Цхинвал

Иры хъайтар Цоциты Вася. Хъæубæстæ нæ рох кæнынц, уæлахиз сын чи æрхаста

27
(ранӕуӕггонд 14:17 30.04.2021)
Хуссар Ирыстоны районты алы аз дæр цытджын æгъдауæй, алыгъуызон мадзæлттæй банысан кæнынц Стыр Уæлахизы бæрæгбон

ЦХИНВАЛ, 30 апр – Sputnik, Дриаты Лейла. Стыр Фыдыбæстæйон хæсты фæуæлахизы 76 азы боны цытæн цымыдисон мадзал "Ирыстоны хъæбатыр фырттæ", зæгъгæ, уагъд æрцыд Цхинвалы районы Ортъеуы хъæуы, Советон Цæдисы хъайтар Цоциты Васяйы цырты раз. Хъæубæстæ нæ рох кæнынц, уæлахиз сын чи æрхаста, уыдоны рухс нæмттæ.

Цоциты Васяйы цырт
© Photo : Дриаты Лейла
Цоциты Васяйы цырт

Хуссар Ирыстоны районты алы аз дæр цытджын æгъдауæй, алыгъуызон мадзæлттæй банысан кæнынц Стыр Уæлахизы бæрæгбон.

Мадзал бацæттæ кодтой Цхинвалы районы администрацийы культурæйы хайады управлени (йæ сæргълæууæг Гаглойты Ростик), Централон библиотекæ æмæ Культурæйы хæдзары кусджытæ, афтӕ ма Цхинвалы районы Ортъеуы хъæуы библиотекæгæс Битеты Алена. Цытджын изӕрмӕ æрбацыдысты районы администрацийы къухдариуæггæнæджы хæдивæг Бибылты Валери, культурæйы хайады управленийы хистæр Гаглойты Ростик, хъæуы цæрджытæ, скъоладзаутæ. Мадзалмæ хуынд æрцыд фыссæг, журнал "Фидиуæг"-ы прозæйы хайады гæс Наниты Асиат.

Мадзаламонæг, Централон библиотекӕйы директор Уалыты Нанули раарфæ кодта æрбамбырдуæвджытæн ӕмӕ зӕрдыл ӕрлӕууын кодта, Фыдыбæстæйон хæсты знагыл фæуæлахизмæ йæ уæзгæ хайбавæрд кӕй бахаста Хуссар Ирыстон дæр.

"22 мин адæймагæй фылдæр тох кодтой æппæт фронтты дæр. Уыдонæй дæс мин хæстоны фæмард тохы быдыры, æбæрæгæй фесæфт авд минæй фылдæр. Фыдыбæстæйы Стыр хæсты Советон Цæдисы Хъæбатыры ном чи райста, уыдоны 'хсæн ис æртын æхсæз ироны. Цæрджыты иумæйаг бæрцмæ гæсгæ нæ чысыл Ирыстон Хъæбатырты нымæцæй ис фыццаг бынаты", - цыбыртæй æрдзырдта Стыр Фыдыбæстæйон хæсты тыххæй библиотекæйы директор.

Уый ма банысан кодта, Ирыстоны алы цыппæрæм адæймаг ссис ацы хæсты хайадисæг. Хæсты быдыры уыдон равдыстой диссаджы хъæбатырдзинад. Цхинвалы районы Ортъеуы хъæуæй дæр бирæтæ ацыдысты Фыдыбæстæйон хæстмæ. Бирæтæ нал æрыздæхтысты сæ райгуырæн хъæумæ.

Уый фæстæ иу минут æмырæйы алæугæйæ ссардтой хæсты фæмардуæвджыты ном. Райхъуыстысты хæстон музыкæйы зæлтæ, мадзалмæ æрбацæуджытæ дидинджытæ сæвæрдтой хъайтары цырты раз.

Сколадзаутæ Цоциты Вероника, Брянский Егор, Цоциты Тамерлан аив бакастысты æмдзæвгæтæ хæсты темæйыл.

Хъæубæсты номæй раныхас кодта Гассеты Арон. Уый ӕрдзырдта, Фыдыбæстæйон хæстмæ Ортъеуы хъæуæй цас фæсивæд ацыд, цасæй нал æрыздæхтысты хæсты быдырæй, куыд бандæвта Фыдыбæстæйон хæст æрмæст сæ хъæуыл нæ, фæлæ æмткæй Ирыстоныл.

"Ныры кæстæртæ хъуамæ зоной Ирыстоны хъæбатырты нæмттæ, нæ райгуырæн зæххыл цы тохтæ цыдысты, уыдоны тыххæй. Цæмæй хæрзчысылæй се 'нкъарынады æрбиноныг уа, кад æмæ цыт кæй хъæуы бæстæйы хъахъхъæнджытæн, макуы ферох кæной Хуссар Ирыстоны сæрвæлтау чи бабын, уыцы дзæнæттаг æфсæддонты нæмттæ", - радзырдта Гассеты Арон.

Уый ма аив бакаст Цоциты Васяйыл фыст æмдзæвгæ.

Цхинвалы уынгтæй сæ иу æмæ кæм ахуыр кодта, уыцы скъола хæссынц Цоциты Васяйы ном, Хъайтарты аллейæйы йын æвæрд ис бюст.

27
Хуссар Ирыстоны Знауыры районы прокурор ахицæн йæ цардæй

Хуссар Ирыстоны Знауыры районы прокурор ахицæн йæ цардæй

0
(ранӕуӕггонд 16:07 18.05.2021)
Икъаты Юрий 12 азы къухдариуæг кодта Знауыры районы прокуратурӕйæн, йе 'нтыстыты тыххæй уый бирæ хатт æрцыд хорзæхджын

ЦХИНВАЛ, 18 май - Sputnik. Хуссар Ирыстоны Знауыры районы прокурор Икъаты Юрий къуырисæры ахицæн йæ цардæй, фехъусын кодтой Генералон прокуратурæйы пресс-службæйы.

"Юрий Чермены фырты æнæрæстæджы мæлæт у тынг уæззау зиан æрмæст йæ бинонтæн æмæ хиуæттæн нæ, фæлæ йæ коллегæтæн дæр", – дзырдæуы генералон прокуратурæйы хъусинаджы.

Икъаты Юрий прокуратурӕйы органты куыста 2009 азæй фæстæмæ. 12 азы дæргъы уый къухдариуæг кодта Знауыры районы прокуратурӕйæн. Уыдис ын паддзахадон æмæ уагдонон хорзæхтæ.

0
Фӕсивӕды минӕвӕрттӕ бафснайдтой цӕугӕ дӕтты былгӕрӕттӕ

Фӕсивӕды минӕвӕрттӕ бафснайдтой Хуссар Иры цӕугӕдӕтты былгӕрӕттӕ

4
(ранӕуӕггонд 15:51 18.05.2021)
Хуссар Ирыстоны донбылгӕрӕттӕ сӕрды мӕйты байдзаг вӕййынц улӕфджытӕй. Бирӕнымӕц сидтӕм ӕнӕкӕсгӕйӕ, уыдон сӕ фӕстӕ стӕм хатт ӕфснайынц

ЦХИНВАЛ, 18 май — Sputnik, Плиты Фатимæ. Фӕсивӕдон организаци "Ныхас"-ы минӕвӕрттӕ ӕфснайынц Хуссар Ирыстоны улӕфӕн бынӕттӕ. Быроны обаутӕй расыгъдӕг кодтой дыууӕ цӕугӕдоны былгӕрӕттӕ, фехъусын кодтой Sputnik организацийы.

Хуссар Ирыстоны донбылгӕрӕттӕ сӕрды мӕйты байдзаг вӕййынц улӕфджытӕй. Бирӕнымӕц сидтӕм ӕнӕкӕсгӕйӕ, уыдон сӕ фӕстӕ стӕм хатт ӕфснайынц. Бырон кӕнынц ӕгӕрыстӕмӕй сыгъдӕг бынӕттӕм ӕввахс дӕр.

"Нӕ къорд бафснайдта Знауыры районы Аунеуы хъӕуы Пронейы ӕмӕ Дзауы районы Пацъайы донбылгӕрӕттӕ", - загътой организацийы.

Уым ма бафтыдтой, сӕ фӕнды кӕй ис ӕндӕр улӕфӕн бынӕттӕ дӕр бафснайын.

Хуссар Ирыстоны уалдзӕгӕй фӕззӕджы онг фӕсивӕдон политикӕйы комитет ӕмӕ хицӕн фӕсивӕдон организацитӕ ӕмӕ баиугӕндтӕ фефснайынц ӕрдз. Проблемӕ уӕлдай актуалон ссис фӕстаг ӕзты.

1 / 3
Фӕсивӕды минӕвӕрттӕ бафснайдтой цӕугӕ дӕтты былгӕрӕттӕ
4