ЦХИНВАЛ, 15 сен – Sputnik, Гæбæраты Элина. Хуссар Ирыстон æмæ Уæрæсейы хсæн паддзахадон арæныл змæлд цæуы хуымæтæг режимы – æппæт тобæтæ дæр ист æрцыдысты. ПӔК-ы Sputnik загътой, дысон æхсæвæй фæстæмæ æмбæстæгтæ сæрибарæй кæй цæуынц.
Дыууæ бæстæйы хсæн арæны сæртыл тобæтæ фæзынд 13 апрелæй, фæлæ уый адæмы алкæцы категоритæм нæ хауд. 10 маййæ арæн бынтондæр сæхгæдтой. Йæ райгуырæн бæстæмæ чи здæхт, уыдонæн æнæмæнг уыд дыууæ къуыри карантин.
Sputnik уацхæссæг бабæрæг кодта уадзæн пункт "Дæллаг Зæрæмæг". Адæм арæны сæртыл цæуынц фæстæмæ карантины агъоммæ куыд цыдысты афтæ. Уæрæсемæ чи цæуы, уыдонæн барынц сæ температурæ. Арæныл ахизынæн бирæ рæстæг нæ хъæуы – хæдтулгæтæ бирæ нæ лæууынц радты.
Хуссар Ирыстон цæрæг Алик радзырдта, рагæй йæ уыд хъуыддаг Цæгат Ирыстоны, фæлæ йæ балц æргъæвта карантины тыххæй.
"Тагъд хъавын æрыздæхынмæ, уæд та фæндаг ногæй сæхгæдтой. Æз æнхъæлдтон, ам стыр радтæ уыдзæн ,уый тыххæй ныффæстиат кодтон мæ балц", - загъта Sputnik бæлццон.
Уыимæ иумæ рейсон автобусты цыд дæр сног ис Цхинвал æмæ Дзæуджыхъæуы хсæн.
Уӕрӕсеимӕ арӕны уылты хизыныл тобӕ сӕвӕрдтой 13 апрелы ӕмӕ йӕ уый фӕстӕ цалдӕр хатт адарддӕр кодтой – фӕстаг хатт августы кӕронмӕ. Республикӕмӕ ӕрцӕуӕггӕгтӕн уыд ӕнӕмӕнг дыууӕкъуырион карантин. Фӕстӕдӕр изоляцийӕ ссӕрибар кодтой коронавирусӕй уый размӕ чи фӕрынчын, уыдоны. Уый тыххӕй уыдон хъуамӕ радтой анализтӕ Цӕгат Ирыстоны ӕмӕ бавдисой уый фӕдыл справкӕтӕ.
Хуссар Ирыстоны пандемийы рӕстӕджы сбӕрӕг кодтой коронавирусӕй 90 фӕрынчынуӕвӕджы.
