Бирæгъ

Хӕрынц нын нӕ фос: Хуссар Иры районты цӕрджытӕ тыхсынц тугдзых сырдты лӕбурдтытӕй

33
(ранӕуӕггонд 15:43 06.04.2021)
Хуссар Ирыстоны архайы "Цуанонты цæдис", фæлæ сын уæддæр уый бæрц уавæртæ нæй, цæмæй æгас республикæйы территорийыл ахæссой

ЦХИНВАЛ, 6 апр – Sputnik, Дриаты Лейла. Хуссар Ирыстоны районты дӕрддзӕф хъæуты уæлдай тынгдæр сарæх сты бирæгътæ. Тугдзых сырдтæ лæбурынц хъæдмæ хæстæг цы хъæутæ ис, уыдоны цæрджыты хæдзарон фосмæ.

Æрæджы та Знауыры районы Калеты хъæуы бирæгъ бацыд хæдзары кæртмæ æмæ аргæвста дзæргъы. Уый фæстæ та йæ амæттаг бакодта хъыбылтæ æмæ роды.

"Æмæ уый фыццаг хатт нæу, ахæм фыдбылызтæ нын бирæгъ алы аз дæр ракæны", - радзырдтой хъæуы цæрджытæ.

Хъæубæстæ бахатыдысты Балтайы хъæуы цæрæг, егерь Плиты Лаврикмæ, цæмæй сын баххуыс кæна æмæ сæ фервæзын кæна ацы тугдзых сырдæй. Плиты Лаврикмæ стыр фæлтæрддзинад ис, уайтагъд сбæрæг кодта бирæгъы фæд, йæ бацæуæны йын сæвæрдта къæпхæн æмæ дыккаг бон тугдзых сырды къæпхæн æрцахста. Афтæмæй хъæуы цæрджытæ фервæзтысты бирæгъы æхсæвыгон лæбурдтытæй.

Канд Знауыры районы хъæуты нæ цæуы ахæм цаутæ. Ахæм хъæстытæ цæуы æндæр районты хъæутæй дæр. Уыдон куыд зæгъынц, афтæмæй хъæдмæ хæстæг хъæутæм æрмæст бирæгъ нæ лæбуры, фæлæ ма хъæддаг куыйтæ, æрсытæ, рувæстæ дæр. Цы зиан æрхæссынц, уый чысыл нæу. Ивгъуыд аз Цхинвалы районы хъæутæй сæ иуы бирæгъы амæттаг фесты гал æмæ хъуг. Сæ дыууæ дæр хызтысты сæрвæтты. Галы бахордтой, хъуг ма бæргæ алыгъд фæлæ бирæгъы хæстыты фæстиуæгæн уый дæр дыккаг бон амард.

Вæййы афтæ дæр, æмæ фос аивæрзынц тугдзых сырдтæй, фæлæ уый фæстæ уыдонæн бахъæуы хос кæнын.

"Тугдзых сырдтæ сты алыгъуызон низ парахатгæнджытæ дæр – гæбæрниз, трихиннелез, æрраниз. Уыцы низтæ тæссаг сты адæймаджы цардæн дæр. Тæссаг у, цы хъæутæм цæуынц, уым бынæттон цæрæгыл дæр куы фæхæцой, уымæй. Ахæм цаутæ дæр иу æмæ дыууæ хатт не ‘рцыд", - зæгъынц ветеринарон службæты кусджытæ.

Специалисттæ куыд амонынц, афтæмæй тугдзых сырд уый цы кæртмæ баивæрза, уым хъæуы дезинфекци кæнын.

Адæмы тыхстдзинад уынгæйæ 2011 азы арæзт æрцыд "Цуанонты æхсæнад", сæрдарæй йын баурӕдтой Букуылты Чермены. Уыцы æхсæнад архайы, фæлæ сын уæддæр уый бæрц уавæртæ нæй, цæмæй æгас республикæйы территорийыл ахæссой. Бирæгъыл цуан кæнын та æнцон нæу. Физикон хъаруйæ æххæст уæвынæй дарддæр цуаноны фæхъæуы транспортон хæрдзтæ бакæнын, нæмгуытæ самал кæнын, цуанонæн ма æнæмæнгхъæуæг сты спецификон дзаумæттæ дæр. Уыдон та цуанон хъуамæ балхæна йæхи фæрæзтæй.

33
Энергетиктӕ иуварс кӕнынц Хуссар Иры электроифтонгадимӕ проблемӕйы аххосаг

Энергетиктӕ иуварс кӕнынц Хуссар Иры электроифтонгадимӕ проблемӕйы аххосаг

2
(ранӕуӕггонд 15:51 19.04.2021)
Республикӕйы рухс ахицӕн къуырисӕры цалдӕр сахаты размӕ. Специалисттӕ банысан кодтой, авари ауиварс кӕныныл куыстытӕ нырма дӕр кӕй цӕуынц

ЦХИНВАЛ, 19 апр - Sputnik, Хъуылымбегты Зӕлинӕ. Хуссар Ирыстоны сӕндидзын кодтой электроифтонгад, фӕлӕ энергетикӕйы куджытӕ нырма дӕр кусынц аварийы аххосӕгтӕ аиуварс кӕныныл.

Хуссар Ирыстоны электроэнерги ахицӕн къуырисӕры ӕмбисбон электрохызӕгтыл аварийы тыххӕй.

"Энергетиктӕ ссардтой аварийы бынат ӕмӕ кусынц проблемӕ аиуварс кӕныныл, ӕввахс рӕстӕджы рухс нырма гӕнӕн ис ахицӕн уа цыбыр ӕмгъуыдмӕ", - радзырдта Sputnik "Энергоресурс"-ы генералон директоры хӕдивӕг Гӕбӕраты Анатолий.

Гендиректоры хӕдивӕджы ныхӕстӕм гӕсгӕ, республикӕйы ӕввахс цалдӕр сахаты гӕнӕн ис хицӕн кӕна рухс цыбыр ӕмгъуыдмӕ.

2
Коронавирус

"Югосетпотребнадзор"-ы радзырдтой коронавирусæй ног рынчынты тыххæй

2
(ранӕуӕггонд 15:53 19.04.2021)
Республикӕйы пандемийы райдианӕй коронавирусон инфекцийæ ӕдӕппӕт фæрынчын сты 3292 адæймаджы, сæнæнизуæвджыты нымæц та у 2931

ЦХИНВАЛ, 19 апр — Sputnik, Хъуылымбегты Зæлинæ. Хуссар Ирыстоны ивгъуыд майрæмбоны рабæрæг кодтой фондз ног фæрынчынуæвæджы коронавирусæй, æрхаста тестыты бæрæггæнæнтæ санитарон уагдоны сӕргълӕууӕг Коцты Марина. Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры иртæстты тыххæй та фехъусын кæндзысты сом райсом.

"Майрæмбоны саразгæ 124 иртæстæй COVID-19 рабӕрӕг кодтой фондз адæймагæн", - загъта сæйраг санитарон дохтыр.

Коцты Марина бафтыдта, медицинон хыгъдӕй кӕй систой фараст адӕймаджы, пандемийы рӕстӕджы сӕнӕнизуӕвджыты иумӕйаг нымӕц схызт 2 931 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 361 адӕймаджы.

Республикӕйы пандемийы рӕстӕджы ӕдӕппӕт сарӕзтой 21 396 тесты коронавирусон инфекци рабӕрӕг кӕныны фӕдыл, уыдонӕй 3 292 радтой ӕвӕрццаг фӕстиуӕг.

2
Цхуырбаты Алан

Цхуырбаты Алан: рæстæгимæ иумæ ивы радиойы куыст дæр

0
(ранӕуӕггонд 15:41 19.04.2021)
Хуссар Ирыстоны паддзахадон радиостанц "Ир-ФМ"-ы сæргълæууæг Цхуырбаты Алан радио Sputnik радзырдта йæ куысты тыххæй
Цхуырбаты Алан: рæстæгимæ иумæ ивы радиойы куыст дæр

Ацы аз 11 апрелы паддзахадон радиостанц "Ир-ФМ"-ыл сæххæст 89 аз. Йæ сæргълæууæг Цхуырбаты Аланы ныхæстæм гæсгæ, рæстæгимæ иумæ ивы радиойы куыст дæр.

"Ныртæккæ афтæ бирæ ис информаци, æмæ йыл адæймаг не 'ххæссы, уый бандæвта радиойы куыстыл дæр, фæивта йæ формæ дæр æмæ йæ алæвæрдтæ дæр", - загъта Алан.

Радиостанцы сæргълæууæг куыд банысан кодта, уымæ гæсгæ кæд раздæр ног хабæрттæ эфиры цыдысты 10-15 минуты, уæд ныр та ахæм хабæрттæм ничиуал хъусдзæн.

"Не 'мзæххонтæй республикæйы æдде чи цæры, уыдон мын арæх фæдзурынц, зæгъгæ, радио "Ир-ФМ" цæмæннæ ис интернеты. Махмæ гæсгæ уымæн нæй стыр нысаниуæг, уымæн æмæ уыцы адæмæн цымыдисон нæ уыдзысты бынæттон хабæрттæ", - бафиппайдта Цхуырбаты Алан.

Йæ хъуыдымæ гæсгæ, ныртæккæ бирæ актуалондæр у социалон хызæгты парахат кæнын радиойы сæрмагонд алæвæрдтæ.

0
Темӕтӕ:
Радио иронау