, цӕмӕй къуырийы кӕрон спектакль бавдисой аивадон советӕн.

"Ӕвзонг курдиатджын режиссер Джелиты Хъазыбегӕн ис ӕндӕрхуызон бакаст Мольеры комедимӕ, уый у психологон драмӕ, алкӕцы  адӕймаг дӕр арф ахъуыды кӕндзӕн ӕмӕ фӕхуддзӕн йӕхи ӕппӕрццаг миниуджытыл. Репетицитӕ цӕуынц бон дыууӕ хатты", - загътой пресс-службӕйы.

Уым ма бафтыдтой, спектакль "Дон Жуан"-ӕн кӕй бацӕттӕ кодтой диссаджы дарӕс ӕмӕ декорацитӕ.

"Тынг ӕхсызгон нын у ацы премьерӕйы тыххӕй фехъусын кӕнын. Сӕйраг фӕлгонц ӕххӕст кӕны Мамиты Григорий, уый ралӕууыд Дон Жуанӕй, йе 'ххуырсты фӕлгонц та ӕххӕст кӕны Гаглойты Эдуард. Спектаклы ма архайынц адӕмон артист Тъехты Уасил, сгуыхт артисттӕ Уанеты Эдуард, Гаглойты Артур, Хуыгаты Альбина, Натия Чохели ӕмӕ Хаситы Сослан", - бафтыдта уый.

Ацы спектаклы ма фыццаг хатт паддзахадон драмон театры сценӕйыл сӕ архӕстдзинад равдисдзысты ХИПУ театралон факультеты студенттӕ.

 

15