Коронавирус Хуссар Иры

Цхинвалы рынчындоны сӕйраг дохтыр радзырдта коронавирусы уавӕры тыххӕй Хуссар Иры

6
(ранӕуӕггонд 12:35 19.01.2021)
Фӕззӕджы фӕстӕ рынчынкӕнынады уавӕр у стабилон, фӕлӕ уӕддӕр чысыл республикӕйӕн рынчындонмӕ бацӕуынц бирӕ рынчынтӕ, сӕ фылдӕр вӕййынц уӕззау уавӕры, банысан кодта Быценты Индира

ЦХИНВАЛ, 19 янв – Sputnik, Козаты Диана. Хуссар Ирыстоны рынчындӕтты "сырх зонӕты" дыццӕджы райсоммӕйы бӕрӕггӕнӕнтӕм гӕсгӕ хоскӕнынад цӕуынц 70 рынчыны коронавирусӕй, фехъусын кодта Sputnik республикон бирӕпрофилон медицинон центры сӕйраг дохтыр Быценты Индира.

Сӕйраг дохтыр республикӕйы коронавирусӕй рынчынкӕнынады уавӕр банымадта стабилоныл.

"Пациентты нымӕц фӕкъаддӕр, фӕлӕ уыдон уӕддӕр бацӕуынц рынчындонмӕ уӕззау уавӕры, ӕмӕ вирусы амӕттӕгты нымӕц нырма фылдӕр кӕны. Знон амард ноджы иу адӕймаг. Къуырийы дӕргъы коронавирусы амӕттӕгтӕ бавӕййынц дыууӕ-ӕртӕ адӕймаджы, уымӕн ӕмӕ низ цӕуы уӕззау формӕйы. Уый нысан кодтой ӕрмӕст нӕ дохтыртӕ нӕ, фӕлӕ ма уӕрӕсейаг коллегӕтӕ дӕр", - загъта Быценты Индира.

Йӕ ныхӕстӕм гӕсгӕ, абоны бон "сырх зонӕты" ис 70 адӕймаджы, уыдонӕй фондз сты реанимацийы.

Медик бахахх кодта, коронавирусы рынчынкӕнынады уавӕр азы райдайӕнӕй кӕй нӕ фӕивта.

"Мах нӕ зонӕм, цы уыдзӕн февраль-марты. Кӕд ӕмӕ коронавирусы апарахат арӕнӕвӕрдтӕ сисыны фӕстӕ фӕтыхджындӕр уа, уӕддӕр нӕм ис дыууӕ ковид-зонӕйы, алкуыдӕр ис туаггуыры хӕххытӕ", - загъта сӕйраг дохтыр.

Афтӕ ма Быценты Индира банысан кодта, рынчындӕтты ныртӕккӕ кӕй ис сӕрмагонд хъахъхъӕнынады фӕрӕзты цухдзинад.

"Фӕлӕ Ӕнӕниздзинад хъахъхъӕнынады министрад нӕ куырдиатӕй балхӕдта алцыдӕр, туаггуыр дӕр ӕрластой фӕндаджы ӕхгӕдмӕ ӕнӕкӕсгӕйӕ. Мӕ хъуыдымӕ гӕсгӕ ацы мӕй проблемӕтӕ нӕ уыдзӕн", - бафтыдта уый.

Хуссар Ирыстоны пандемийы рӕстӕджы коронавирусӕй фӕрынчын сты 2,5 адӕймагӕй фылдӕр, уыдонӕй 1,7 мин адӕймагӕй фылдӕр сӕнӕниз сты.

6
Хуссар Иры МСНК сбӕрӕг кодтой иууыл тыхджындӕр кусджыты

Хуссар Иры МСНК сбӕрӕг кодтой иууыл тыхджындӕр кусджыты

3
(ранӕуӕггонд 15:32 03.03.2021)
Къорды дӕлхайӕдты хсӕн ӕрвылазон ерысты рӕстӕджы равзӕрстой иууыл цӕттӕдӕр хӕстонты - уыдон сӕ фӕразондзинады ӕвдыстой цалдӕр спортивон дисциплинӕйӕ

ЦХИНВАЛ, 3 мар - Sputnik. Хуссар Иры Гӕззаты Вадимы номыл милицийы сӕрмагонд нысаниуӕджы къорды сбӕрӕг кодтой физикон ӕгъдауӕй иууыл цӕттӕдӕр кусджыты. Ерыстӕ ӕрӕмных кодтой къорды сырӕзты 29-ӕм афӕдзыбонмӕ, хъусын кӕны МХМ пресс-службӕ.

Уӕлахиздзауты бӕрӕг кодтой куыд командон, афтӕ хисӕрмагонд бахыгъды дӕр.

"Командон бахыгъды фыццаг бынатмӕ рахызт 1-аг оперативон ротӕ, дыккаг бынат бацахста 2-аг оперативон ротӕ, ӕртыккаг бынат та бацис 3-аг оперротӕйы", - дзырдӕуы уагдоны хъусинаджы.

Афтӕ ма ацыдысты ерыстӕ хисӕрмагонд бахыгъды дӕр цалдӕр спортивон дисциплинӕйӕ ӕмӕ цыппар уӕзы категорийы.

Милицийы сӕрмагонд нысаниуӕджы къорды дӕлхайӕдты хсӕн ерыстӕ уагъд фӕцӕуынц ӕрвылаз дӕр спорты хуызтӕ парахат кӕнын ӕмӕ хисӕрмагонд сконды профессионалон цӕттӕдзинад фӕбӕрзонддӕр кӕныны нысанӕн.

3
8 март

Литературон изӕртӕ ӕмӕ концерттӕ: Хуссар Иры банысан кӕндзысты сылгоймӕгты бӕрӕгбон

2
(ранӕуӕггонд 15:31 03.03.2021)
8 мартмӕ республикӕмӕ ӕрцӕудзӕн театр ӕмӕ кинойы популярон уӕрӕсейаг актер, Хуссар Ирыстоны сгуыхт артист Эвклид Кюрдзидзис

ЦХИНВАЛ, 2 мар – Sputnik, Козаты Диана. Сылгоймӕгты ӕхсӕнадӕмон бон Хуссар Ирыстоны банысан кӕндзысты литературон изӕртӕ ӕмӕ бӕрӕгбонон концерттӕй.

Сӕйраг мадзӕлттӕ ацӕудзысты майрӕмбоны. 8 март республикӕйы у улӕфт бон.

 

"Майрӕмбоны, 5 марты Къостайы ӕмӕ Громы хъӕуты ацӕудзысты литературон изӕртӕ бӕрӕгбоны цытӕн. Уыцы бон ма Цхинвалы уагъд ӕрцӕудзӕн цытджын ӕмбырд ӕмӕ концерт", - фехъусын кодтой культурӕйы министрады.

 

8 мартмӕ республикӕмӕ ӕрцӕудзӕн театр ӕмӕ кинойы популярон уӕрӕсейаг актер, Хуссар Ирыстоны сгуыхт артист Эвклид Кюрдзидзис. Цхинвалы уый ратдзӕн концерт-импровизаци "Дӕуӕн".

Актер фыццаг хатт не рцӕудзӕн Хуссар Ирыстонмӕ - уый ма ам уыд 2008 азы гуырдзиаг-ирон хӕсты фӕстӕ. Республикӕй Сгъуыхт артисты номӕй дӕр ын уӕд скад кодтой.

2