Цхинвалы рынчындон

Республикон бирӕпрофилон медцентры фехъусын кодтой коронавирусӕй фӕмардуӕвджыты нымӕц

7
(ранӕуӕггонд 14:53 29.10.2020)
Медиктӕ фӕмардуӕвджытӕн алкӕмӕндӕр сбӕрӕг кодтой вирусон пневмони, афтӕмӕй уыдоны тесттӕ коронавирусы фӕдыл гӕнӕн ис уыдаиккой ӕппӕрццаг, банысан кодта центры сӕйраг дохтыр

ЦХИНВАЛ, 29 окт – Sputnik, Козаты Диана. Хуссар Ирыстоны коронавирус ӕмӕ йӕ аххосагӕй низты фӕстиуӕгӕн амардысты фараст адӕймаджы, фехъусын кодта республикон бирӕпрофилон медицинон центры сӕйраг дохтыр Быценты Индира.

Коронавирусӕй фыццаг адӕймаг амард октябры ӕмбисы. Уый фӕстӕ хъусын кодтой ноджы фондз фӕмардуӕвӕджы тыххӕй.

"Абоны бон, республикон бирӕпрофилон медицинон центры бӕрӕггӕнӕнтӕм гӕсгӕ, коронавирусы аххосагӕй низты фӕстиуӕгӕн амардысты фараст адӕймаджы. Афтӕмӕй тестты фӕстиуджытӕ гӕнӕн ис уой ӕппӕрццаг. Уыдонӕн алкӕмӕндӕр уыд дыууӕварсон пневмони", - загъта медцентры сӕйраг дохтыр.

Йӕ ныхӕстӕм гӕсгӕ, фӕмардуӕвджытӕн ма ноджы кӕй уыд ӕндӕр низтӕ дӕр.

"Нӕ йӕ зонын, ӕндӕр бӕрӕггӕнӕнтӕ дзы кӕцӕй фӕзынд. Мах ӕрвыл райсом бадӕттӕм цифрӕтӕ Ӕнӕниздзинад хъахъхъӕнынады министрадмӕ", - бафтыдта Быценты Индира.

Пандемийы райдайӕнӕй республикӕйы коронавирусӕй ӕдӕппӕт фӕрынчын сты 768 адӕймаджы, уыдонӕй 678 – 15 сентябры Уӕрӕсеимӕ арӕны баконды фӕстӕ

7
Коронавирус

Югосетпотребнадзоры фехъусын кодтой ног бӕрӕггӕнӕнтӕ коронавирусы фӕдыл

2
(ранӕуӕггонд 15:40 03.12.2020)
Абоны бон медикты хъусдарды бын сты 1002 адӕймаджы COVID-19 диагнозимӕ

ЦХИНВАЛ, 3 дек - Sputnik, Хъуылымбегты Зӕлинӕ. Хуссар Ирыстоны ивгъуыд суткӕйы сбӕрӕг кодтой коронавирусӕй 35 ног рынчыны, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.

"Ивгъуыд суткӕйы дӕргъы сарӕзтой 159 басгӕрсты, уыдонӕй 35 радтой ӕвӕрццаг фӕстиуӕг", - загъта Гаглойты Анна.

Афтӕ ма уый бафтыдта, зӕгъгӕ, иу суткӕмӕ медикты хыгъдӕй систой 35 адӕймаджы, дохтырты хъусдарды бын ма сты 1002 адӕймаджы.

Гаглойты Аннайы ныхӕстӕм гӕсгӕ, ӕдӕппӕт Хуссар Ирыстоны коронавирусӕй фӕрынчын сты 1846 адӕймаджы, уыдонӕй сӕнӕниз сты 844 адӕймаджы.

Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.

2
Цхинвалы сӕвӕрдтой Юрий Гагарины цырт йӕ номыл скъолайы кӕрты

Цхинвалы сӕвӕрдтой Юрий Гагарины цырт йӕ номыл скъолайы кӕрты

2
(ранӕуӕггонд 15:00 03.12.2020)
Дыууадӕсӕм астӕуккаг скъолайӕн Юрий Гагарины ном раттыны фӕдыл скъуыддзаг рахастой 1972 азы

ЦХИНВАЛ, 3 дек - Sputnik, Хъуылымбегты Зӕлинӕ. Цхинвалы дыууадӕсӕм скъолайы кӕрты сӕвӕрдтой цырт советон тӕхӕг-космонавт Юрий Гагаринӕн, радзырдта Sputnik ахуырадон уагдоны директор Ӕрсойты Геннадий.

"Цырт сӕвӕрдтой мӕйы размӕ скъолайы территорийыл, централон бахизӕны раз", - загъта директор.

Йӕ ныхӕстӕм гӕсгӕ, сывӕллӕтты тынг цымыдис кӕны ацы цырт.

"Ӕз фарстон кӕстӕркъласонты, цы федтой ногӕй скъолайы карантины фӕстӕ, сывӕллӕттӕ уайтагъд дзуапп кодтой, уый кӕй у Юрий Гагарины цырт, кӕцыйы ном хӕссы нӕ скъола. Мӕнӕн тынг ӕхсызгон уыд, сывӕллӕттӕ уый кӕй зонынц", - бафтыдта Ӕрсойты Геннадий.

Цырты сӕвӕрынӕн скъолайы къухдариуӕгадӕн баххуыс кодта горӕты администраци.

"Нӕ фарстимӕ мах бадзырдтам горӕты администрацимӕ, сӕйраджыдӕр, администрацийы кусӕг Козаты Аланмӕ, кӕцы нын баххуыс кодта. Уый йӕхимӕ райста цырт ныззаказ кӕнын, ӕрласын ӕмӕ йӕ сӕвӕрыны фарстытӕ", - бафтыдта уый.

1972 азы Хуссар Ирыстоны комсомолы обкомы скъуыддзагӕй дыууадӕсӕм скъолайӕн радтой Юрий Гагарины ном.

2