Хуссар Иры ногӕй бакодтой дистанцион ахуыр

Хуссар Иры ногӕй бакодтой дистанцион ахуыр

8
(ранӕуӕггонд 15:13 23.10.2020)
Хуссар Ирыстоны скъолатӕ 21 октябрӕй сӕхгӕдтой дыууӕкъуырион карантиныл сезонон грипп ӕмӕ КРВИ-йы рынчынты нымӕцы фӕфылдӕры тыххӕй, афтӕ ма коронавирусы пандемийы тыххӕй дӕр

ЦХИНВАЛ, 23 окт — Sputnik, Козаты Диана. Хуссар Ирыстоны ахуыргӕнӕндӕтты карантины рӕстӕджы ногӕй бакодтой дистанцион ахуыр. Ахуырады министрады дӕлхайады хистӕр Джиоты Нинайы ныхӕстӕм гӕсгӕ, ахуыргӕнджытӕ спайда кодтой ивгъуыд фӕлтӕрддзинадӕй ӕмӕ равзӕрстой ахуырады оптималон формӕ.

Хуссар Ирыстоны скъолатӕ 21 октябрӕй сӕхгӕдтой дыууӕкъуырион карантиныл  сезонон грипп ӕмӕ КРВИ-йы рынчынты нымӕцы фӕфылдӕры тыххӕй, афтӕ ма коронавирусы пандемийы тыххӕй дӕр. Ахуыры азы фыццаг хай фӕуыдзысты дистанцион формӕйы, 2-8 ноябры та скъоладзаутӕн уыдзысты фӕззыгон каникулты.

"Скъолатӕ ракодтам дистанцион ахырмӕ. Раздӕры фӕлтӕрддзинад нын баххуыс кодта. Мах ауагътам квалификаци фӕбӕрзонддӕр кӕныны курсытӕ. Мӕ хъуыдымӕ гӕсгӕ, мах равзӕрстам ахуырады оптималон формӕ. Кӕстӕр кълӕсты сывӕллӕттимӕ зындӕр уыдзӕн, фӕлӕ ам та хъуамӕ ӕххуыс кӕной ныййарджытӕ", - загъта Джиоты Нина.

Скъолатӕй дарддӕр республикӕйы сӕхгӕдтой цалдӕр сабидоны дӕр.

"Мах ӕнхъӕлмӕ кӕсӕм сӕйраг санитарон дохтыры уынаффӕмӕ. Уыдон ӕрвылбон сӕ цӕст дарынц сабидӕтты уавӕрмӕ. Мӕ хъуыдымӕ гӕсгӕ, раст нӕу сӕхгӕнын сабидӕттӕ иууылдӕр, кӕд ӕмӕ дзы коронавирусӕй рынчынты не сбӕрӕг кӕной", - бафтыдта Джиоты Нина.

Коронавирусимӕ уавӕр республикӕйы февзӕрдӕр Уӕрӕсеимӕ арӕн фондзмӕйон карантины фӕстӕ куы бакодтой, уӕд. Уӕдӕй фӕстӕмӕ республикӕйы коронавирусӕй фӕрынчын сты 277 адӕймаджы, пандемийы райдайӕнӕй та 367.

8
Хуссар Иры МСНК сбӕрӕг кодтой иууыл тыхджындӕр кусджыты

Хуссар Иры МСНК сбӕрӕг кодтой иууыл тыхджындӕр кусджыты

2
(ранӕуӕггонд 15:32 03.03.2021)
Къорды дӕлхайӕдты хсӕн ӕрвылазон ерысты рӕстӕджы равзӕрстой иууыл цӕттӕдӕр хӕстонты - уыдон сӕ фӕразондзинады ӕвдыстой цалдӕр спортивон дисциплинӕйӕ

ЦХИНВАЛ, 3 мар - Sputnik. Хуссар Иры Гӕззаты Вадимы номыл милицийы сӕрмагонд нысаниуӕджы къорды сбӕрӕг кодтой физикон ӕгъдауӕй иууыл цӕттӕдӕр кусджыты. Ерыстӕ ӕрӕмных кодтой къорды сырӕзты 29-ӕм афӕдзыбонмӕ, хъусын кӕны МХМ пресс-службӕ.

Уӕлахиздзауты бӕрӕг кодтой куыд командон, афтӕ хисӕрмагонд бахыгъды дӕр.

"Командон бахыгъды фыццаг бынатмӕ рахызт 1-аг оперативон ротӕ, дыккаг бынат бацахста 2-аг оперативон ротӕ, ӕртыккаг бынат та бацис 3-аг оперротӕйы", - дзырдӕуы уагдоны хъусинаджы.

Афтӕ ма ацыдысты ерыстӕ хисӕрмагонд бахыгъды дӕр цалдӕр спортивон дисциплинӕйӕ ӕмӕ цыппар уӕзы категорийы.

Милицийы сӕрмагонд нысаниуӕджы къорды дӕлхайӕдты хсӕн ерыстӕ уагъд фӕцӕуынц ӕрвылаз дӕр спорты хуызтӕ парахат кӕнын ӕмӕ хисӕрмагонд сконды профессионалон цӕттӕдзинад фӕбӕрзонддӕр кӕныны нысанӕн.

2
8 март

Литературон изӕртӕ ӕмӕ концерттӕ: Хуссар Иры банысан кӕндзысты сылгоймӕгты бӕрӕгбон

1
(ранӕуӕггонд 15:31 03.03.2021)
8 мартмӕ республикӕмӕ ӕрцӕудзӕн театр ӕмӕ кинойы популярон уӕрӕсейаг актер, Хуссар Ирыстоны сгуыхт артист Эвклид Кюрдзидзис

ЦХИНВАЛ, 2 мар – Sputnik, Козаты Диана. Сылгоймӕгты ӕхсӕнадӕмон бон Хуссар Ирыстоны банысан кӕндзысты литературон изӕртӕ ӕмӕ бӕрӕгбонон концерттӕй.

Сӕйраг мадзӕлттӕ ацӕудзысты майрӕмбоны. 8 март республикӕйы у улӕфт бон.

 

"Майрӕмбоны, 5 марты Къостайы ӕмӕ Громы хъӕуты ацӕудзысты литературон изӕртӕ бӕрӕгбоны цытӕн. Уыцы бон ма Цхинвалы уагъд ӕрцӕудзӕн цытджын ӕмбырд ӕмӕ концерт", - фехъусын кодтой культурӕйы министрады.

 

8 мартмӕ республикӕмӕ ӕрцӕудзӕн театр ӕмӕ кинойы популярон уӕрӕсейаг актер, Хуссар Ирыстоны сгуыхт артист Эвклид Кюрдзидзис. Цхинвалы уый ратдзӕн концерт-импровизаци "Дӕуӕн".

Актер фыццаг хатт не рцӕудзӕн Хуссар Ирыстонмӕ - уый ма ам уыд 2008 азы гуырдзиаг-ирон хӕсты фӕстӕ. Республикӕй Сгъуыхт артисты номӕй дӕр ын уӕд скад кодтой.

1