Транскам

Уӕрӕсеимӕ арӕны уылты уаргъы ӕрбаласты проблемӕйыл ӕрдзырдтой Мӕскуыйы

4
(ранӕуӕггонд 09:39 18.11.2020)
Амӕйразмӕ Хуссар Ирыстоны сӕргълӕууӕг Бибылты Анатолий ацыд Уӕрӕсейы столицӕмӕ кусӕгон балцы

ЦХИНВАЛ, 18 ноя - Sputnik. Хуссар Ирыстоны президент Бибылты Анатолий ӕрдзырдта Мӕскуыйы уӕрӕсейаг-хуссарирыстойнаг арӕны уылты уаргъы ӕрбаласты фарстытыл, хъусын кӕны республикӕйы сӕргълӕууӕджы пресс-секретарь Гасситы Дина.

Проблемон фарстытыл, кӕцытӕ баст сты таможнӕйон пост Дӕллаг Зӕрӕмӕджы уылты уаргъы ӕрбаластимӕ, дзырд цыд фембӕлды рӕстӕджы УФ экономикон райрӕзты министрады. Хуссарирыстойнаг фарсӕй фембӕлды хайад райстой премьер-министры хӕстӕ ӕххӕтгӕнӕг Бекъойты Геннадий ӕмӕ таможнӕйон комитеты сӕрдар Цхуырбаты Мурӕт, уӕрӕсейаг фарсӕй та – экономикон райрӕзты министры хӕдивӕг Михаил Бабич ӕмӕ Федералон Таможнӕйон службӕйы хистӕры хӕдивӕг Владимир Ивин.

"Фембӕлды рӕстӕджы сбӕрӕг кодтой Уӕрӕсеимӕ арӕны уылты уаргъы ӕрбаласты фӕдыл проблемон фарстыты "фӕндагон картӕ", - фехъусын кодта Гасситы Дина.

Хуссар Ирыстоны президент ацыд Мӕскуымӕ кусӕгон балцы ацы къуыри. УФ столицӕмӕ кусӕгон балцы ацыд Хуссар Ирыстоны хицауады делегаци дӕр премьер-министры хӕстӕ ӕххӕстгӕнӕг Бекъойты Геннадийы сӕргълӕудӕй.

4
Коронавирус

Югосетпотребнадзоры фехъусын кодтой ног бӕрӕггӕнӕнтӕ коронавирусы фӕдыл

2
(ранӕуӕггонд 15:40 03.12.2020)
Абоны бон медикты хъусдарды бын сты 1002 адӕймаджы COVID-19 диагнозимӕ

ЦХИНВАЛ, 3 дек - Sputnik, Хъуылымбегты Зӕлинӕ. Хуссар Ирыстоны ивгъуыд суткӕйы сбӕрӕг кодтой коронавирусӕй 35 ног рынчыны, фехъусын кодта Sputnik Югосетпотребнадзоры сӕргълӕууӕджы хӕдивӕг Гаглойты Анна.

"Ивгъуыд суткӕйы дӕргъы сарӕзтой 159 басгӕрсты, уыдонӕй 35 радтой ӕвӕрццаг фӕстиуӕг", - загъта Гаглойты Анна.

Афтӕ ма уый бафтыдта, зӕгъгӕ, иу суткӕмӕ медикты хыгъдӕй систой 35 адӕймаджы, дохтырты хъусдарды бын ма сты 1002 адӕймаджы.

Гаглойты Аннайы ныхӕстӕм гӕсгӕ, ӕдӕппӕт Хуссар Ирыстоны коронавирусӕй фӕрынчын сты 1846 адӕймаджы, уыдонӕй сӕнӕниз сты 844 адӕймаджы.

Хуссар Ирыстоны 15 декабры онг ис арӕнӕвӕрдон мадзӕлттӕ, ӕхгӕд сты ахуырадон уагдӕттӕ, тобӕ сӕвӕрдтой массон мадзӕлттӕ ауадзыныл.

2
Цхинвалы сӕвӕрдтой Юрий Гагарины цырт йӕ номыл скъолайы кӕрты

Цхинвалы сӕвӕрдтой Юрий Гагарины цырт йӕ номыл скъолайы кӕрты

2
(ранӕуӕггонд 15:00 03.12.2020)
Дыууадӕсӕм астӕуккаг скъолайӕн Юрий Гагарины ном раттыны фӕдыл скъуыддзаг рахастой 1972 азы

ЦХИНВАЛ, 3 дек - Sputnik, Хъуылымбегты Зӕлинӕ. Цхинвалы дыууадӕсӕм скъолайы кӕрты сӕвӕрдтой цырт советон тӕхӕг-космонавт Юрий Гагаринӕн, радзырдта Sputnik ахуырадон уагдоны директор Ӕрсойты Геннадий.

"Цырт сӕвӕрдтой мӕйы размӕ скъолайы территорийыл, централон бахизӕны раз", - загъта директор.

Йӕ ныхӕстӕм гӕсгӕ, сывӕллӕтты тынг цымыдис кӕны ацы цырт.

"Ӕз фарстон кӕстӕркъласонты, цы федтой ногӕй скъолайы карантины фӕстӕ, сывӕллӕттӕ уайтагъд дзуапп кодтой, уый кӕй у Юрий Гагарины цырт, кӕцыйы ном хӕссы нӕ скъола. Мӕнӕн тынг ӕхсызгон уыд, сывӕллӕттӕ уый кӕй зонынц", - бафтыдта Ӕрсойты Геннадий.

Цырты сӕвӕрынӕн скъолайы къухдариуӕгадӕн баххуыс кодта горӕты администраци.

"Нӕ фарстимӕ мах бадзырдтам горӕты администрацимӕ, сӕйраджыдӕр, администрацийы кусӕг Козаты Аланмӕ, кӕцы нын баххуыс кодта. Уый йӕхимӕ райста цырт ныззаказ кӕнын, ӕрласын ӕмӕ йӕ сӕвӕрыны фарстытӕ", - бафтыдта уый.

1972 азы Хуссар Ирыстоны комсомолы обкомы скъуыддзагӕй дыууадӕсӕм скъолайӕн радтой Юрий Гагарины ном.

2