Транскам

Хуссар Иры УУМ фехъусын кодтой Транскамы уавӕры тыххӕй

15
Транскавказаг автомагистраль ныр ӕртыккаг бон у ӕхгӕд. Уагдоны информацимӕ гӕсгӕ, изӕрмӕ фӕндаг гӕнӕн ис бакӕной

ЦХИНВАЛ, 19 янв – Sputnik, Хъуылымбегты Азӕмӕт. Транскавказаг автомагистраль, кӕцы иу кӕны Хуссар Ирыстон ӕмӕ Уӕрӕсе, у ӕхгӕд. Фӕлӕ фӕндаг гӕнӕн ис бакӕной абон, фехъусын кодта Уӕлвӕткон уавӕрты министрады (УУМ) радгӕсон хайады хистӕр Зӕгъойты Важа.

"Райсом мах бадзырдтам нӕ цӕгӕтирыстойнаг коллегӕтӕм, ӕмӕ уыдон загътой, абон фӕндаг гӕнӕн ис кӕй бакӕной. Цӕгаттаг порталыл мит нал уары, Ручъы хъӕуы та ӕруарыд 80 сантиметры бӕрц мит", - загъта Зӕгъойты Важа.

Транскавказаг автомагистралыл фӕндагон змӕлд ӕрурӕдтой хуыцаубоны митуард ӕмӕ зӕйтӕ 'рцӕуыны тасы тыххӕй.

Транскавказаг автомагистраль — иунӕг фӕндаг, кӕцы иу кӕны Хуссар Ирыстоны Уӕрӕсеимӕ.

15
Цхинвалы райдайдзӕн авд уынджы капиталон цалцӕг

Цхинвалы райдайдзӕн авд уынджы капиталон цалцӕг

1
Республикӕйы столицӕйы ныридӕгӕн раивтой зӕххы бын коммуникациты 70 проценты, ӕввахс рӕстӕджы куыстытӕ райдайдзысты ноджы авд уынгыл

ЦХИНВАЛ, 4 мар - Sputnik, Хъуылымбегты Азӕмӕт. Хуссар Ирыстоны столицӕйы ӕввахс рӕстӕджы ногӕй райдыдтой зӕронд коммуникацион хӕтӕлтӕ раивыны фӕдыл цалцӕггӕнӕн куыстытӕ, фехъусын кодта Sputnik арӕзтад, архитектурӕ ӕмӕ ЦКХ министрады минӕвар Къацты Сослан.

Республикӕйы ӕрвылаз Инвестпрограммӕйы хаххыл ивынц доны, канализацион ӕмӕ газы зӕронд хӕтӕлтӕ.

"Цхинвалы ацы аз нывӕндынц авд уынджы капиталон цалцӕг: Плехановы, Санахъоты Гришикы, Сабырады, Едысы ӕмӕ Саулохты Мухтары уынгтӕ. Афтӕ ма, сцалцӕг кӕндзысты Нарты уынджы алвӕндаг Плиты Ароны уынджы онг. Нырма раивдзысты зӕххы бын коммуникацитӕ, уый фӕстӕ та дзы сӕвӕрдзысты асфальт", - радзырдта Къацты Сослан.

Генералон нардуатон организацитӕ уыдзысты паддзахадон унитарон куыстуӕттӕ "Водоканал" ӕмӕ "Энергоресурс-Хуссар Ирыстон".

Амӕйразмӕ "Водоканал"-ы хъусын кодтой, республикӕйы столицӕйы ныридӕгӕн кӕй раивтой зӕххы бын коммуникациты 70 проценты.

1
COVID-19

Хуссар Иры рабӕрӕг ис COVID-19-ы 21 ног цауы - "Югосетпотребнадзор"

3
(ранӕуӕггонд 15:07 04.03.2021)
Медицинон хыгъдӕй цыппӕрӕмы райсоммӕ систой 14 пациенты, сӕнӕнизуӕвджыты иумӕйаг нымӕц та схызт 2591 онг

ЦХИНВАЛ, 4 мар - Sputnik, Хъуылымбегты Зӕлинӕ. Хуссар Ирыстоны ивгъуыд къуыри сарӕзтой 95 иртӕсты коронавирус рафӕлгъауыны фӕдыл, уыдонӕй 21 равдыстой ӕвӕрццаг фӕстиуӕг, фехъусын кодта Sputnik санитарон уагдоны сӕргълӕууӕджы хӕдивӕг Гаглойты Анна.

"Коронавирусон инфекцийӕ ног рынчынты нымӕц Хуссар Иры абон у 21 адӕймаджы, ӕдӕппӕт пандемийы рӕстӕджы та - 3081", - загъта уый.

Гаглойты Анна ма бафтыдта, цыппӕрӕмы райсоммӕ медицинон уагдӕтты "сырх зонӕтӕй" кӕй рафыстой 14 пациенты, сӕнӕнизуӕвджыты иумӕйаг нымӕц та схызт 2591 онг. Медикты хъусдарды бын ма сты 490 рынчыны.

Хуссар Ирыстоны COVID-19 пандемийы рӕстӕджы ӕдӕппӕт сарӕзтой 18 661 тесты коронавирусы фӕдыл.

Республикӕйы январы æмбистæй фæрогдæр кодтой коронавирусы апарахат æруромыны фæдыл тобæтæ. Куысты æрвылбонон режиммæ рахызтысты министрæдтæ æмæ организацитæ, уыдон нымæцы ахуырадон уагдæттæ дæр.

3