Скъола №2

Цхинвалы карантиныл сӕхгӕдтой ноджы иу скъола ӕмӕ сабидон

7
(ранӕуӕггонд 21:59 15.10.2020)
Ахуырады министрад аскъуыддзаг кодта сӕхгӕнын ноджы дыууӕ уагдоны грипп ӕмӕ КРВИ бирӕнымӕц рынчынты тыххӕй – вирус бахӕцыд сывӕллӕтты 20 процентӕй фылдӕрыл

ЦХИНВАЛ, 16 окт - Sputnik. Хуссар Ирыстоны столицӕйы сӕхгӕдтой карантиныл дыккаг горӕттаг скъола ӕмӕ фыццаг сабидон, фехъусын кодтой Sputnik ахуырады министрады пресс-службӕйы.

Раздӕр ма Цхинвалы дыууӕкъуырион карантиныл сӕхгӕдтой дыууӕ скъолайы ("Альбион" ӕмӕ Аивӕдты лицей) ӕмӕ дыууӕ сабидоны Дзау ӕмӕ Знауыры поселокты, афтӕ ма хицӕн группӕтӕ кӕцыдӕр сабидӕтты.

"Скъола №2 ӕмӕ сабидон №1 ӕхгӕд ӕрцыдысты октябры кӕрӕттӕм – ам сезонон грипп ӕмӕ КРВИ фӕрынчын сты сывӕллӕтты 20 процентӕй фылдӕр", - банысан кодтой министрады.

Хуссар Ирыстоны рӕзы сезонон вирусон инфекцитӕй фӕрынчынуӕвджыты нымӕц. Афтӕ ма фылдӕрӕй фылдӕр кӕнынц, коронавирус кӕуыл бахӕцыд, ахӕм адӕм дӕр. Уӕрӕсеимӕ арӕны баконды фӕстӕ ног рынчынты нымӕц схызт 107 адӕймаджы онг, эпидемийы райдианӕй та – 197 онг.

7
Хуссарирыстойнаг каратисттӕ рамбылдтой дыууадӕс майданы ерысты Цӕгат Иры

Хуссарирыстойнаг каратисттӕ рамбылдтой дыууадӕс майданы ерысты Цӕгат Иры

1
(ранӕуӕггонд 16:14 02.03.2021)
Каратистты тренеры ныхӕстӕм гӕсгӕ, спортсментӕ сӕхи иттӕг хорз равдыстой

ЦХИНВАЛ, 2 мар - Sputnik, Гӕбӕраты Элина. Ӕвзонг каратисттӕ Хуссар Ирыстонӕй равдыстой иттӕг хорз фӕстиуджытӕ РЦИ-Аланийы чемпионат ӕмӕ фыццагады, уыдон рамбылдтой дыууадӕс майданы, фехъусын кодта Sputnik спортсменты тренер Созайты Владимир.

Уый банысан кодта, ерысты нысан уыд сбӕрӕг кӕнын хъуыздӕр каратистты ӕмӕ саразын командӕ Уӕрӕсейы фыццагадмӕ, кӕцы ацӕудзӕн 2-5 апрелы Орелы.

"Дудайты Донна ӕмӕ Тедеты Анна рамбылдтой сыгъзӕрин майдантӕ, Тадтаты Софья ӕмӕ Джиджджойты Анна – ӕвзист майдантӕ, Гаглойты Диана райста бронзӕ", - загъта Созайты Владимир.

Тренер банысан кодта, спортсментӕ сӕхи хорз кӕй равдыстой ӕмӕ ныр бахызтысты РЦИ-Аланийы командӕмӕ.

"Афтӕ ма сӕхи хорз равдыстой дебютанттӕ дӕр: Цыбырты Анастасия ӕмӕ Лалыты Джер бацахстой фыццаг бынӕттӕ, Цыдугъты Милана ӕмӕ Куыридтаты Даниил та ацыдысты дыккаг бынӕттыл. Ортъаты хотӕ Аланӕ ӕмӕ Диана та сӕ кары къордты райстой бронзӕйон майдантӕ", - радзырдта журналисттӕн тренер.

Ӕппӕтстилон каратэйӕ ерысты цыдысты 25-27 февралы Цӕгат Ирыстоны Октябры хъӕуы.

1
Зынгфӕдисон хӕдтулгӕ

Зынгфӕдисонтӕ ахуыссын кодтой хус кӕрдӕджы ссыгъд Цхинвалы цӕгаттаг кӕрон

1
(ранӕуӕггонд 15:31 02.03.2021)
Зынгсирвӕзты фӕдыл информаци бацыд УУМ радгӕсон хайадмӕ МХМ-йӕ 13.11 сахатыл

ЦХИНВАЛ, 2 мар – Sputnik, Тъехты Дзерассӕ. Цхинвал-Дзау фӕндаджы цыппӕрӕм километрыл, раздӕры хъӕу Чъехы цур ссыгъд хус кӕрдӕг, фехъусын кодта Sputnik Хуссар Ирыстоны Уӕлвӕткон уавӕрты министрады (УУМ) радгӕсоны ӕххуысгӕнӕг Хъодалаты Руслан.

"Зынгсирвӕзт аиуварс кодтой. Архайдта дзы иу зынгфӕдисон къорд", - загъта уый.

Радгӕсоны ӕххуысгӕнӕг банысан кодта, зынгсирвӕзт ӕрцыд уӕлвӕзыл. Уый сарӕзта зындзинӕдтӕ УУМ сӕрмагонд техникӕйӕн, фӕлӕ арты фӕзуат стыр нӕ уыд, ӕмӕ йӕ уайтагъд ахуыссын кодтой.

1