Цхинвал

Мӕлӕтдзаг ФТЦ ӕмӕ фыдракӕндтӕ: Хуссар Иры МХМ радзырдтой ивгъуыд къуырийы уавӕры тыххӕй

8
Барадхъахъхъӕнӕг уагдоны фехъусын кодтой республикӕйы криминогенон уавӕр ӕмӕ фӕндӕгтыл уавӕры тыххӕй 9-16 ноябры периоды

ЦХИНВАЛ, 16 ноя — Sputnik. Хуссар Ирыстоны ивгъуыд къуыри ӕрцыд фондз фӕндагон-транспортон цауы (ФТЦ). Авариты фӕстиуӕгӕн амард иу адӕймаг, дыууӕ адӕймаджы та райстой буары цӕфтӕ, хъусын кӕны республикӕйы Мидхъуыддӕгты министрады (МХМ) пресс-службӕ.

"Мӕлӕтдзаг фӕндагон-транспортон цау ӕрцыд Цхинвал - Знауыр фӕндагыл 11 ноябры. ВАЗ-2114 хӕдтулгӕйы шофыр, Дзагъинайы 26-аздзыд цӕрӕг, рахызт ныхмӕлӕуджыты фӕндагон хаххмӕ ӕмӕ сӕмбӕлд Lada Granta хӕдтулгӕйыл", - дзырдӕуы хъусинаджы.

Цауы фӕстиуӕгӕн республикон бирӕпрофилон медицинон центрмӕ бакодтой ВАЗ-2114 хӕдтулгӕйы пассажир, Дзагъинайы 51-аздзыд цӕрӕджы. Буары цӕфты фӕстиуӕгӕн нӕлгоймаг амард рынчындоны 12 ноябры.

Иу къуыримӕ республикӕйы территорийыл ӕрцыд дыууӕ фыдракӕнды, дыууӕтӕ дӕр раргом кодтой мидхъуыддӕгты органтӕ. Алыгъуызон фӕткхӕлдты тыххӕй бӕрнмӕ ӕрбаздахтой цалдӕр адӕймаджы.

Афтӕ ма ивгъуыд къуыри Паддзахадолн автоинспекцийы кусджытӕ сбӕрӕг кодтой фӕндагон змӕлды 136 фӕткхалды. Ӕртӕ шофыры фӕдыл сарӕзтой административон протоколтӕ хӕдтулгӕ нозтджынӕй скъӕрыны тыххӕй.

8
Коронавирус

Югосетпотребнадзоры фехъусын кодтой ног бӕрӕггӕнӕнтӕ коронавирусы фӕдыл

2
(ранӕуӕггонд 15:40 03.12.2020)
Абоны бон медикты хъусдарды бын сты 1002 адӕймаджы COVID-19 диагнозимӕ

ЦХИНВАЛ, 3 дек - Sputnik, Хъуылымбегты Зӕлинӕ. Хуссар Ирыстоны ивгъуыд суткӕйы сбӕрӕг кодтой коронавирусӕй 35 ног рынчыны, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.

"Ивгъуыд суткӕйы дӕргъы сарӕзтой 159 басгӕрсты, уыдонӕй 35 радтой ӕвӕрццаг фӕстиуӕг", - загъта Гаглойты Анна.

Афтӕ ма уый бафтыдта, зӕгъгӕ, иу суткӕмӕ медикты хыгъдӕй систой 35 адӕймаджы, дохтырты хъусдарды бын ма сты 1002 адӕймаджы.

Гаглойты Аннайы ныхӕстӕм гӕсгӕ, ӕдӕппӕт Хуссар Ирыстоны коронавирусӕй фӕрынчын сты 1846 адӕймаджы, уыдонӕй сӕнӕниз сты 844 адӕймаджы.

Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.

2
Цхинвалы сӕвӕрдтой Юрий Гагарины цырт йӕ номыл скъолайы кӕрты

Цхинвалы сӕвӕрдтой Юрий Гагарины цырт йӕ номыл скъолайы кӕрты

2
(ранӕуӕггонд 15:00 03.12.2020)
Дыууадӕсӕм астӕуккаг скъолайӕн Юрий Гагарины ном раттыны фӕдыл скъуыддзаг рахастой 1972 азы

ЦХИНВАЛ, 3 дек - Sputnik, Хъуылымбегты Зӕлинӕ. Цхинвалы дыууадӕсӕм скъолайы кӕрты сӕвӕрдтой цырт советон тӕхӕг-космонавт Юрий Гагаринӕн, радзырдта Sputnik ахуырадон уагдоны директор Ӕрсойты Геннадий.

"Цырт сӕвӕрдтой мӕйы размӕ скъолайы территорийыл, централон бахизӕны раз", - загъта директор.

Йӕ ныхӕстӕм гӕсгӕ, сывӕллӕтты тынг цымыдис кӕны ацы цырт.

"Ӕз фарстон кӕстӕркъласонты, цы федтой ногӕй скъолайы карантины фӕстӕ, сывӕллӕттӕ уайтагъд дзуапп кодтой, уый кӕй у Юрий Гагарины цырт, кӕцыйы ном хӕссы нӕ скъола. Мӕнӕн тынг ӕхсызгон уыд, сывӕллӕттӕ уый кӕй зонынц", - бафтыдта Ӕрсойты Геннадий.

Цырты сӕвӕрынӕн скъолайы къухдариуӕгадӕн баххуыс кодта горӕты администраци.

"Нӕ фарстимӕ мах бадзырдтам горӕты администрацимӕ, сӕйраджыдӕр, администрацийы кусӕг Козаты Аланмӕ, кӕцы нын баххуыс кодта. Уый йӕхимӕ райста цырт ныззаказ кӕнын, ӕрласын ӕмӕ йӕ сӕвӕрыны фарстытӕ", - бафтыдта уый.

1972 азы Хуссар Ирыстоны комсомолы обкомы скъуыддзагӕй дыууадӕсӕм скъолайӕн радтой Юрий Гагарины ном.

2