Коронавирус

Хуссар Ирыстоны иу суткӕмӕ коронавирус сбӕрӕг кодтой 63 адӕймагӕн

7
(ранӕуӕггонд 13:51 04.11.2020)
Пандемийы райдайӕнӕй коронавирусӕй фӕрынчын сты 1141 адӕймаджы, уыдонӕй 1051 – Уӕрӕсеимӕ арӕны баконды фӕстӕ

ЦХИНВАЛ, 4 ноя – Sputnik, Козаты Диана. Хуссар Ирыстоны иу суткӕмӕ коронавирус сбӕрӕг кодтой 63 адӕймагӕн. Уӕрӕсеимӕ арӕны баконды фӕстӕ республикӕйы COVID-19-ӕй фӕрынчын сты 1051 адӕймаджы, фехъусын кодта Sputnik сӕйраг санитарон дохтыр Коцты Марина.

Коронавирусы пандемийы райдайӕнӕй республикӕйы сарӕзтой аст мин басгӕрстӕй фылдӕр.

"167 тестӕй ӕвӕрццаг фӕстиуӕг радтой 63 басгӕрсты", - загъта Коцты Марина.

Республикӕйы медицинон уагдӕтты хоскӕнынад цӕуынц 231 рынчыны, уыдонӕй 38 – районон рынчындӕтты, аннӕтӕ та Цхинвалы РБМЦ инфекцион ӕмӕ сывӕллӕтты хайады.

"Коронавирусӕй сӕнӕниз сты 83 адӕймаджы, уыдонӕй 11 систой хыгъдӕй ивгъуыд суткӕйы. Ныртӕккӕ медикты хыгъды сты 968 рынчыны. Бирӕ адӕм ӕнхъӕлмӕ кӕсынц дыккаджы тестты фӕстиуджытӕм, мӕ хъуыдымӕ гӕсгӕ, уыдонӕй бирӕты сисдзысты хыгъдӕй ӕмӕ сӕ рафысдзысты стационартӕй", - бафтдыта Коцты Марина.

Хуссар Ирыстоны коронавирусӕй рынчынты нымӕц фылдӕр кӕнын райдыдта 15 сентябры Уӕрӕсеимӕ арӕны баконды фӕстӕ. Уый размӕ республикӕмӕ ӕрцӕуӕггӕгтӕ иууылдӕр хъуамӕ рацыдаиккой ӕнӕмӕнг дыууӕкъуырион карантин. Ацы мадзалы руаджы Хуссар Ирыстоны фондз мӕймӕ сбӕрӕг кодтой ӕрмӕстдӕр 90 рынчыны коронавирусӕй. Карантины фӕстӕ республикӕйы сбӕрӕг кодтой коронавирусӕй иу мин рынчынӕй фылдӕр, 14 адӕймаджы амардысты.

7
Ногазон Цхинвал

Куыд банысан кӕндзӕн Хуссар Ир Ног аз пандемийы уавӕрты

5
(ранӕуӕггонд 10:26 27.11.2020)
Коронавирусы пандемийы фӕдыл арӕнӕвӕрдтӕ республикӕйы адарддӕр кодтой 15 декабры онг. Фӕлӕ ӕрӕввахс кӕнынц ногазон бӕрӕгбонтӕ, кӕцытыл алыхатт дӕр ӕмбӕлдысты хъӕлдзӕгӕй ӕмӕ уӕрӕхӕй. Куыд сӕмбӕлдзысты ахӕм уавӕрты 2021 азыл Хуссар Ирыстоны?

ЦХИНВАЛ, 27 ноя - Sputnik, Техты Дзерассӕ. Хуссар Ирыстоны культурӕйы министры хӕстӕ ӕххӕстгӕнӕг Зассеты Жанна радзырдта Sputnik, цавӕр ногазон мадзӕлттӕ ауадздзысты республикӕйы, коронавирусы пандемийы фӕдыл арӕнӕвӕрдтӕ хынцгӕйӕ.

"Республикӕйы 15 декабры онг тобӕгонд сты культурон-хиирхӕфсӕн мадзӕлттӕ. Фӕлӕ оперштаб куы аскъуыддзаг кӕна каратнин мауал адарддӕр кӕнын, уӕд мах цӕттӕ стӕм. Куыд фӕндыйӕ дӕр бакӕндзыстӕм горӕты наз бӕлас ӕмӕ ауадздзыстӕм чысыл хиирхӕфсӕн мадзӕлттӕ, фӕлӕ уыдонӕн нӕ уыдзӕн массон характер", - загъта министрады сӕргълӕууӕг.

Фӕсивӕдон политикӕ ӕмӕ спорты комитеты сӕргълӕууӕджы хӕдивӕг Гатыгкоты Валентина куыд фехъусын кодта, афтӕмӕй та ацы аз дӕр нывӕзты ис "Афӕдзы ӕвзонг адӕймаг"-ы схорзӕх кӕныны церемони ауадзын, фӕлӕ пандемийы тыххӕй дырыс датӕ нырма бӕрӕг нӕу.

Куыд банысан кӕндзысты районтӕ?

Цхинвалы районы сӕргълӕууӕг Мамытаты Вахтангы ныхӕстӕм гӕсгӕ, бӕрӕгбонон мадзӕлттӕ ацы аз ацӕудзысты минималон программӕмӕ гӕсгӕ – сабидӕтты ӕмӕ скъолаты байуардзысты ногазон лӕвӕрттӕ.

Ленингоры районы хистӕр Мамытаты Виталий дӕр фехъусын кодта  Sputnik, зӕгъгӕ, кӕд арӕнӕвӕрдтӕ ист ӕрцӕуой, уӕд ногазон бӕрӕгбӕттӕ ацӕудзысты иннӕ ӕзты хуызӕн. Ацы аз балхӕдтой ног аппаратурӕ ӕмӕ ифтонгад, гирляндӕтӕ.

 Дзауы районы пандемийы уавӕрты ӕрмӕстдӕр бӕрӕгбонон фӕлынд скӕндзысты поселочы.

"Кӕд ӕмӕ карантин аивай, уӕд та мадзӕлттӕ ацӕудзысты куыд ӕмбӕлы, афтӕ", - загъта районы сӕргълӕууӕг Джиоты Андрей.

Хуссар Ирыстоны 15 декабры онг ис арӕнӕвӕрдтӕ, ӕхгӕд сты ахуырадон уагдӕттӕ райдиан скъолайӕ дарддӕр, тобӕгонд сты массон мадзӕлттӕ.

5
Хореографион ансамбль Зилахар

Хуссарирыстойнаг кафты ансамбль рамбылдта онлайн-конкурсы Турчы

7
(ранӕуӕггонд 16:29 26.11.2020)
Ансамблы архайджытӕ сӕххӕст кодтой ӕмӕ видеойыл ныффыстой "Хӕххон кафт", кӕцыйӕн аккаг аргъ скодта конкурсы жюри

ЦХИНВАЛ, 26 ноя - Sputnik, Хъуылымбегты Зӕлинӕ. Цхинвалы 1-аг скъолайы ансамбль "Зилахар" рамбылдта Курдиӕтты ӕхсӕнадӕмон конкурс "Времена года"-йы гран-при, кӕцы цыд онлайн-форматы Турчы. Ансамблы аивадон къухдариуӕггӕнджытӕй иу Тедеты Ацӕмӕз куыд радзырдта Sputnik, афтӕмӕй коллективы банысан кодтой номинаци "Кавказаг кафт"-ы.

"Махӕн фехъусын кодтой, Стамбулы кӕй ацӕудзӕн фестиваль ӕмӕ организаторты кӕй фӕнды, цӕмӕй дзы мах хайад райсӕм. Мах стыхстыстӕм, уымӕн ӕмӕ нӕ бон нӕ уыд сисын гъӕдджын видео, фӕлӕ нӕ ӕрсабыр кодтой, зӕгъгӕ, видеойы гъӕдӕн нӕ аргъ кӕндзысты, фӕлӕ коллектив кафт куыд арӕхстджынӕй сӕххӕст кӕндзысты, уымӕн", - загъта Ацӕмӕз.

Цыбыр ӕмгъуыдмӕ уыдон видео систой ӕмӕ йӕ арвыстой.

"Ӕнӕрхъӕцӕй ӕнхъӕлмӕ кастыстӕм нӕ ралӕуды фӕстиуӕгмӕ ӕмӕ дзы нӕ зӕрдӕ барухс", - банысан кодта къорды аивадон къухдариуӕггӕнӕг.

Конкурсы, Ацӕмӕзы ныхӕстӕм гӕсгӕ, хайад райстой 300 коллективы.

Ансамбль"Зилахар"-ы сконды ис 45 адӕймаджы, уыдон сты 9-14 азы кары. Хӕххон кафт сӕвӕрыны ма хайад райста Коцты Сергей, кӕцы у къорды аннӕ аивадон къухдариуӕггӕнӕг ӕмӕ сӕйраг балетмейстер.

7