Протесты акци

Цхинвалы фӕндзӕм бон уагъд цӕуы протесты акци. Горӕты центр ӕрӕхгӕдтой тыхон структурӕтӕ

13
(ранӕуӕггонд 15:39 08.12.2020)
Барадхъахъхъӕнӕг органтӕ нӕ нывӕндынц сисын арӕнӕвӕрдтӕ акцийы фӕудмӕ

ЦХИНВАЛ, 8 дек – Sputnik, Козаты Диана. Цхинвалы центры фӕндзӕм суткӕйы дӕргъы цӕуы протесты акци, кӕцы уадзынц Дзабиты Иналы хиуӕттӕ.

Столицӕйы центр ацы фондз боны дӕргъы ӕхгӕд у тыхон структурӕты кусджытӕй.

Уыимӕ иумӕ, ацы ран ис бирӕ административон бӕстыхӕйттӕ, кӕцытӕм ӕрвылбон цӕуынц сӕдӕгай адӕм. Ӕхгӕд уынгтӕ аразынц зындзинӕдтӕ шофыртӕн, сыхаг уынгтыл ӕрӕмбырд вӕййынц бирӕ хӕдтулгӕтӕ, ӕмӕ уый фӕдыл фӕзыны аварион уавӕр.

"Театралон фӕзуат цалдӕр боны дӕргъы ӕхгӕд у митингы тыххӕй. Ӕз не мбарын, цӕмӕн сӕхгӕдтой хӕдтулгӕты змӕлд Сталины уынджы ацы хайы. Митингы адӕм никӕмӕ ӕртхъирӕн кӕнынц. Уадз ӕмӕ тыхон структурӕты кусджытӕ ӕххӕст кӕной сӕ приказтӕ, фӕлӕ бакӕной фӕндаг, цӕмӕй хӕдтулгӕтӕ сӕрибарӕй цӕуой", - радзырдта горӕты цӕрӕг Аслан.

Хуссар Ирыстоны Мидхъуыддӕгты министрады (МХМ) банысан кодтой, хӕдтулгӕты змӕлдыл арӕнӕвӕрдтӕ уыдзӕн цалынмӕ протесты акци фӕуа, уӕдмӕ.

"Дзабиты Иналы хиуӕтты протесты акци уагъд цӕуы фӕндзӕм бон. Зноны изӕр ацыд ӕнӕ цаутӕй. Барадхъахъхъӕнӕг органты кусджытӕ ӕрвыл суткӕйы дӕргъы хъахъхъӕнынц Театралон фӕзуат ӕмӕ йӕ алыварс территори, афтӕ ма патруль кӕнынц столицӕйы уынгтӕ. Ӕхсӕнадон фӕтк бахъахъхъӕныны фӕдыл автотранспорты змӕлд сӕхгӕдтой Цхинвалы центры цалдӕр уынгыл", - банысан кодтой пресс-службӕйы.

Амӕйразмӕ мидхъуыддӕгты органты кусджыты иууылдӕр ракодтой службӕйы фӕтыхджындӕргонд режиммӕ. Ахӕм режим уыдзӕн сӕрмагонд барамынды онг.

Генералон прокуратурӕйы фӕдагуырды хайад 28 августы бакодта угодовон хъуыддаг Дзабиты Иналы мӕлӕты фӕдыл, кӕцыйы ӕрурӕдтой МХМ сӕргълӕууӕг Наниты Игоры амарын бафӕлварынмӕ зӕрдӕхсайыны тыххӕй. Уый фӕстӕ отставкӕйы арвыстой хицауады, кӕцыйы ног сконд нырма дӕр не сфидар кодтой.

13
Ковид

Хуссар Иры санитарон уагдон фехъусын кодта ног бæрæггæнæнтæ COVID-19-ы фæдыл

1
(ранӕуӕггонд 12:41 26.01.2021)
Пандемийы райдианæй æдæппæт республикæйы коронавирусæй фæрынчын сты 2 746 адæймаджы, банысан кодтой "Югосетпотребнадзор"-ы

ЦХИНВАЛ, 26 янв – Sputnik, Хъуылымбегты Азæмæт. Хуссар Ирыстоны ивгъуыд суткæйы рабæрæг кодтой коронавирусæй æхсæз ног фæрынчынуæвæджы, фехъусын кодта Sputnik "Югосетпотребнадзор"-ы сæргълæууæджы хæдивæг Гаглойты Анна.

"Ивгъуыд суткæйы сарæзтæуыд 67 тесты COVID-19 рафæлгъауыны тыххæй, уыдонæй æхсæз равдыстой низы уæвынад. Афтæ ма суткæйы дæргъы хыгъдæй систæуыд фараст адæймаджы", - радзырдта Гаглойты Анна.

Уый ма бафтыдта, медицинон хъусдарды бын нырма кæй ис 773 адæймаджы. Пандемийы райдианæй æдæппæт республикæйы сарæзтой 15 075 тестры коронавирус рабæрæг кæныны тыххæй, уыдонæй 2 746 равдыстой æвæрццаг фæстиуæг.

Хуссар Ирыстоны январы æмбистæй фæрогдæр кодтой коронавирусы апарахат æруромыны фæдыл тобæтæ. Куысты æрвылбонон режиммæ рахызтысты министрæдтæ æмæ организацитæ, уыдон нымæцы ахуырадон уагдæттæ дæр.

1
Хуссар Иры теннисисткӕтӕ райстой фондз призоны бынат ЦКФЗ ерысты

Фыццаг ахӕм ӕнтыст: цхинвайлаг теннисисткӕ райста балцӕг Уӕрӕсейы чемпионатмӕ

11
(ранӕуӕггонд 12:37 26.01.2021)
Елбачиты Ирина хисӕрмагонд ерысты куыд ӕвзист призер, афтӕ райста балцӕг ӕмӕ апрелы тох кӕндзӕн Мӕскуыйы. Ахӕм ӕнтыст республикӕйы историйы у фыццаг

ЦХИНВАЛ, 26 янв — Sputnik, Плиты Фатимӕ. Хуссарирыстойнаг теннисисткӕтӕ бацахстой фондз призон бынаты Цӕгат Кавказы Федералон зылды ерысты. Елбачиты Ирина, Кокойты Аманда ӕмӕ Джиголаты Аланӕ ӕрхастой цыппар ӕвзист ӕмӕ иу бронзӕйон майданы, фехъусын кодта Sputnik уӕлыстол теннисы Федерацийы хистӕр, уӕлдӕр спортивон дӕсныйы скъолайы тренер Джиоты  Мириан.

"Цӕгат Ирыстоны командӕйы сконды архайдтой нӕ чызджытӕ ӕртӕйӕ - Елбачиты Ирина, Кокойты Аманда ӕмӕ Джиголаты Алана ӕмӕ райстой дыккаг бынат, уыдон фӕхӕрд сты ӕрмӕст фысым командӕйӕн. Фыццаг хатт систӕм дыккаг призертӕ",-  бафтыдта уый.

Йӕ ныхӕстӕм гӕсгӕ, фыццаг хатт нӕ республикӕйы историйы Хуссар Ирыстоны минӕвӕр Елбачиты Ирина райста балцӕг Уӕрӕсейы чемпионатмӕ индивидуалон ерысты архайгӕйӕ.

"Елбачиты Ирина хисӕрмагонд ерысты куыд ӕвзист призер, афтӕ райста балцӕг ӕмӕ апрелы тох кӕндзӕн Мӕскуыйы. Ахӕм ӕнтыст нӕ республикӕйы историйы у фыццаг. Уымӕй дарддӕр ЦКФЗ ерыстӕ Елбачиты чызгӕн уыдысты ӕнтыстджын - уый къайон ерысты та Цӕгат Ирыстоны минӕвар Лапина Светланаимӕ бацахста ӕртыккаг бынат", - загъта тренер.

Цӕгат Кавказы Федералон зылды ерыстӕ теннисӕй цыдысты Кӕсӕг-Балхъары Республикӕйы.

11