ЦХИНВАЛ, 27 янв — Sputnik, Плиты Фатимӕ. Ирон æвзаг 2021 азы кæронмæ æххæстæй фæзындзæн Яндексы. Дунейы цифрӕйон ӕхсӕнад бахæст уыдзæн милуан дзырдуатон фӕстауӕрцæй мадæлон æвзагыл, фехъусын кодта Sputnik Цӕгат Ирыстоны информацион технологиты ӕмӕ бастдзинады фӕдыл управленийы хистӕр Сӕлбиты Алан.
Яндексимӕ ӕмгуыстад сцайдагъ кодтой Цӕгат Ирыстоны Республикӕ æмæ ӕнӕкоммерцион автономон организаци "Цифровая экономика".
"Фыццаг нын уыд проект яндек-лицей, стӕй ма уыдыстӕм фыццаг республикӕ ЦКФЗ, кӕцыйы фӕзынд Яндекс такси. Не 'мгуыстады фӕлгӕтты мах бафӕндыд афтӕ саразын, цӕмӕй дунейы цифрӕйон ӕхсӕнады фӕзына ирон ӕвзаг. Уымӕн ӕмӕ глобалон цифрӕйы дунейы адӕмы хатты фӕд куынӕ зына, уӕд сӕ уӕвынад, сӕ культурӕ ӕмӕ ӕвзаг дæр нӕ зынынц", - радзырдта Сӕлбиты Алан.
Йæ ныхæстæм гæсгæ, цифрӕйон ӕхсӕнад бахæст уыдзæн милуан дзырдуатон фӕстауӕрцæй ирон æвзагыл.
"Фидар ӕрцыд милуан дзырдбасты ӕмӕ терминтӕй дзырдуатон фӕстауӕрц, кӕцытӕ хъӕуы раивын мадӕлон ӕвзагмӕ. Арӕзт ӕрцыд кусӕгон къорд, нывӕндӕм 50 мингай дзырдбасты дӕттын Яндексы системӕмӕ. Яндекс тӕлмацгӕнӕг цадӕггай хуыздӕр ӕмбардзӕн ирон ӕвзаг. Куыст фӕнд кӕнӕм балхынцъ кӕнын 2021 азы ноябрьмӕ", - бафтыдта управленийы хистæр.
Сæлбиты Аланы хъуыдымæ гæсгæ, уый уыдзӕн фыццаг къахдзӕф ирон ӕвзаджы размӕцыды.
"Нæ къорды архайынц Дзигойты Тамерлан, Къодзойты Анжела, Кудзайты Аслан ӕмӕ ӕндӕртӕ. Нӕ куыстмӕ бамбал ис мадӕлон ӕвзаджы Цӕгат Ирыстоны сгуыхт ахуыргӕнӕг Дзарасты Бэла, кӕцы нын бакодта стыр ӕххуыс. Алы бон дӕр нӕм цӕуы ног адӕм, хатӕм нӕ Иры хуссар хаййы адӕммӕ дӕр, цӕмӕй бамбал уой, уымӕн ӕмӕ у нæ иумӕйаг националон фарст", - балхынцъ кодта уый.
Аразджыты фæндмæ гæсгæ уал фыццаг Яндекс ӕмбардзӕн ирон ӕвзаджы иу диалект, фӕстӕдӕр фӕнд кӕныныц бакусын дыгурон диалектыл дӕр.
