Кислородон маскӕ

Хуссар Иры ӕмбырд кӕнынц ӕхца туаггуыры цех балхӕнынӕн

359
(ранӕуӕггонд 11:45 29.10.2020)
Туаггуыры рауагъдады станц Хуссар Иры йӕ куыст ӕрурӕдта 2008 азы. Уӕдӕй фӕстӕмӕ медицинӕйы ӕнӕмӕнгхъӕуӕг ӕрмӕг ласт цыд фӕсарӕнтӕй

ЦХИНВАЛ, 29 окт — Sputnik, Плиты Фатимӕ. Хуссар Ирыстоны расидтысты акции медицинон туаггуыры рауагъдады цех самал кӕныны фӕдыл фӕрӕзтӕ ӕмбырд кӕнынӕн. Республикӕйы хӕрдзтыл цы станц аххӕсса, уымӕн йӕ аргъ лӕууы дӕс милуан соммӕ ӕввахс, фехъусын кодта Sputnik акци расидӕг, ӕхсӕнадон архайӕг Бететы Юрий.

Туаггуыры рауагъдады станц Хуссар Иры йӕ куыст ӕрурӕдта 2008 азы. Уӕдӕй фӕстӕмӕ медицинӕйы ӕнӕмӕнгхъӕуӕг ӕрмӕг ласт цыд фӕсарӕнтӕй. Коронавирусы апарахаты дуджы туаггуыр ссис ӕнӕмӕнгхъӕуӕг, проблемӕ карз кӕнынц Хуссар Ирыстоны ӕмӕ Уӕрӕсейы хсӕн арӕны сӕртыл уӕзтӕ ласыны зындзинӕдтӕ.

"Тӕссаг у, зымӕджы Транскам куы ӕрӕхгӕна ӕмӕ куы аззайӕм COVID-19-имӕ иунӕгӕй. Уый тыххӕй срӕвдз кодтам ӕхцайы фӕрӕзты ӕмбырд. Цыппӕрӕмы райдыдтам акци, адӕм дзурынц, фӕнды сӕ баххуыс кӕнын. Иу адӕймагӕн уый бӕрц фӕрӕзтӕ самал кӕнын зын у, фӕлӕ иууыл иумӕ ӕнцондӕр уыдзӕн хъуыддаг аскъуыдзаг кӕнын", - загъта уый.

Бететы Юрийы ныхӕстӕм гӕсгӕ, ацы проблемæ алыг кæныныл архайдта ӕнӕниздзинад хъахъхъӕнынады министрад дӕр 2020 азы майы, фӕлӕ фӕрӕзты цухдзинад фӕкъуыхцы кодтой хъуыддаг.

"Ныридӕгӕн республикӕйы суткæйы хъӕуы 60 баллоны туаггуыр. Мах нӕ цӕст цы цехыл ӕрӕвӕрдам, уый дӕтты 90. Дырыс аргъ нырма нӕ зонӕм, фӕлӕ 10 милуанӕй къаддӕр нӕ уыдзӕн. Цех комкоммӕ ифтонг кӕндзӕн сывӕллӕты рынчындон туаггуырӕй", - бафтыдта уый.

Ныридӕгӕн туаггуыр ласт цӕуы Хъӕрӕсе-Черкесы республикӕйӕ. Бететы Юрий ныхӕстӕм гӕсгӕ, цехы куыст сцайдагъ кӕнынӕн хъӕуы ӕртӕ мӕйы бӕрц. 

Уый ма фехьусын кодта хыгъд (Сбербанк 4276600052481658), кӕцымӕ хъӕуы рвитын фæрæзтæ, ӕххуысгӕнджыты номхыгъд сӕхи разыдзинадӕй цӕудзӕн мыхуыр.

359
Коронавирус

Югосетпотребнадзоры фехъусын кодтой ног бӕрӕггӕнӕнтӕ коронавирусы фӕдыл

2
(ранӕуӕггонд 15:40 03.12.2020)
Абоны бон медикты хъусдарды бын сты 1002 адӕймаджы COVID-19 диагнозимӕ

ЦХИНВАЛ, 3 дек - Sputnik, Хъуылымбегты Зӕлинӕ. Хуссар Ирыстоны ивгъуыд суткӕйы сбӕрӕг кодтой коронавирусӕй 35 ног рынчыны, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.

"Ивгъуыд суткӕйы дӕргъы сарӕзтой 159 басгӕрсты, уыдонӕй 35 радтой ӕвӕрццаг фӕстиуӕг", - загъта Гаглойты Анна.

Афтӕ ма уый бафтыдта, зӕгъгӕ, иу суткӕмӕ медикты хыгъдӕй систой 35 адӕймаджы, дохтырты хъусдарды бын ма сты 1002 адӕймаджы.

Гаглойты Аннайы ныхӕстӕм гӕсгӕ, ӕдӕппӕт Хуссар Ирыстоны коронавирусӕй фӕрынчын сты 1846 адӕймаджы, уыдонӕй сӕнӕниз сты 844 адӕймаджы.

Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.

2
Цхинвалы сӕвӕрдтой Юрий Гагарины цырт йӕ номыл скъолайы кӕрты

Цхинвалы сӕвӕрдтой Юрий Гагарины цырт йӕ номыл скъолайы кӕрты

2
(ранӕуӕггонд 15:00 03.12.2020)
Дыууадӕсӕм астӕуккаг скъолайӕн Юрий Гагарины ном раттыны фӕдыл скъуыддзаг рахастой 1972 азы

ЦХИНВАЛ, 3 дек - Sputnik, Хъуылымбегты Зӕлинӕ. Цхинвалы дыууадӕсӕм скъолайы кӕрты сӕвӕрдтой цырт советон тӕхӕг-космонавт Юрий Гагаринӕн, радзырдта Sputnik ахуырадон уагдоны директор Ӕрсойты Геннадий.

"Цырт сӕвӕрдтой мӕйы размӕ скъолайы территорийыл, централон бахизӕны раз", - загъта директор.

Йӕ ныхӕстӕм гӕсгӕ, сывӕллӕтты тынг цымыдис кӕны ацы цырт.

"Ӕз фарстон кӕстӕркъласонты, цы федтой ногӕй скъолайы карантины фӕстӕ, сывӕллӕттӕ уайтагъд дзуапп кодтой, уый кӕй у Юрий Гагарины цырт, кӕцыйы ном хӕссы нӕ скъола. Мӕнӕн тынг ӕхсызгон уыд, сывӕллӕттӕ уый кӕй зонынц", - бафтыдта Ӕрсойты Геннадий.

Цырты сӕвӕрынӕн скъолайы къухдариуӕгадӕн баххуыс кодта горӕты администраци.

"Нӕ фарстимӕ мах бадзырдтам горӕты администрацимӕ, сӕйраджыдӕр, администрацийы кусӕг Козаты Аланмӕ, кӕцы нын баххуыс кодта. Уый йӕхимӕ райста цырт ныззаказ кӕнын, ӕрласын ӕмӕ йӕ сӕвӕрыны фарстытӕ", - бафтыдта уый.

1972 азы Хуссар Ирыстоны комсомолы обкомы скъуыддзагӕй дыууадӕсӕм скъолайӕн радтой Юрий Гагарины ном.

2