Ричард Фольц

Хуссар Иры кусынц канадæйаг ахуыргонд Ричард Фольцæн æмбæстагад раттыны фарстыл

21
(ранӕуӕггонд 12:10 14.08.2020)
Канадæйаг профессор Ричард Фольц æрцыд Ирыстонмæ, цæмæй ныффысса чиныг ирæтты тыххæй. Уый ракуырдта дзæуджыхъæуккаг чыгз Хъиргъуаты Фатимæйы æмæ йæ фæндыд цыдæр рæстæг ацæрын йæ цардæмбалы фыдыбæстæйы. Фæлæ Цæгат Иры ахуыргондæн нæ радтой рæстæгмæ цæрыны бар

ЦХИНВАЛ, 14 авг – Sputnik, Козаты Диана. Хуссар Ирыстоны къухдариуæгад бакусдзæн канадæйаг ахуыргонд-иранист, профессор Ричард Фольцæн бæстæйы æмбæстагад раттыны фарстыл, фехъусын кодта президенты пресс-секретарь Гасситы Дина.

Ирыстоны цæрджытæ фæстаг цалдæр къуырийы сæ хъус дарынц зынгæ канадæйаг ахуыргонды хъысмæтмæ. Профессор Ричард Фольц æрцыд Ирыстонмæ, цæмæй ныффысса чиныг ирæтты тыххæй. Уый ракуырдта дзæуджыхъæуккаг чыгз Хъиргъуаты Фатимæйы æмæ йæ фæндыд цыдæр рæстæг ацæрын йæ цардæмбалы фыдыбæстæйы. Фæлæ Цæгат Иры ахуыргондæн нæ радтой рæстæгмæ цæрыны бар. Уыцы хабæртты тыххæй адæм базыдтой, Фатимæ сæ Facebook йæ фарсыл кæй ныффыста, уый фæрцы.

"Ахæм куырдиат æцæгæй дæр æрбацыд президенты номыл. Ууыл кусынц æмбæлон органтæ. Ис бæлвырд процедурæ æмæ уый хъуамæ æрцæуа æххæст", - загъта Гасситы Дина.

Йæ ныхæстæм гæсгæ, хъуыддаг æвæрццагæй куы аскъуыддзаг уа, уæд ахуыргонды бахъæудзæн Хуссар Ирыстонмæ æрцæуын.

Цæгат Иры ахуыргондæн рæстæгмæ цæрыны бар кæй нæ радтой, уый тыххæй бинонты бахъуыд ацæуын республикæйæ.

21
Цхинвал

Бибылты Анатолий раарфӕ кодта Хуссар Иры банкон фадыджы кусджытӕн

2
(ранӕуӕггонд 14:36 02.12.2020)
Бузныг уын стыр профессионализм ӕмӕ уӕ куыстӕн иузӕрдыгдзинады тыххӕй, банысан икодта президент йӕ арфӕйы банкон фадыджы кусджытӕн

ЦХИНВАЛ, 2 дек — Sputnik. Хуссар Ирыстоны банкон фадыджы кусынц бӕрзонд квалификациимӕ специалисттӕ. Уыдон иудадзыг хуыздӕр кӕнынц сӕ профессионализм. Уый тыххӕй дзырдӕуы Бибылты Анатолийы арфӕйы телы банкон фадыджы кусджытӕн, кӕцытӕ абон нысан кӕнынц сӕ профессионалон бӕрӕгбон.

Бибылты Анатолий фидарӕй загъта, банкон кусджытӕ дарддӕр дӕр алцыдӕр кӕй араздзысты къабазы райрӕзтӕн, ӕнтыстджынӕй ӕххӕст кӕндзысты сӕ хӕслӕвӕрдтӕ.

Паддзахады сӕргълӕууӕджы цӕст бауарзта банкон фадыджы специалисттӕн фидар ӕнӕниздзинад, амонд ӕмӕ ног ӕнтыстытӕ сӕ Фыдыбӕстӕйы хӕрзӕбонӕн.

2
Коронавирус

Хуссар Иры сбӕрӕг кодтой коронавирусӕй 27 ног рынчыны

2
(ранӕуӕггонд 14:27 02.12.2020)
Пандемийы рӕстӕджы республикӕйы территорийыл сбӕрӕг кодтой коронавирусӕй 1904 фӕрынчынуӕвӕджы, уыдонӕй 894 сӕнӕниз сты

ЦХИНВАЛ, 27 ноя - Sputnik, Хъуылымбегты Зӕлинӕ. Хуссар Ирыстоны иу суткӕмӕ  сбӕрӕг кодтой 27 рынчыны коронавирусон инфекцийӕ, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.

"Ивгъуыд суткӕйы сарӕзтам 155 иртӕсты COVID-19-ы фӕдыл, уыдонӕй 27 радтой ӕвӕрццаг фӕстиуӕг", - загъта Гаглойты Анна.

Гаглойты Аннайы ныхӕстӕм гӕсгӕ, медикты хъусдарды бын республикӕйы медицинон уагдӕтты ис 1061 адӕймаджы.

"Ивгъуыд суткӕйы медикты хъусдардӕй систой 30 пациенты", - бафтыдта уый.

Пандемийы рӕстӕджы республикӕйы территорийыл сбӕрӕг кодтой коронавирусӕй 1904 фӕрынчынуӕвӕджы, уыдонӕй 894 сӕнӕниз сты.

Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.

2