Пухаты Эрик

Цы куыста хицауад 2019 азы: премьер радта депутаттӕн афӕдзон хыгъдлӕвӕрд

9
(ранӕуӕггонд 14:20 15.07.2020)
Хицауады сӕрдар Пухаты Эрикбанысан кодта ӕххӕстгӕнӕн къабазы ӕнтыстытӕ экономикӕ, арӕзтад, ӕнӕниздзинад хъахъхъӕнынад ӕмӕ адӕмы цардуавӕртӕ фӕхъуыздӕр кӕныны хаххыл

ЦХИНВАЛ, 15 июл – Sputnik, Козаты Диана. Хуссар Ирыстоны хицауады 2019 азӕн хыгъдлӕвӕрды фылдӕр хай нывонд уыд инвестицион нывӕзты реализацийӕн.

Хуссар Ирыстоны парламенты ӕртыццӕджы хъусынц 2019 азы хицауады куыстӕн хыгъдлӕвӕрдмӕ. Сессийы куысты хайад исынц хицауады уӕнгтӕ иууылдӕр, уагдӕтты къухдариуӕггӕнджытӕ, горӕтты ӕмӕ районты къухдариуӕггӕнджытӕ. Рабадтмӕ бацыд президент Бибылты Анатолий дӕр.

Хицауады сӕрдар Пухаты Эрик радзырдта сӕйраг мадзӕлтты тыххӕй, кӕцытӕ арӕзт ӕрцыдысты ивгъуыд азы, афтӕ ма арӕзтады стырдӕр объектты тыххӕй. Уыдон нымӕцы ма премьер ранымадта корпусты кӕртыты хӕрзарӕзтад ӕмӕ лифтты цалцӕг - рагон проблемӕ, кӕцы не скъуыддзаг кодта бирӕ ӕзты дӕргъы.

Уый ма радзырдта, хицауад кӕй кодта адресон ӕххуыс ӕмбӕстӕгтӕн - 2019 азы материалон ӕххуыс бакондӕуыд 13 милуанӕй фылдӕр сомы аргъ. Афтӕ ма зӕрдыл ӕрлӕууын кодта, кӕй фӕфылдӕр сты сывӕллӕтты ӕмӕ иурӕстӕгон фиддонтӕ. 

Инвестпрограммӕйыл дзургӕйӕ, иууыл ахсджиагдӕр ӕмӕ стырдӕр мадзӕлтты Пухаты Эрик банымадта уазӕгдон, цӕрӕнуат ӕмӕ медицинон кластеры объектты арӕзтад. Уый бахахх кодта, арӕзтады архайӕг 14 генподрядон организациты фылдӕр кӕй сты бынӕттонтӕ.

"Паддзахадон политикӕйы иууыл ахсджиагдӕр принцип у ӕмбӕстӕгты цӕрӕнуатӕй ифтонг кӕнын. Уыимӕ стыр хъусдард здӕхт цӕуы хӕдзӕртты гъӕдмӕ, цӕрджытӕн комфортон уавӕртӕ саразынмӕ. Фарон республикӕйы арӕзт ӕрцыд 300 милуан сомы аргъ цӕрӕнуат - ног корпустӕ Гуыбаты ӕфсымӕрты уынгыл. Ацы районы ма сараздзыстӕм сабидон дӕр ӕмӕ ноджы иу корпус", - банысан кодта премьер-министр.

Ахсджиаг объект ма уый схуыдта гуырӕн хӕдзар дӕр, кӕцыйы арӕзтад слӕууыд ӕрдӕгмиллиард соммӕ ӕввахс.

Пухаты Эрик ма банысан кодта доны хахх Уанат-Цхинвал ӕмӕ бырондоны арӕзтӕдтӕ дӕр.

Экономикон фадыджы та премьер ранымадта цыппар инвестицион проекты, кӕцыты реализаци райдыдта кӕнӕ адарддӕр ис ивгъуыд азы. Уыдон сты сӕндуцӕн "Иронсӕн", ӕхсӕры быдыртӕ, дыргъдӕттӕ "Южный сад" ӕмӕ агуыридуры завод.

Иууыл проблемон къабаз та Пухаты Эрик рахуыдта хъӕууон хӕдзарад.

9
Транскам

Фылдӕр адӕм фылдӕр рейстӕ: куыд фӕивта Цхинвалӕй Дзӕуджыхъӕумӕ автобусты график

1
(ранӕуӕггонд 15:18 18.09.2020)
Ӕхсӕнадон транспорт цӕуы уадзӕн пункт "Дӕллаг Зӕрӕмӕг"-ы уылты ӕнӕ зындзинӕдтӕй, уый фӕдыл дзы бирӕ адӕм пайда кӕнынц Уӕрӕсемӕ ацӕуынӕн

ЦХИНВАЛ, 18 сен — Sputnik, Гӕбӕраты Элина. Цхинвалӕй Дзӕуджыхъӕумӕ рейсон автобусты нымӕц фӕфылдӕр Уӕрӕсеимӕ паддзахадон арӕны баконды фӕстӕ, фехъусын кодта Sputnik Хуссар Ирыстоны автомобилон транспорты хайады сӕргълӕууӕг Дудайты Альберт.

Хуссар Ирыстон ӕмӕ Уӕрӕсе систой арӕны сӕрты хизыныл тобӕ дыццӕджы, 15 сентябры. Арӕн уыд ӕхгӕд фондз мӕйы дӕргъы, ныр уадзӕн пункт "Дӕллаг Зӕрӕмӕг"-ы ӕрмӕбырд сты километрон радтӕ.

Уыимӕ иумӕ, республикӕйӕ автобустӕ хизынц уадзӕн пункты уылты ӕнӕ зындзинӕдтӕй, уый фӕдыл бирӕ адӕм пайда кӕнынц ӕхсӕнадон транспортӕй Уӕрӕсемӕ ацӕуынӕн.

"Бирӕ адӕм дзы вӕййы, автобустӕ райдайынц цӕуын райсом раджы. Хӕдтулгӕты бирӕ бынат нӕй, ӕмӕ уайтагъд йедзаг кӕнынц. Ӕндӕрӕбон мах арвыстам рейсы ӕхсӕз автобусы, хуымӕтӕг рӕстӕджы та иу ӕрвыстам дыууӕ кӕнӕ ӕртӕ автобусы Цӕгат Ирыстонмӕ", - радзырдта Дудайты Альберт.

Дудайты Альберты хъуыдымӕ гӕсгӕ, ӕхсӕнадон транспортмӕ ажиотаж тагъд рӕстӕджы фӕкъаддӕр уыдзӕн ӕмӕ рейсон автобустӕ рахиздзысты куысты хуымӕтӕг режиммӕ.

1
РХИ парламент

Парти "Иугонд Ирыстон"-ы депутат фехъусын кодта фракцийӕ рахизыны тыххӕй

3
(ранӕуӕггонд 15:35 18.09.2020)
Ӕртыккаг ӕвзарӕн зылдӕй депутат банысан кодта, дарддӕр кӕй кусдзӕн парламенты ӕмӕ нӕ нывӕнды бахизын никӕцы парламентон фракцимӕ

ЦХИНВАЛ, 18 сен - Sputnik. Хуссар Ирыстоны парламенты депутат Мулдарты Гарри фехъусын кодта парти "Игонд Ирыстоны"-ы фракцийӕ кӕй рахызт, уый тыххӕй. Депутаты куырдиаты текст ныммыхуыр кодтой закондӕттӕг органы официалон сайтыл.

Мулдарты Гарри куыд банысан кодта, афтӕмӕй йӕ скъуыддзаджы аххоссаг уыд уый, ӕмӕ нӕ сӕххӕст кодтой Хуссар Ирыстоны парламенты депутатты фылдӕр хайы домӕн генпрокурор Дзӕгъиаты Уырызмӕджы отставкӕйы фӕдыл.

"Мӕ хъуыдымӕ гӕсгӕ, Дзӕгъиаты Уырызмӕг РХИ генералон прокуроры бынаты куы куса, уӕд уый хъыгдардзӕн объективон фӕдагуырд Дзабиты Иналы мӕлӕты фӕдыл, афтӕ ма ӕххӕст нӕ цӕудзысты нӕ паддзахад ӕмӕ ӕхсӕнады законон интерестӕ", – фехъусын кодта депутат.

Ӕртыккаг ӕвзарӕн зылдӕй депутат бафтыдта, зӕгъгӕ, дарддӕр кусдзӕн парламенты ӕмӕ нӕ нывӕнды бахизын никӕцы парламентон фракцимӕ.

Дзабиты Иналы мæлæт æхсæнады сæвзæрын кодта стыр резонанс. Йæ фæстæ Цхинвалы ацыд митингтæ, адæм домдтой, цæмæй йæ бынатæй сæрибар æрцæуа Генералон прокурор Дзæгъиаты Уырызмæг æмæ æфхæрд æрцæуой азымджынтæ. Фæстæдæр уагдон фехъусын кодта, ацы хъуыддаджы зæрдæхсайгæ адæм - криминалон милицийы аст кусæджы - рæстæгмæ æрцахстой.

3