Цхинвалы ӕппӕт скъолатӕ райстой спортивон ифтонгад

Цхинвалы скъолатӕ райстой спортивон ифтонгад

16
(ранӕуӕггонд 10:41 12.05.2021)
Спортивон ӕрмӕг ӕлхӕд ӕрцыд Ахуырады министрады монон-фӕткӕвӕрдон нывӕзты фӕлгӕтты, скъолатӕн сӕхи куырдиаттӕм гӕсгӕ

ЦХИНВАЛ, 12 май - Sputnik, Плиты Фатимӕ. Хуссар Ирыстоны столицӕйы скъолатӕ иууылдӕр райстой спортивон ифтонгад Ахуырады министрадӕй, фехъусын кодтой Sputnik уагдоны пресс-службӕйы.

Спортивон ӕрмӕг ӕлхӕд ӕрцыд Ахуырады министрады монон-фӕткӕвӕрдон нывӕзты фӕлгӕтты, ахуырадон уагдӕттӕн сӕхи куырдиаттӕм гӕсгӕ.

"Цхинвалы ӕппӕт скъолаты разамынадтӕ ныффыстой развӕлгъау, цы спортивон ифтонгад сӕ хъӕуы, уый ӕмӕ сӕ уымӕй баххӕст кодтой. Сӕ нымӕцы шахматтӕ, шашкӕтӕ, гимнастикӕ, волейбол, баскетбол, спорты ӕндӕр хуызты ӕрмӕг. Ныр скъолатӕн сӕхи мидӕг уыдзӕн фадат спортыл цайдагъ кӕнынӕн", - загъта уагдоны пресс-секретарь Плиты Яна.

Уый бафтыдта, зӕгъгӕ, нывӕзтмӕ гӕсгӕ уал фыццаг рады ифтонг цӕуынц столицӕйы скъолатӕ.

 

16
Ленингор

Хуссар Иры Ленингоры районы ссардтой нӕлгоймаджы мӕрдон буар

3
(ранӕуӕггонд 15:06 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты ӕууӕлтӕ.

3
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3