Хуссар Ирыстоны хицауады рабадт

Хуссар Иры президент саргъ кодта хицауад æмæ парламенты куыстæн 2020 азы

15
(ранӕуӕггонд 10:08 20.01.2021)
Паддзахады сæргълæууæг уадзы министрты кабинеты фыццаг рабадт ацы аз, уый райдыдта хицауады дыууæ къабазы куыстытæн аргъ кæнынæй

ЦХИНВАЛ, 20 янв - Sputnik, Козаты Диана. Хуссар Ирыстоны хицауады куыст 2020 азы уыд эффективон, уый гуырысхо никæмæ æвзæрын кæны, загъта ацы аз министрты кабинеты фыццаг рабадтыл президент Бибылты Анатолий.

Йæ ныхæстæм гæсгæ, ивгъуыд азы хицауад райста 254 акты, 2019 азы та - 217.

Президент бахахх кодта, хицауады куысты фæрцы кæй фæфылдæр сты фиддонтæ сабитæн, пенситæ æмæ æндæр фиддонтæ, кæцыдæр унитарон куыстуæттæ та, кæцытæ раздæр нымад цыдысты æнæпайдаджынтыл, райдыдтой хæссын æфтиаг.

Уыимæ иумæ ма президент банысан кодта, зæгъгæ, ивгъуыд аз парламентмæ цы 30 законы проекты барвыстæуыд, уыдонæй депутаттæ кæй æркастысты æрмæстдæр 13-мæ.

"Нымайын, парламент кæй хъуамæ раива йæ куысты формат. Уымæн нæй бамбарæн ницы хуызы æмæ дзуапп нæ дæтты адæмы интерестæн", - загъта Бибылты Анатолий.

Уый ма банхъардта депутаттæн, кæцытæ нæ цæуынц сесситæм, фембæлын се 'взарджытимæ æмæ сæ бафæрсын, паддзахады бюджет райсой æви нæ.

"Фембæлæт Паддзахадон архив æмæ Хъæды хæдзарады кусджытимæ æмæ сæ бафæрсæт, мызд сын фидой, æви нæ. Бафæрсæт "Сырх зонæйы" кусæг медикты, хъæуынц сæ сæ фиддонтæ, æви нæ. Бюджет президент æмæ хицауады нæу, уый у адæмы", - бахахх кодта бæстæйы сæргълæууæг.

Президент бахæс кодта 20 февралы онг æрбавдисын ивгъуыд азы бакæнгæ куысты хатдзæгтæ, 31 январы онг та - ацы азæн куысты нывæзтытæ.

Хуссар Ирыстоны хицауад отставкӕйы ацыд августы кризисы рӕстӕджы, кӕцы расайдта Цхинвалы ӕвзонг цӕрӕг Дзабиты Иналы амарыны цау. Депутаты иу хай сӕ хӕстӕ ӕххӕст кӕныны куыст ӕрурӕдтой, цалынмӕ генералон прокурор Дзӕгъиаты Уырызмӕджы йӕ бынатӕй ссӕрибар кӕной, уӕдмӕ.

15
Хуссар Иры ссардзысты Зары трагедийы амӕттӕгты рухс нӕмттӕ

Хуссар Иры ссардзысты Зары трагедийы амӕттӕгты рухс нӕмттӕ

1
(ранӕуӕггонд 15:30 17.05.2021)
Фыдохы мадзӕлттӕ ацӕудзысты 29 азы размӕ ӕвирхъау трагеди кӕм ӕрцыд, уыцы бынаты цур

ЦХИНВАЛ, 17 мая – Sputnik, Хъуылымбегты Азӕмӕт. Хуссар Ирыстоны цыппӕрӕмы, 20 майы, ацӕудзӕн фыдохы акци, кӕцы нывонд у Зары трагедийы амӕттӕгты мысӕнӕн, фехъусын кодтой Sputnik культурӕйы министрады пресс-службӕйы.

Зары трагеди нымад æрцыд Хуссар Ирыстоны ног историйы иууыл æгъатырдæртæй сæ иуыл, йæ амæттаг баисты 36 адæймаджы, 12 райстой цæфтæ. Фæмардуæвджытæй иууыл кæстæр уыд 11-аздзыд сывæллон, иууыл хистæрыл та цыд 76 азы.

"Ацы бон Зары хъӕумӕ бахизӕны ацӕудзӕн мысӕн акци "Зажги свечу в память о погибших! В душе зажги и никогда не задувай!". 12.03 сахатыл республикӕйы расидтдзысты Ӕппӕтнацион ӕдзӕмӕй алӕугӕйӕ уысм", - фехъусын кодтой культурӕйы министрады.

Фыдохы датӕмӕ паддзахадон телеуыныннад бацӕттӕ кодта тематикон алӕвӕрдты сери Цхинвалы цӕрджыты мысинӕгтимӕ ацы боны фӕдыл.

1
Хуссар Ирыстоны паддзахадон драмон театр

Ӕрхонгӕ режиссер Цхинвалы бавдисдзӕн комеди "Дон Жуан"

15
(ранӕуӕггонд 16:52 17.05.2021)
Спектакль Дон Жуан"-ы фыццаг хатт паддзахадон драмон театры сценӕйыл сӕ архӕстдзинад равдисдзысты ХИПУ театралон факультеты студенттӕ

ЦХИНВАЛ, 17 май — Sputnik, Плиты Фатимæ. Хуссар Ирыстоны паддзахадон драмон театр сцӕттӕ кодта спектакль "Дон Жуан" рауадзынмӕ. Дыгуры театры сӕйраг режиссер Джелиты Хъазыбеджы бакастӕй комеди уыдзӕн драмӕйы ӕууӕлтимӕ, фехъусын кодтой Sputnik ПДТ пресс-службӕйы.

Уагдоны банысан кодтой, къорд кӕй архайы, цӕмӕй къуырийы кӕрон спектакль бавдисой аивадон советӕн.

"Ӕвзонг курдиатджын режиссер Джелиты Хъазыбегӕн ис ӕндӕрхуызон бакаст Мольеры комедимӕ, уый у психологон драмӕ, алкӕцы  адӕймаг дӕр арф ахъуыды кӕндзӕн ӕмӕ фӕхуддзӕн йӕхи ӕппӕрццаг миниуджытыл. Репетицитӕ цӕуынц бон дыууӕ хатты", - загътой пресс-службӕйы.

Уым ма бафтыдтой, спектакль "Дон Жуан"-ӕн кӕй бацӕттӕ кодтой диссаджы дарӕс ӕмӕ декорацитӕ.

"Тынг ӕхсызгон нын у ацы премьерӕйы тыххӕй фехъусын кӕнын. Сӕйраг фӕлгонц ӕххӕст кӕны Мамиты Григорий, уый ралӕууыд Дон Жуанӕй, йе 'ххуырсты фӕлгонц та ӕххӕст кӕны Гаглойты Эдуард. Спектаклы ма архайынц адӕмон артист Тъехты Уасил, сгуыхт артисттӕ Уанеты Эдуард, Гаглойты Артур, Хуыгаты Альбина, Натия Чохели ӕмӕ Хаситы Сослан", - бафтыдта уый.

Ацы спектаклы ма фыццаг хатт паддзахадон драмон театры сценӕйыл сӕ архӕстдзинад равдисдзысты ХИПУ театралон факультеты студенттӕ.

 

15