Бирæуæладзыгон хæдзары кæрт

Нал ахизæн ис, нал фезмæлæн: Цхинвалы тротуартæй машинæтæ сурынц адæмы

72
(ранӕуӕггонд 14:25 27.07.2020)
Бирæуæладзыгон хæдзæртты кæртыты æхсæвæй-бонæй машинæтæй ахизæнтæ нæй. Суанг ма сæ тротуартыл дæр æвæрынц. Кардзыд адæм æмæ сывæллæтты цæуын фæхъæуы машинæты фæндагыл

ЦХИНВАЛ, 27 июл – Sputnik, Дриаты Лейла. Хуссар Ирыстоны сæйраг горæты машинæтæ дзæвгар кæй фæфылдæр сты, æмæ иуæй-иутæ сæ машинæтæ тротуартыл кæй бауромынц, уый бирæбæрцæй тыхсын кæны фистæгæй цæуджыты. Ныры дуджы бинонтæн иу машинæ фаг нал у, сæумæрайсом æмæ изæры – куыстмæ цæуын æмæ фæстæмæ здæхыны афон армыдзаг горæты машинæтæй азмæлæн нал вæййы.

Паддзахадон автоинспекцийы бæрæггæнæнтæм гæсгæ, Хуссар Ирыстоны ис 20 мин хæдтулгæйы. Уым ма банысан кодтой, фондз азы размæ республикæйы хæдтулгæты нымæц кæй уыд æрмæстдæр 12 мины.

Бирæуæладзыгон хæдзæртты кæртыты æхсæвæй-бонæй машинæтæй ахизæнтæ нæй. Суанг ма сæ тротуартыл дæр æвæрынц. Кардзыд адæм æмæ сывæллæтты цæуын фæхъæуы машинæты фæндагыл, уым та тынг тæссаг у, исты фыдбылыз куы ‘рцæуа, уымæй. Сæ машинæтæ ма сæвæрынц корпусты тæккæ бахизæнты цур дæр. Ууылты цæугæ нæ, фæлæ куыд фæзæгъынц, машинæйæ хæдзары ’хсæн, судзины фæдзæл дæр нал аласдзынæ...

Хуыцау бахизæд, фæлæ зынгсирвæзт куы æрцæуа, уæд дзы зынгхуыссынгæнæн машинæтæн бацæуæн дæр нал уаид. Афтæ тагъд медицинон æххуысы машинæ дæр.

Шофыртæ бавдæлынц æмæ сæ машинæтæ цалдæр хæдзары æддæдæр ныууадзынц. Иудзырдæй, бынат кæм ссарынц, уым.

"Зонæм æй, раст кæй нæ кæнæм, уый. Уаг халын дæр нæм нæ цæуы, кæй нын бауайдзæф кæнынц, уый дæр нæм хæрам нæ фæкæсы. Фæлæ нын æндæр гæнæн нæй – нæй нæм сæрмагонд парковкæтæ", - загъта вокзалгæрон уынджы цæрджытæй сæ иу.

Адæмæн ис, кæм не ‘мбæлы, ахæм ран æвæрд транспортон фæрæзты хицæуттыл мидхъуыддæгты хайадмæ кæнæ цæрæн бынаты администрацимæ бахъаст кæныны бар. Фæндæгты змæлд гуымирæй чи халы, уыдон се ‘ппæт дæр хъуамæ цæуой карз æфхæрд, цыфæнды стыр чиновник, стæй кæйдæр хион куы уа, уæддæр.

Инспекторы УГИБДД и участковые уполномоченные милиции борются с нарушителями правил парковки
© Photo : Пресс-служба МВД РЮО
Инспекторы УГИБДД и участковые уполномоченные милиции борются с нарушителями правил парковки

 "Дуканиты цур уæгъд бынат нал баззайы æмæ дзы машинæтæй ахизæн нал вæййы. Æдзæсгомдæр чи у, уый йæ машинæ батæры суанг фистæгæй цæуджыты фæндæгтæм дæр", - зæгъы горæты цæрæг Хъуылымбегты Галина.

Кæд Паддзахадон автоинспекцийы кусджытæ сæ цæст дарынц фæткхалджытæм, аразынц рейдтæ æмæ профилактикон мадзæлттæ, уæддæр республикæйы цæрджыты фылдæр хай не ‘ххæст кæнынц фæндæгтыл цæуыны фæткойтæ.

72
COVID-19

Хуссар Иры сбӕрӕг кодтой 37 ног рынчыны коронавирусӕй

0
(ранӕуӕггонд 16:10 20.01.2021)
Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты

ЦХИНВАЛ, 20 янв - Sputnik, Хъуылымбегты Зӕлинӕ. Хуссар Ирыстоны рынчындоны интенсивон терапийы хайады ис цыппар пациенты коронавирусимӕ, радзырдта Sputnik "Югосетпотребнадзор"-ы хистӕр Коцты Марина.

Хуссар Ирыстоны коронавирусы пандемийы райдианӕй сарӕзтой 14577 иртӕсты, уыдонӕй 2652 равдыстой тӕссаг инфекцион низы уӕвынад.

"Ивгъуыд суткӕйы сарӕзтӕуыд 132 тесты, уыдонӕй 37 адӕймагӕн разынд COVID-19", - загъта Коцты Марина.

Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты.

Сӕйраг санитарон дохтыры ныхӕстӕм гӕсгӕ, Ленингоры рынчындоны коронавирусимӕ тох кӕнынц ӕхсӕз рынчыны, Къуаисайы та - авд.

0
Фадзайты Арсен

Фадзайты Арсен Хуссар Иры уавӕры тыххӕй: цӕттӕ дӕн хайад райсын баныхасы

0
(ранӕуӕггонд 15:39 20.01.2021)
Республикӕйы къухдариуӕгады диалог оппозицон депутаттӕ ӕмӕ Дзабиты Иналы хиуӕттимӕ фӕнд кӕны ӕрнывыл кӕнын хуссарирыстойнаг политикты къорд, сӕ нымӕцы экс-президенттӕ ӕмӕ фыццаг ӕрсидты парламенты депутаттӕ

ЦХИНВАЛ, 20 янв – Sputnik, Козаты Диана. Уӕрӕсейы Федерацийы Советы уӕнг Цӕгат Ирыстонӕй Фадзайты Арсен загъта йӕ хъуыды Хуссар Ирыстоны уавӕры тыххӕй. Уый банысан кодта, республикӕйы кризис кӕй къуылымпы кӕны политикон ӕмӕ экономикон райрӕзт, афтӕ ма банхъардта йе ‘ххуыс хицауад ӕмӕ оппозицийы диалогы.

Цхинвалы 4 декабрӕй фӕстӕмӕ цӕуы Дзабиты Иналы хиуӕтты акци. Уыдон ӕвдисынц се нӕразыдзинад лӕппуйы мӕлӕты сгарӕн куысты фӕдыл ӕмӕ домынц, цӕмӕй йӕ бынатӕй ссӕрибар кӕной генералон прокурор Дзӕгъиаты Уырызмӕджы ӕмӕ бӕрндзинад хӕсса МХМ раздӕры министр Наниты Игорь.

"Ӕз никӕимӕ дзырдтон ацы уавӕрыл. Республикӕ у чысыл, мах иууылдӕр кӕрӕдзи зонӕм, ӕмӕ мӕн уырныдта, иудзинадмӕ кӕй ӕрцӕудзыстӕм. Дыууӕ экс-президенты ӕмӕ ӕндӕр фӕлтӕрд политиктӕ куы бадзырдтой къухдариуӕгадмӕ ӕмӕ куы фембӕлдысты Дзабиты Иналы бинонтимӕ, уӕд мӕнмӕ цалдӕр хатт бадзырдтой Хуссар Ирыстоны цӕрджытӕ", - загъта Фадзайты Арсен йӕ интервьюйы Sputnik-ӕн.

Йӕ ныхӕстӕм гӕсгӕ, уый куыд ирон, сенатор ӕмӕ Федерацийы Советы Къамисы уӕнг Хуссар Ирыстоны парламентимӕ ӕмгуыстады фӕдыл, йӕхи нӕ аиуварс кӕндзӕн ацы цаутӕй.

Фадзайты Арсен бахахх коджта, республикӕйы разамынад кӕй хъуамӕ ссара компромисс.

"Дзабиты Иналы бинонты зӕрдӕмӕ нӕ цӕуы фӕдагуырд куыд цӕуы, уый. Бирӕ фарстытӕ ис тыхон структурӕтӕм, фӕлӕ мӕн уырны, республикӕйы къухдариуӕгад кӕй ссардзӕн фадат рахизын ацы уавӕрӕй", - бафтыдта Фадзайты Арсен.

Уый размӕ Фадзайты Арсен ныммыхуыр кодта йӕ фарсыл Instagram-ы куырдит, цы ран бахахх кодта, цӕттӕ кӕй у хайад райсын баныхасы.

Гобозты Вячеслав ӕмӕ Цоциты Борис фехъусын кодтой Sputnik, Фадзайты Арсен нырма кӕй нӕ ныхас кодта ацы фарсты фӕдыл инициативон къорды уӕнгтимӕ.

Амӕйразмӕ хъусын кодтой, дыууӕ экс-президенты, парламенты фыццаг ӕрсидты депутаттӕ ӕмӕ Централон ӕвзарӕн къамисы (ЦӔК) фыццаг сӕргълӕууӕг сарӕзтой куырдиат, кӕцыйы банхъардтой хайад райсын хицауад ӕмӕ оппозицийы диалогы.

0