Цхинвалы цӕрӕджы фӕивар кодтой 20 мин сомы бӕрц "снюс"-ы тыххӕй
(ранӕуӕггонд 13:21 09.11.2020)
"Снюс"-ы 14 пакеты, кӕцыты иумӕйаг уӕз уыд 10 граммӕй фылдӕр, ссардтой шофыры басгӕрсты рӕстӕджы ЦХИНВАЛ, 9 ноя - Sputnik. Хуссар Ирыстоны криминалон милицийы наркотиктӕм хъусдарды хайады кусджытӕ ӕрурӕдтой Цхинвалы цӕрӕджы тобӕгонд ӕууилгӕ тамако "снюс"-имӕ, хъусын кӕны республикӕйы Мидхъуыддӕгты министрады (МХМ) пресс-службӕ.
"Криминалон милицийы наркотиктӕм хъусдарды хайады кусджытӕ Дзауы районы Уанелы стационарон посты ӕрурӕдтой хӕдтулгӕ ВАЗ 2170. Шофырмӕ, Цхинвалы 20-аздзыд цӕрӕгмӕ, хисӕрмагонд басгӕрсты рӕстӕджы ссардтой ӕууилгӕ тамако "снюс"-ы 14 пакеты", - дзырдӕуы хъусинаджы.
Экспертон-криминалистон центрмӕ цы ӕууилгӕ тамако бавдыстой, уый уӕз уыд 10, 34 граммы.
Дзауы районы тӕрхондоны скъуыддзагмӕ гӕсгӕ, Цхинвалы цӕрӕджы фӕивар кодтой 20 мин сомы бӕрц "Тамако "снюс" ӕмӕ "насвай" ласын, ӕлхӕнын, ӕвӕрын ӕмӕ уӕй кӕныныл тобӕ"-йы фӕдыл законмӕ гӕсгӕ.
Югосетпотребнадзоры фехъусын кодтой ног бӕрӕггӕнӕнтӕ коронавирусы фӕдыл
(ранӕуӕггонд 15:40 03.12.2020)
Абоны бон медикты хъусдарды бын сты 1002 адӕймаджы COVID-19 диагнозимӕ ЦХИНВАЛ, 3 дек - Sputnik, Хъуылымбегты Зӕлинӕ. Хуссар Ирыстоны ивгъуыд суткӕйы сбӕрӕг кодтой коронавирусӕй 35 ног рынчыны, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.
"Ивгъуыд суткӕйы дӕргъы сарӕзтой 159 басгӕрсты, уыдонӕй 35 радтой ӕвӕрццаг фӕстиуӕг", - загъта Гаглойты Анна.
Афтӕ ма уый бафтыдта, зӕгъгӕ, иу суткӕмӕ медикты хыгъдӕй систой 35 адӕймаджы, дохтырты хъусдарды бын ма сты 1002 адӕймаджы.
Гаглойты Аннайы ныхӕстӕм гӕсгӕ, ӕдӕппӕт Хуссар Ирыстоны коронавирусӕй фӕрынчын сты 1846 адӕймаджы, уыдонӕй сӕнӕниз сты 844 адӕймаджы.
Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.
Цхинвалы сӕвӕрдтой Юрий Гагарины цырт йӕ номыл скъолайы кӕрты
(ранӕуӕггонд 15:00 03.12.2020)
Дыууадӕсӕм астӕуккаг скъолайӕн Юрий Гагарины ном раттыны фӕдыл скъуыддзаг рахастой 1972 азы ЦХИНВАЛ, 3 дек - Sputnik, Хъуылымбегты Зӕлинӕ. Цхинвалы дыууадӕсӕм скъолайы кӕрты сӕвӕрдтой цырт советон тӕхӕг-космонавт Юрий Гагаринӕн, радзырдта Sputnik ахуырадон уагдоны директор Ӕрсойты Геннадий.
"Цырт сӕвӕрдтой мӕйы размӕ скъолайы территорийыл, централон бахизӕны раз", - загъта директор.
Йӕ ныхӕстӕм гӕсгӕ, сывӕллӕтты тынг цымыдис кӕны ацы цырт.
"Ӕз фарстон кӕстӕркъласонты, цы федтой ногӕй скъолайы карантины фӕстӕ, сывӕллӕттӕ уайтагъд дзуапп кодтой, уый кӕй у Юрий Гагарины цырт, кӕцыйы ном хӕссы нӕ скъола. Мӕнӕн тынг ӕхсызгон уыд, сывӕллӕттӕ уый кӕй зонынц", - бафтыдта Ӕрсойты Геннадий.
Цырты сӕвӕрынӕн скъолайы къухдариуӕгадӕн баххуыс кодта горӕты администраци.
"Нӕ фарстимӕ мах бадзырдтам горӕты администрацимӕ, сӕйраджыдӕр, администрацийы кусӕг Козаты Аланмӕ, кӕцы нын баххуыс кодта. Уый йӕхимӕ райста цырт ныззаказ кӕнын, ӕрласын ӕмӕ йӕ сӕвӕрыны фарстытӕ", - бафтыдта уый.
1972 азы Хуссар Ирыстоны комсомолы обкомы скъуыддзагӕй дыууадӕсӕм скъолайӕн радтой Юрий Гагарины ном.