Хуссар Иры Ахуырады министрады радзырдтой, кӕд райдайдзӕн ног ахуырадон аз

Хуссар Иры Ахуырады министрады радзырдтой, кӕд райдайдзӕн ног ахуырадон аз

17
(ранӕуӕггонд 15:34 17.08.2020)
Хуссар Ирыстоны скъолатӕ ӕмӕ астӕуккаг профессионалон ахуыргӕнӕндӕтты 5 сентябры ацӕудзысты бӕрӕгбонон линейкӕтӕ – республикӕ банысан кӕндзӕн Зонындзинӕдты бон. ХИПУ ахуыр райдайдзӕн бон раздӕр – 4 сентябры

ЦХИНВАЛ, 17 авг – Sputnik, Гӕбӕраты Элина. Хуссар Ирыстоны ахуыргӕнӕндӕтты фылдӕр хайы ахуырадон процесс райдайдзӕн 5 сентябры, фехъусын кодта Sputnik республикӕйы Ахуырады министрады пресс-секретарь Плиты Яна.

Хуссар Ирыстоны ахуырадон азы райдайӕн аргъӕвтой 1-ӕй 5-ӕм сентябрмӕ 2018 азы Беслӕны трагедийы амӕттӕгты фӕдыл фыдохы тыххӕй.

"Фӕндзӕм сентябры скъолаты ацӕудзысты бӕрӕгбонон линейкӕтӕ. Уӕд райдайдзӕн ахуыр Цхинвалы бирӕпрофилон колледж ӕмӕ медицинон ахуыргӕнӕндоны дӕр", - загъта Плиты Яна.

Бон раздӕр – 4 сентябры – райдайдзӕн ахуыр гимнази "Рухс"-ы. Афтӕ ма уыцы бон сног кӕндзысты ахуыр Хуссар Ирыстоны Паддзахадон университеты, фехъусын кодтой ахуыргӕнӕндоны пресс-службӕйы.

Плиты Яна бахахх кодта, ахуыр кӕй уыдзӕн традицион – дистанцион вариантыл нырма дзырд нӕ цӕуы.

Хуссар Ирыстоны скъолаты ахуыр фӕцис ӕмгъуыдӕй раздӕр 20 майы коронавирусы пандемийы тыххӕй. Уый размӕ дыууӕ мӕйы дӕргъы ахуыр уагътой дистанцион режимы, фӕлӕ уый нӕ уыд эффективон.

17
COVID-19

Хуссар Иры сбӕрӕг кодтой 37 ног рынчыны коронавирусӕй

0
(ранӕуӕггонд 16:10 20.01.2021)
Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты

ЦХИНВАЛ, 20 янв - Sputnik, Хъуылымбегты Зӕлинӕ. Хуссар Ирыстоны рынчындоны интенсивон терапийы хайады ис цыппар пациенты коронавирусимӕ, радзырдта Sputnik "Югосетпотребнадзор"-ы хистӕр Коцты Марина.

Хуссар Ирыстоны коронавирусы пандемийы райдианӕй сарӕзтой 14577 иртӕсты, уыдонӕй 2652 равдыстой тӕссаг инфекцион низы уӕвынад.

"Ивгъуыд суткӕйы сарӕзтӕуыд 132 тесты, уыдонӕй 37 адӕймагӕн разынд COVID-19", - загъта Коцты Марина.

Стационарон ӕмӕ амбулаторон хоскӕнынадыл республикӕйы сты 923 адӕймаджы, уыдонӕй 84 хос кӕнынц республикӕйы медицинон уагдӕтты.

Сӕйраг санитарон дохтыры ныхӕстӕм гӕсгӕ, Ленингоры рынчындоны коронавирусимӕ тох кӕнынц ӕхсӕз рынчыны, Къуаисайы та - авд.

0
Фадзайты Арсен

Фадзайты Арсен Хуссар Иры уавӕры тыххӕй: цӕттӕ дӕн хайад райсын баныхасы

0
(ранӕуӕггонд 15:39 20.01.2021)
Республикӕйы къухдариуӕгады диалог оппозицон депутаттӕ ӕмӕ Дзабиты Иналы хиуӕттимӕ фӕнд кӕны ӕрнывыл кӕнын хуссарирыстойнаг политикты къорд, сӕ нымӕцы экс-президенттӕ ӕмӕ фыццаг ӕрсидты парламенты депутаттӕ

ЦХИНВАЛ, 20 янв – Sputnik, Козаты Диана. Уӕрӕсейы Федерацийы Советы уӕнг Цӕгат Ирыстонӕй Фадзайты Арсен загъта йӕ хъуыды Хуссар Ирыстоны уавӕры тыххӕй. Уый банысан кодта, республикӕйы кризис кӕй къуылымпы кӕны политикон ӕмӕ экономикон райрӕзт, афтӕ ма банхъардта йе ‘ххуыс хицауад ӕмӕ оппозицийы диалогы.

Цхинвалы 4 декабрӕй фӕстӕмӕ цӕуы Дзабиты Иналы хиуӕтты акци. Уыдон ӕвдисынц се нӕразыдзинад лӕппуйы мӕлӕты сгарӕн куысты фӕдыл ӕмӕ домынц, цӕмӕй йӕ бынатӕй ссӕрибар кӕной генералон прокурор Дзӕгъиаты Уырызмӕджы ӕмӕ бӕрндзинад хӕсса МХМ раздӕры министр Наниты Игорь.

"Ӕз никӕимӕ дзырдтон ацы уавӕрыл. Республикӕ у чысыл, мах иууылдӕр кӕрӕдзи зонӕм, ӕмӕ мӕн уырныдта, иудзинадмӕ кӕй ӕрцӕудзыстӕм. Дыууӕ экс-президенты ӕмӕ ӕндӕр фӕлтӕрд политиктӕ куы бадзырдтой къухдариуӕгадмӕ ӕмӕ куы фембӕлдысты Дзабиты Иналы бинонтимӕ, уӕд мӕнмӕ цалдӕр хатт бадзырдтой Хуссар Ирыстоны цӕрджытӕ", - загъта Фадзайты Арсен йӕ интервьюйы Sputnik-ӕн.

Йӕ ныхӕстӕм гӕсгӕ, уый куыд ирон, сенатор ӕмӕ Федерацийы Советы Къамисы уӕнг Хуссар Ирыстоны парламентимӕ ӕмгуыстады фӕдыл, йӕхи нӕ аиуварс кӕндзӕн ацы цаутӕй.

Фадзайты Арсен бахахх коджта, республикӕйы разамынад кӕй хъуамӕ ссара компромисс.

"Дзабиты Иналы бинонты зӕрдӕмӕ нӕ цӕуы фӕдагуырд куыд цӕуы, уый. Бирӕ фарстытӕ ис тыхон структурӕтӕм, фӕлӕ мӕн уырны, республикӕйы къухдариуӕгад кӕй ссардзӕн фадат рахизын ацы уавӕрӕй", - бафтыдта Фадзайты Арсен.

Уый размӕ Фадзайты Арсен ныммыхуыр кодта йӕ фарсыл Instagram-ы куырдит, цы ран бахахх кодта, цӕттӕ кӕй у хайад райсын баныхасы.

Гобозты Вячеслав ӕмӕ Цоциты Борис фехъусын кодтой Sputnik, Фадзайты Арсен нырма кӕй нӕ ныхас кодта ацы фарсты фӕдыл инициативон къорды уӕнгтимӕ.

Амӕйразмӕ хъусын кодтой, дыууӕ экс-президенты, парламенты фыццаг ӕрсидты депутаттӕ ӕмӕ Централон ӕвзарӕн къамисы (ЦӔК) фыццаг сӕргълӕууӕг сарӕзтой куырдиат, кӕцыйы банхъардтой хайад райсын хицауад ӕмӕ оппозицийы диалогы.

0