куыд цӕрынц Хуссар Иры интернаттӕ пандемийы уавӕрты

Рӕстӕгмӕ сӕ акӕнынц: куыд цӕрынц Хуссар Иры интернаттӕ пандемийы уавӕрты

11
(ранӕуӕггонд 16:50 10.11.2020)
Хуссар Ирыстоны уӕвынад кӕны дыууӕ скъола-интернаты - Цхинвал ӕмӕ Дзауы. Иунӕг Сывӕллӕты хӕдзар та ис республикӕйы Ленингоры районы

ЦХИНВАЛ, 10 ноя - Sputnik, Плиты Фатимӕ. Хуссар Ирыстоны интернаттӕ ӕмӕ сывӕллӕты хӕдзар карантинмӕ ӕнӕкӕсгӕйӕ сӕ куыст дарддӕр кӕнынц. Коллективтӕ кусынц радгӕсон режимы. 

Хуссар Ирыстоны уӕвынад кӕны дыууӕ скъола-интернаты - Цхинвал ӕмӕ Дзауы. Иунӕг Сывӕллӕты хӕдзар та ис республикӕйы Ленингоры районы.

Цхинвалы уӕвӕг скъола-интернаты ахуырдзаутӕ иугай-дыгай цӕуынц хӕдзӕрттӕм, ам ма ӕппынӕдзух цӕры ӕрмӕстдӕр иу лӕппу.

"Интернат кусы. Администраци цӕуы йӕ куыстмӕ. Ӕдӕппӕтӕй ма нӕм ӕртӕ сывӕллон уыд. Уыдонӕй  дыууӕйы ныййарджытӕ сты тыхст уавӕрты - кӕмӕн къуындӕг авналӕнтӕ, кӕмӕн та лӕмӕгъ ӕнӕниздзинад. Фӕлӕ ныр акодтой сӕ зӕнӕджы. Ныридӕгӕн ма нӕм ис иу лӕппу, уымӕн йӕ мады бартӕ сты арӕнвӕрд ӕмӕ ӕппынӕдзух ис интернаты. Лӕппу ӕркаст цух нӕ зайы", - загъта  Sputnik ахуырадон уагдоны директор Тедеты Роланд.

Уый ма бафтыдта, сӕ кусджыты хсӕн кӕй ис бирӕ рынчынтӕ.

Къаддӕр континенгентимӕ, фӕлӕ йӕ куыст дарддӕр кӕны Ленингоры уӕвӕг Сывӕллӕты хӕдзар дӕр. Ам ныры онг цӕры  9 сывӕллоны.

"Ныры ног ма нӕм уыд фараст сабийы, фӕлӕ дзы цыппарӕн ис фыд ӕмӕ сӕ акӕндзӕн рӕстӕгмӕ. Фӕлӕ дзы ис ахӕм сабитӕ, кӕцытӕ сӕрд дӕр сты уым", - радзырдта Sputnik сывӕллӕты хӕдзары директор Гӕбӕраты Дзерассӕ.

Директор ма банысан кодта, сывӕллӕты хӕдзары кусджыты фылдӕр карджын кӕй сты, уымӕ гӕсгӕ сын сарӕзтой куысты  радгӕсон режим.

11
Хуссар Иры цӕрӕгӕй адавтой техникӕ 10 мин сомы бӕрц

Хуссар Иры цӕрӕгӕй адавтой техникӕ 10 мин сомы бӕрц фыдгӕнӕджы ӕрурӕдтой

3
(ранӕуӕггонд 11:04 27.11.2020)
Милицийы кусджытӕ раргом кодтой хисӕрмагонд ифтоггарзы адавд. Фыдгӕнӕджы бакодтой рӕстӕгмӕдарӕн камерӕмӕ

ЦХИНВАЛ, 27 ноя - Sputnik. Ӕбӕрӕг гоймаг адавта Цхинвалы районы Бикъары хъӕуы 61-аздзыд цӕрӕджы хӕдзарӕй мобилон телефон, DVD ӕмӕ спутникон антеннӕйы ресивер.

Хуссар Ирыстоны Мидхъуыддӕгты министрады (МХМ) пресс-службӕ куыд хъусын кӕны, афтӕмӕй адавды фӕдыл Арцеуы мидхъуыддӕгты хайадмӕ бадзырдта зианбаййафӕг йӕхӕдӕг. Зианы суммӕ рацыд 10 мин сомы.

Цхинвалы районы милицийы кусджытӕ ӕвӕстиатӕй ӕрурӕдтой зӕрдӕхсайгӕйы, Знауыры районы Аунеуы хъӕуы 35-аздзыд цӕрӕджы. Нӕлгоймаг басаст йӕ фыдракӕндыл ӕмӕ йӕ бакодтой рӕстӕгмӕдарӕн камерӕмӕ.

3
Ногазон Цхинвал

Куыд банысан кӕндзӕн Хуссар Ир Ног аз пандемийы уавӕрты

5
(ранӕуӕггонд 10:26 27.11.2020)
Коронавирусы пандемийы фӕдыл арӕнӕвӕрдтӕ республикӕйы адарддӕр кодтой 15 декабры онг. Фӕлӕ ӕрӕввахс кӕнынц ногазон бӕрӕгбонтӕ, кӕцытыл алыхатт дӕр ӕмбӕлдысты хъӕлдзӕгӕй ӕмӕ уӕрӕхӕй. Куыд сӕмбӕлдзысты ахӕм уавӕрты 2021 азыл Хуссар Ирыстоны?

ЦХИНВАЛ, 27 ноя - Sputnik, Техты Дзерассӕ. Хуссар Ирыстоны культурӕйы министры хӕстӕ ӕххӕстгӕнӕг Зассеты Жанна радзырдта Sputnik, цавӕр ногазон мадзӕлттӕ ауадздзысты республикӕйы, коронавирусы пандемийы фӕдыл арӕнӕвӕрдтӕ хынцгӕйӕ.

"Республикӕйы 15 декабры онг тобӕгонд сты культурон-хиирхӕфсӕн мадзӕлттӕ. Фӕлӕ оперштаб куы аскъуыддзаг кӕна каратнин мауал адарддӕр кӕнын, уӕд мах цӕттӕ стӕм. Куыд фӕндыйӕ дӕр бакӕндзыстӕм горӕты наз бӕлас ӕмӕ ауадздзыстӕм чысыл хиирхӕфсӕн мадзӕлттӕ, фӕлӕ уыдонӕн нӕ уыдзӕн массон характер", - загъта министрады сӕргълӕууӕг.

Фӕсивӕдон политикӕ ӕмӕ спорты комитеты сӕргълӕууӕджы хӕдивӕг Гатыгкоты Валентина куыд фехъусын кодта, афтӕмӕй та ацы аз дӕр нывӕзты ис "Афӕдзы ӕвзонг адӕймаг"-ы схорзӕх кӕныны церемони ауадзын, фӕлӕ пандемийы тыххӕй дырыс датӕ нырма бӕрӕг нӕу.

Куыд банысан кӕндзысты районтӕ?

Цхинвалы районы сӕргълӕууӕг Мамытаты Вахтангы ныхӕстӕм гӕсгӕ, бӕрӕгбонон мадзӕлттӕ ацы аз ацӕудзысты минималон программӕмӕ гӕсгӕ – сабидӕтты ӕмӕ скъолаты байуардзысты ногазон лӕвӕрттӕ.

Ленингоры районы хистӕр Мамытаты Виталий дӕр фехъусын кодта  Sputnik, зӕгъгӕ, кӕд арӕнӕвӕрдтӕ ист ӕрцӕуой, уӕд ногазон бӕрӕгбӕттӕ ацӕудзысты иннӕ ӕзты хуызӕн. Ацы аз балхӕдтой ног аппаратурӕ ӕмӕ ифтонгад, гирляндӕтӕ.

 Дзауы районы пандемийы уавӕрты ӕрмӕстдӕр бӕрӕгбонон фӕлынд скӕндзысты поселочы.

"Кӕд ӕмӕ карантин аивай, уӕд та мадзӕлттӕ ацӕудзысты куыд ӕмбӕлы, афтӕ", - загъта районы сӕргълӕууӕг Джиоты Андрей.

Хуссар Ирыстоны 15 декабры онг ис арӕнӕвӕрдтӕ, ӕхгӕд сты ахуырадон уагдӕттӕ райдиан скъолайӕ дарддӕр, тобӕгонд сты массон мадзӕлттӕ.

5