Гасситы Петр

Парламенты вице-спикер банысан кодта фиппаинӕгтӕ коронавирусы ныхмӕ тохы

3
(ранӕуӕггонд 14:13 21.10.2020)
Гасситы Петр йӕхӕдӕг ӕмӕ йӕ хиуӕттӕ дӕр сты коронавирусӕй рынчын. Уый фӕдыл ацы проблемӕтӕ политик банхъардта йӕхиуыл

ЦХИНВАЛ, 21 окт – Sputnik, Козаты Диана. Хуссар Ирыстоны парламенты фыццаг вице-спикер Гасситы Петр фӕрынчын коронавирусӕй, фехъусын кодта уый йӕ интервьюйы Sputnik-ӕн.

Амӕй размӕ коронавирус сбӕрӕг кодтой президенты пресс-секретарь Гасситы Динайӕн ӕмӕ администрацийы цалдӕр уӕнгӕн. Уый фӕстӕ коронавирусӕй фӕрынчын ис паддзахады сӕргълӕууӕг Бибылты Анатолий ӕмӕ премьер-министры хӕстӕ ӕххӕстгӕнӕг Бекъойты Геннадий.

Парламенты профилактикӕйы мадзӕлтты тыххӕй вице-спикер банысан кодта, куыд иннӕ уагдӕтты, афтӕ парламентмӕ бахизӕны дӕр ис дезинфекцион фӕрӕзтӕ, фӕлӕ уый бирӕ не ‘ххуыс кӕны инфекцийы ныхмӕ тохы.

"Махмӕ республикӕйы маскӕты режим дӕр нӕ бакодтой, ӕмӕ уый тыххӕй дӕр коронавирус парахат кӕндзӕн. Фӕнды мӕ банысан кӕнын, медицинон уагдӕттӕ ӕмбӕлон ӕгъдауӕй кӕй нӕ ифтонг кӕнынц медикаменттӕй. Ӕз уый мӕхиуыл банхъардтон. Мӕ хӕстӕг, кӕцы ис рынчындоны, цалдӕр хатт ӕлхӕдта медикаменттӕ Дзӕуджыхъӕуы", - загъта вице-спикер.

Афтӕ ма Гасситы Петр радзырдта тагъд ӕххуысы кусджыты тыххӕй дӕр, кӕцытӕ ӕрвыл суткӕ цӕуынц рынчынтӕм.

"Тагъд ӕххуысы дохтыртӕ цӕуынц рынчынӕй рынчынмӕ, ӕмӕ сын уый тыххӕй дзурын стыр бузныг. Ӕмӕ сыл уыцы рӕстӕджы вӕййы маскӕтӕ ӕмӕ ӕрмкъухтӕ, кӕцытӕ, сӕхи ныхӕстӕм гӕсгӕ, цалдӕр хатт ныхсынц. Уый раст нӕу. Нӕ ӕнӕниздзинад хъахъхъӕнынады министрад хъуамӕ йӕ хъус уымӕ ӕрдара", - бафтыдта Гасситы Петр.

Хуссар Ирыстоны Уӕрӕсеимӕ арӕны баконды фӕстӕ сбӕрӕг кодтой 215 рынчыны коронавирусӕй, пандемийы райдайӕнӕй та 305 рынчыны.

3
Ногазон Цхинвал

Куыд банысан кӕндзӕн Хуссар Ир Ног аз пандемийы уавӕрты

3
(ранӕуӕггонд 10:26 27.11.2020)
Коронавирусы пандемийы фӕдыл арӕнӕвӕрдтӕ республикӕйы адарддӕр кодтой 15 декабры онг. Фӕлӕ ӕрӕввахс кӕнынц ногазон бӕрӕгбонтӕ, кӕцытыл алыхатт дӕр ӕмбӕлдысты хъӕлдзӕгӕй ӕмӕ уӕрӕхӕй. Куыд сӕмбӕлдзысты ахӕм уавӕрты 2021 азыл Хуссар Ирыстоны?

ЦХИНВАЛ, 27 ноя - Sputnik, Техты Дзерассӕ. Хуссар Ирыстоны культурӕйы министры хӕстӕ ӕххӕстгӕнӕг Зассеты Жанна радзырдта Sputnik, цавӕр ногазон мадзӕлттӕ ауадздзысты республикӕйы, коронавирусы пандемийы фӕдыл арӕнӕвӕрдтӕ хынцгӕйӕ.

"Республикӕйы 15 декабры онг тобӕгонд сты культурон-хиирхӕфсӕн мадзӕлттӕ. Фӕлӕ оперштаб куы аскъуыддзаг кӕна каратнин мауал адарддӕр кӕнын, уӕд мах цӕттӕ стӕм. Куыд фӕндыйӕ дӕр бакӕндзыстӕм горӕты наз бӕлас ӕмӕ ауадздзыстӕм чысыл хиирхӕфсӕн мадзӕлттӕ, фӕлӕ уыдонӕн нӕ уыдзӕн массон характер", - загъта министрады сӕргълӕууӕг.

Фӕсивӕдон политикӕ ӕмӕ спорты комитеты сӕргълӕууӕджы хӕдивӕг Гатыгкоты Валентина куыд фехъусын кодта, афтӕмӕй та ацы аз дӕр нывӕзты ис "Афӕдзы ӕвзонг адӕймаг"-ы схорзӕх кӕныны церемони ауадзын, фӕлӕ пандемийы тыххӕй дырыс датӕ нырма бӕрӕг нӕу.

Куыд банысан кӕндзысты районтӕ?

Цхинвалы районы сӕргълӕууӕг Мамытаты Вахтангы ныхӕстӕм гӕсгӕ, бӕрӕгбонон мадзӕлттӕ ацы аз ацӕудзысты минималон программӕмӕ гӕсгӕ – сабидӕтты ӕмӕ скъолаты байуардзысты ногазон лӕвӕрттӕ.

Ленингоры районы хистӕр Мамытаты Виталий дӕр фехъусын кодта  Sputnik, зӕгъгӕ, кӕд арӕнӕвӕрдтӕ ист ӕрцӕуой, уӕд ногазон бӕрӕгбӕттӕ ацӕудзысты иннӕ ӕзты хуызӕн. Ацы аз балхӕдтой ног аппаратурӕ ӕмӕ ифтонгад, гирляндӕтӕ.

 Дзауы районы пандемийы уавӕрты ӕрмӕстдӕр бӕрӕгбонон фӕлынд скӕндзысты поселочы.

"Кӕд ӕмӕ карантин аивай, уӕд та мадзӕлттӕ ацӕудзысты куыд ӕмбӕлы, афтӕ", - загъта районы сӕргълӕууӕг Джиоты Андрей.

Хуссар Ирыстоны 15 декабры онг ис арӕнӕвӕрдтӕ, ӕхгӕд сты ахуырадон уагдӕттӕ райдиан скъолайӕ дарддӕр, тобӕгонд сты массон мадзӕлттӕ.

3
Хореографион ансамбль Зилахар

Хуссарирыстойнаг кафты ансамбль рамбылдта онлайн-конкурсы Турчы

6
(ранӕуӕггонд 16:29 26.11.2020)
Ансамблы архайджытӕ сӕххӕст кодтой ӕмӕ видеойыл ныффыстой "Хӕххон кафт", кӕцыйӕн аккаг аргъ скодта конкурсы жюри

ЦХИНВАЛ, 26 ноя - Sputnik, Хъуылымбегты Зӕлинӕ. Цхинвалы 1-аг скъолайы ансамбль "Зилахар" рамбылдта Курдиӕтты ӕхсӕнадӕмон конкурс "Времена года"-йы гран-при, кӕцы цыд онлайн-форматы Турчы. Ансамблы аивадон къухдариуӕггӕнджытӕй иу Тедеты Ацӕмӕз куыд радзырдта Sputnik, афтӕмӕй коллективы банысан кодтой номинаци "Кавказаг кафт"-ы.

"Махӕн фехъусын кодтой, Стамбулы кӕй ацӕудзӕн фестиваль ӕмӕ организаторты кӕй фӕнды, цӕмӕй дзы мах хайад райсӕм. Мах стыхстыстӕм, уымӕн ӕмӕ нӕ бон нӕ уыд сисын гъӕдджын видео, фӕлӕ нӕ ӕрсабыр кодтой, зӕгъгӕ, видеойы гъӕдӕн нӕ аргъ кӕндзысты, фӕлӕ коллектив кафт куыд арӕхстджынӕй сӕххӕст кӕндзысты, уымӕн", - загъта Ацӕмӕз.

Цыбыр ӕмгъуыдмӕ уыдон видео систой ӕмӕ йӕ арвыстой.

"Ӕнӕрхъӕцӕй ӕнхъӕлмӕ кастыстӕм нӕ ралӕуды фӕстиуӕгмӕ ӕмӕ дзы нӕ зӕрдӕ барухс", - банысан кодта къорды аивадон къухдариуӕггӕнӕг.

Конкурсы, Ацӕмӕзы ныхӕстӕм гӕсгӕ, хайад райстой 300 коллективы.

Ансамбль"Зилахар"-ы сконды ис 45 адӕймаджы, уыдон сты 9-14 азы кары. Хӕххон кафт сӕвӕрыны ма хайад райста Коцты Сергей, кӕцы у къорды аннӕ аивадон къухдариуӕггӕнӕг ӕмӕ сӕйраг балетмейстер.

6