Бынæттон дзул ног рецептмæ гæсгæ

Бынæттон дзул ног рецептмæ гæсгæ: Цхинвалы дзулфыцӕн комбинат уӕрӕх кӕны йӕ ассортимент

29
(ранӕуӕггонд 13:33 05.05.2021)
Дзулфыцæн комбинат фæстаг дыууæ азы бадзырдтæ сарæзта, бынæттон арендатортæй хæрзгъæд тыллæг чи æркæны, уыдонимæ æмæ сын балхæны сæ мæнæу. Скæнынц дзы дзул сæхи рецептмæ гæсгæ - ставд лæхурд ссадмæ бафтауынц зады ссад дæр æмæ дзы рауайы диссаджы дзул

ЦХИНВАЛ, 5 май – Sputnik, Дриаты Лейла. Цхинвалы дзулфыцæн комбинаты продукцийы ассортимент кæны уæрæхæй уæрæхдæр - ӕрæджы та райдыдтой дзулы ног хуыз уадзын. Уыцы дзул конд цæуы бынæттон мæнæуæй æмæ вæййы бæрæг адджындæр.

Дзулфыцæн комбинат фæстаг дыууæ азы бадзырдтæ сарæзта, бынæттон арендатортæй хæрзгъæд тыллæг чи æркæны, уыдонимæ æмæ сын балхæны сæ мæнæу. Мæнæу ссынц бынæттон куыройы. Цы ссад æркæнынц, уый сортыл нæ ныддихтæ кæнынц. Скæнынц дзы дзул сæхи рецептмæ гæсгæ - ставд лæхурд ссадмæ бафтауынц зады ссад дæр æмæ дзы рауайы диссаджы дзул.

"Дзул нырма конд цæуы цъус бæрцæй. Фæлæ ныридæгæн ссис бирæтæн уарзон, агурынц æй зæрдиагæй. Уымæ гæсгæ комбинат хъавы дзулы бæрц фæфылдæр кæнын", - зæгъы дзулфыцæн комбинаты магазины уæйгæнæг.

Уагдоны куыд банысан кодтой, афтӕмӕй сӕ бахъæудзæн ноджы цалдæр бадзырд саразын, Ленингоры районы мæнæуы куыст цы хæдзарадтæ кæнынц, уыдонимæ дæр.

Уыдонӕй дарддӕр ма комбинат аразы рагон ирон хӕринаг ӕмӕ нозт - задын æмæ къуымæл дæр. Уыдон дæр уадзынц бынæттон, экологон æгъдауæй сыгъдæг продукцийæ. Дыууæ продукт дæр арæзт цæуынц зæронд рецептмæ гæсгæ, æнæ æфтауæнтæй. Нæдæр сæм сой æмæ нæдæр сæкæр æфтаугæйæ. Зæгъынц, зæгъгæ, бирæтæ бафæрсынц, фаг адджындзинад сæм цæннæ ис, фæлæ сæм сæкæр æфтыд куы цæуа, уæд продукттæ натуралон нал уыдзысты. Медицинæ куыд амоны, афтæмæй задынæн ис игæр алыгъуызон шлактæй сыгъдæггæнæн хиæдтæ. Уымæ гæсгæ йæ фылдæр фелхæнынц игæр æмæ уыргты æнæниздзинад мæгуырау кæмæн у, ахæм адæймæгтæ.

Бынæттон дзул ног рецептмæ гæсгæ
© Sputnik / Дриаты Лейла
Бынæттон дзул ног рецептмæ гæсгæ

Куыд зонæм, афтæмæй рæстæгæй-рæстæгмæ Дæллаг Зæрæмæджы таможнæйы сæвзæры проблемæ уæзласæн машинæтæн, кæцытæ хæлцадон продукттæй ифтонг кæнынц республикæйы. Уый, куыд зонæм, афтæмæй, фыццаджыдæр, баст у Евразиаг таможнæйон цæдисы зæкъондæттынады фæткимæ, кæцы нæ амалиуæггæнджытæн у зын æххæстгæнæн.

Комбинат дзулæй канд горæты цæрджыты нæ ифтонг кæны, фæлæ Уæрæсейы æфсады 4-æм базæ æмæ Арæнхъахъхъæнджыты заставæты дæр. Ласынц æй республикæйы районтæм. Дзауы райцентрмæ алы бон дæр ласынц дзул сæрмагонд машинæтыл. Къуайса æмæ Знауырмæ – къуыри цыппар хатты. Ленингормæ æмæ йæ хъæутæм – къуыри æртæ-цыппар хатты. Цхинвалы районы хъæутæм та - æрвылбон дæр.

29
Ленингор

Хуссар Иры Ленингоры районы ссардтой нӕлгоймаджы мӕрдон буар

3
(ранӕуӕггонд 15:06 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты ӕууӕлтӕ.

3
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3