Цхинвалы дзулфыцӕн комбинат

Тыхдæттæг хæлц: Цхинвалы дзулфыцӕн комбинаты директор дзулы нысаниуӕджы тыххӕй

4
(ранӕуӕггонд 15:13 16.10.2020)
Куыстуат кӕрдзын аразы советон дуджы ГОСТ-ы домӕнтӕм гӕсгӕ

ЦХИНВАЛ, 16 окт – Sputnik, Гӕбӕраты Элина. Хуссар Ирыстоны, куыд ӕппӕт дунейы, майрӕмбоны нысан кӕнынц Дзулы бон. Sputnik уацхӕссӕгимӕ ныхасы рӕстӕджы Хуссар Ирыстоны дзулфыцӕн комбинаты директор Цхуырбаты Вадим радзырдта дзулы нысаниуӕджы тыххӕй ирон традицион фынгыл, афтӕ ма ранымадта комбинаты продукцийы хуызтӕ.

Дзулы ӕппӕтдунеон бон нысан кӕнынц 16 октябры. Бӕрӕгбон сфидар кодтой 2006 азы Дзулфыцджыты Ӕхсӕнадӕмон цӕдисы хъӕппӕрисӕй. Датӕ равзӕрстой уымӕн, ӕмӕ 1945 азы 16 октябры сарӕзтӕуыд Иугонд нациты организацийы (ИНО) Хӕлцадон ӕмӕ хъӕууон хӕдзарадон организаци.

"Дзул у сӕйраг хӕлцадон продукт дунейы алкӕцы адӕмӕн дӕр. Ирон культурӕйы уымӕн ис сӕрмагонд нысаниуӕг. Алкӕцы фынгыл дӕр мах ӕвӕрӕм ӕртӕ уӕлибыхы ӕмӕ дзулӕй арӕзт алыгъуызон продукци" – радзырдта Цхуырбаты Вадим.

Куыстуат кӕрдзын аразы советон дуджы ГОСТ-ы домӕнтӕм гӕсгӕ.

Вадим Цховребов
© Sputnik / Наталья Айриян
Цхуырбаты Вадим

Заводы ныртӕккӕ уадзынц дзулы 23 хуызы ӕмӕ ӕндӕр продукци ссадӕй.

Афтӕ ма комбинаты директор банысан кодта, столицӕйы микрорайонты кӕй ӕвзарынц дзулы хицӕн хуызтӕ. Фидауынгӕнджыты уынджы районы, цы ран ис уӕрӕсейаг Арӕнгӕрон хайад, афтӕ ма 4-ӕм уӕрӕсейаг ӕфсӕддон базӕ, фылдӕр бӕрцӕй ӕлхӕнынц дӕргъвӕтин дзултӕ ӕмӕ багеттӕ.

"Хорз ӕлхӕнынц нӕ ног продукци дӕр – задын. Дзулӕй дарддӕр ма уадзӕм кондитерон продукци дӕр. Цӕмӕй кусджытӕ сӕ бынӕттӕ ма фесафой, уый фӕдыл мах рауӕрӕх кодтам кондитерон рауагъдад ӕмӕ мыздтӕ дӕр фӕфылдӕр кодтам 20 проценты", - радзырдта Цхуырбаты Вадим.

Абоны бон заводы кусынц 150 адӕймаджы.

4
Хъӕбӕр цардуагон ӕвзарӕнты пресс кӕнынӕн фӕзуат

Хуссар Иры скусдзӕн бырондоны фӕзуат

7
Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис – уый руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ

ЦХИНВАЛ, 5 мар — Sputnik, Хъуылымбегты Азӕмӕт. Хъӕбӕр цардуагон ӕвзарӕнты пресс кӕнынӕн фӕзуаты арӕзтад балхынцъ ис, фехъусын кодта Хуссар Ирыстоны арӕзтад, архитектурӕ ӕмӕ ЦКХ министрады минӕвар Къацты Сослан.

Фӕзуат ис ног быроны полигоны цур, кӕцы сарӕзтой Цхинвалы районы Ирыхъӕуы. Уым сарӕзтой ангар, кӕдӕм ласдзысты бырон, уый фӕстӕ та йӕ пресс кӕндзысты. Уый фӕдыл бӕстыхайы сӕвӕрдтой сӕрмагонд техникӕ.

Площадки для компактирования твердых коммунальных отходов (ТКО)
© Sputnik / Азамат Кулумбегов
Хъӕбӕр цардуагон ӕвзарӕнты пресс кӕнынӕн фӕзуат
"Ифтонггарз кусы. Ӕвзарӕнтӕ пресс кӕнынӕн фӕзуатимӕ полигон цӕттӕ у эксплуатацимӕ раттынмӕ. Тагъд рӕстӕджы скусдзӕн", - банысан кодта Къацты Сослан.

Полигоны территорийыл сӕвӕрдтой вагонтӕ персоналӕн, афтӕ ма дзы ауагътой электрохызӕгтӕ, йӕ бацӕуӕнты та ӕвӕрд ӕрцыд асфальт.

Арӕзтады министрады специалисттӕ куыд банысан кодтой, афтӕмӕй ацы методикӕйы руаджы зынгӕ фӕкъаддӕр уыдзӕн зианхӕссӕг ӕндӕвдад экологимӕ. Полигонӕй Присы иууыл ӕввахсдӕр цӕрӕг бӕстыхаймӕ у 2,5 километры. Йӕ эксплуатацийы ӕмгъуыд у 25 азы.

Объект арӕзт ӕрцыд инвестицион программӕйы фӕлгӕтты.

7
Хуссар Иры 2022 азмӕ сараздзысты сывӕллӕтты стационарон лагерь

Хуссар Иры 2022 азмӕ сараздзысты сывӕллӕтты стационарон лагерь

3
(ранӕуӕггонд 16:26 05.03.2021)
Сывӕллӕтты лагерь 150 бынатмӕ фӕзындзӕн республикӕйы Дзауы районы ӕмӕ кусдзӕн сезонон каникулты

ЦХИНВАЛ, 5 мар — Sputnik, Хъуылымбегты Азӕмӕт. Хуссар Ирыстоны Дзауы районы 2021 азы бавналдзысты сывӕллӕтты стационарон лагеры арӕзтадмӕ, кӕцыйы уыдзӕн 150 бынаты. Уый тыххӕй Sputnik фехъусын кодта арӕзтад, архитектурӕ ӕмӕ ЦКХ министрады минӕвар Къацты Сослан.

Лагерь уыдзӕн Дзауы районы раздӕры турбазӕ "Мзиугом"-ы территорийыл.

"Лагеры уыдзысты алы уавӕртӕ дӕр улӕфынӕн. Йӕ территорийыл сараздзысты ӕнӕмӕнгхъӕугӕ инфраструктурӕ", - банысан кодта министрады минӕвар.

Къацты Сослан бафтыдта, зӕгъгӕ, арӕзтад цӕудзӕн дыууӕ этапы ӕмӕ балхынцъ уыдзӕн 2022 азы, фӕлӕ генералон нардуатисӕджы нырма нӕ равзӕрстой.

Республикӕйы Ахуырады министрады стационарон лагеры арӕзтад нымайынц ахсджиаг къахдзӕфыл. Министрады хъомылад ӕмӕ уӕлӕмхасӕн ахуырады дӕлхайады хистӕр Джиоты Эльзайы ныхӕстӕм гӕсгӕ, республикӕйы нӕй базӕ сӕрдыгон улӕфтӕн сывӕллӕттӕн.

"Сывӕллӕттӕ раздӕр улӕфыдысты хъӕуты, ныр та афтӕ нӕу. Сабиты фылдӕр хай сӕрды баззайынц горӕты. Махӕн тынг ӕхсызгон у, кӕй нӕм фӕзындзӕн стационарон лагерь", - загъта Джиоты Эльза.

Ахуырады министрады минӕвар бахахх кодта, лагерь кӕй кусдзӕн сезонон каникулты рӕстӕджы, афтӕ ма йӕ нывӕндынц адих кӕнын фадгуытыл. Арӕзтад куыддӕр фӕуа, афтӕ Ахуырады министрады аскъуыддзаг кӕндзысты, цы фадгуытӕ дзы бакӕндзысты.

3