Цхинвалы колледжы студенттӕ хайад исынц WorldSkills чемпионаты Цӕгат Иры

Цхинвалы колледжы студенттӕ хайад исынц WorldSkills чемпионаты Цӕгат Иры

6
Гом регионалон чемпионаты, кӕцы райдыдта 23 февралы, хайад исынц столицӕйы бирӕпрофилон колледжы ӕртӕ хайады студенттӕ - "Автомеханика", "Портной" ӕмӕ "Повар, кондитер"

ЦХИНВАЛ, 26 фев – Sputnik, Хъуылымбегты Азӕмӕт. Цхинвалы бирӕпрофилон колледжы студенттӕ хайад исынц "Ӕвзонг профессионалты" (WorldSkills Russia) чемпионаты, кӕцы уагъд цӕуы Цӕгат Ирыстоны, радзырдта Sputnik колледжы директор Козаты Лира.

"Тынг зӕрдиагӕй мӕ фӕнды зӕгъын, знон ӕнтыстджын архайд кӕй скодта "Автомеханика" хайады студент Джеранты Валерий, кӕцы иттӕг хорз ацыд ерыстӕ дыууӕ модульмӕ. Фӕстаджы уый райста 9 баллы дӕсӕй", - банысан кодта Козаты Лира.

Козаты Лирайы ныхӕстӕм гӕсгӕ, абон ерысты хайад райдыдта исын Дзабиты Марик "Повар-кондитер" здӕхты.

Уый бафтыдта, зӕгъгӕ, ацы номинацийы хайадисджыты фылдӕр хай сты чызджытӕ, фӕлӕ уымӕ ӕнӕкӕсгӕйӕ, Дзабиты Марик иттӕг хорз ӕххӕст кӕны йӕ хӕслӕвӕрдтӕ.

"Чемпионаты ӕртыккаг хайадисӕг у  Тедеты Мерседес, кӕцы хайад исы пальто хуыйыны конкурсы", - загъта Козаты Лира.

Уымӕй дарддӕр колледжы директор бахахх кодта, Хуссар Ирыстоны WorldSkills Russia уӕнг нӕу, фӕлӕ уӕддӕр студенттӕ ӕрвылаз хайад исынц регионалон чемпионаты.

"Ӕрыдоны Аграрон-технологон техникумы директор Моурауты Аланы руаджы мах хайад исӕм конкурсы. Моурауты Алан мах фӕхоны хайад райсын конкурсы, фӕлӕ дзы призон бынӕттыл нӕ тох кӕнӕм. Мах схорзӕх кӕнӕн ис ӕрмӕстдӕр грамотатӕ ӕмӕ дипломтӕй", - загъта уый.

Колледжы студенттӕ ӕрвылаз хайад исынц фестивальтӕ ӕмӕ чемпионатты. Цхинвалы колледжы студенткӕ Плиты Алла 2019 азы бацахста фыццаг бынат ирон уӕлибыхтӕ аразыны фӕдыл VI Ӕхсӕнадӕмон фестивалы.

6
Энергетиктӕ иуварс кӕнынц Хуссар Иры электроифтонгадимӕ проблемӕйы аххосаг

Энергетиктӕ иуварс кӕнынц Хуссар Иры электроифтонгадимӕ проблемӕйы аххосаг

2
(ранӕуӕггонд 15:51 19.04.2021)
Республикӕйы рухс ахицӕн къуырисӕры цалдӕр сахаты размӕ. Специалисттӕ банысан кодтой, авари ауиварс кӕныныл куыстытӕ нырма дӕр кӕй цӕуынц

ЦХИНВАЛ, 19 апр - Sputnik, Хъуылымбегты Зӕлинӕ. Хуссар Ирыстоны сӕндидзын кодтой электроифтонгад, фӕлӕ энергетикӕйы куджытӕ нырма дӕр кусынц аварийы аххосӕгтӕ аиуварс кӕныныл.

Хуссар Ирыстоны электроэнерги ахицӕн къуырисӕры ӕмбисбон электрохызӕгтыл аварийы тыххӕй.

"Энергетиктӕ ссардтой аварийы бынат ӕмӕ кусынц проблемӕ аиуварс кӕныныл, ӕввахс рӕстӕджы рухс нырма гӕнӕн ис ахицӕн уа цыбыр ӕмгъуыдмӕ", - радзырдта Sputnik "Энергоресурс"-ы генералон директоры хӕдивӕг Гӕбӕраты Анатолий.

Гендиректоры хӕдивӕджы ныхӕстӕм гӕсгӕ, республикӕйы ӕввахс цалдӕр сахаты гӕнӕн ис хицӕн кӕна рухс цыбыр ӕмгъуыдмӕ.

2
Коронавирус

"Югосетпотребнадзор"-ы радзырдтой коронавирусæй ног рынчынты тыххæй

2
(ранӕуӕггонд 15:53 19.04.2021)
Республикӕйы пандемийы райдианӕй коронавирусон инфекцийæ ӕдӕппӕт фæрынчын сты 3292 адæймаджы, сæнæнизуæвджыты нымæц та у 2931

ЦХИНВАЛ, 19 апр — Sputnik, Хъуылымбегты Зæлинæ. Хуссар Ирыстоны ивгъуыд майрæмбоны рабæрæг кодтой фондз ног фæрынчынуæвæджы коронавирусæй, æрхаста тестыты бæрæггæнæнтæ санитарон уагдоны сӕргълӕууӕг Коцты Марина. Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры иртæстты тыххæй та фехъусын кæндзысты сом райсом.

"Майрæмбоны саразгæ 124 иртæстæй COVID-19 рабӕрӕг кодтой фондз адæймагæн", - загъта сæйраг санитарон дохтыр.

Коцты Марина бафтыдта, медицинон хыгъдӕй кӕй систой фараст адӕймаджы, пандемийы рӕстӕджы сӕнӕнизуӕвджыты иумӕйаг нымӕц схызт 2 931 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 361 адӕймаджы.

Республикӕйы пандемийы рӕстӕджы ӕдӕппӕт сарӕзтой 21 396 тесты коронавирусон инфекци рабӕрӕг кӕныны фӕдыл, уыдонӕй 3 292 радтой ӕвӕрццаг фӕстиуӕг.

2
Цхуырбаты Алан

Цхуырбаты Алан: рæстæгимæ иумæ ивы радиойы куыст дæр

0
(ранӕуӕггонд 15:41 19.04.2021)
Хуссар Ирыстоны паддзахадон радиостанц "Ир-ФМ"-ы сæргълæууæг Цхуырбаты Алан радио Sputnik радзырдта йæ куысты тыххæй
Цхуырбаты Алан: рæстæгимæ иумæ ивы радиойы куыст дæр

Ацы аз 11 апрелы паддзахадон радиостанц "Ир-ФМ"-ыл сæххæст 89 аз. Йæ сæргълæууæг Цхуырбаты Аланы ныхæстæм гæсгæ, рæстæгимæ иумæ ивы радиойы куыст дæр.

"Ныртæккæ афтæ бирæ ис информаци, æмæ йыл адæймаг не 'ххæссы, уый бандæвта радиойы куыстыл дæр, фæивта йæ формæ дæр æмæ йæ алæвæрдтæ дæр", - загъта Алан.

Радиостанцы сæргълæууæг куыд банысан кодта, уымæ гæсгæ кæд раздæр ног хабæрттæ эфиры цыдысты 10-15 минуты, уæд ныр та ахæм хабæрттæм ничиуал хъусдзæн.

"Не 'мзæххонтæй республикæйы æдде чи цæры, уыдон мын арæх фæдзурынц, зæгъгæ, радио "Ир-ФМ" цæмæннæ ис интернеты. Махмæ гæсгæ уымæн нæй стыр нысаниуæг, уымæн æмæ уыцы адæмæн цымыдисон нæ уыдзысты бынæттон хабæрттæ", - бафиппайдта Цхуырбаты Алан.

Йæ хъуыдымæ гæсгæ, ныртæккæ бирæ актуалондæр у социалон хызæгты парахат кæнын радиойы сæрмагонд алæвæрдтæ.

0
Темӕтӕ:
Радио иронау