Владивосток

Цхинвал ӕмӕ Владивосток ссисты ӕфсымӕрон горӕттӕ

4
(ранӕуӕггонд 12:42 12.05.2021)
Фарсытӕ ӕруынаффӕ кодтой дарддӕры ӕгуыстады перспективӕтыл видеобастдзинады руаджы ӕмӕ банысан кодтой, дӕрддзӕфдзинад кӕй нӕ бахъыгдардзӕн фӕстиуӕгджын ахастыты

ЦХИНВАЛ, 12 май - Sputnik, Гӕбӕраты Элина. Цхинвал ӕмӕ Владивостокы сӕргълӕуджытӕ бафыстой бадзырд горӕтты хсӕн ӕфсымӕрон бастдзинӕдтӕ сфидар кӕныны фӕдыл. Бафыссыны церемони ацыд ӕртыццӕджы видеобастдзинады режимы.

Владивостокы сӕргълӕууӕг Олег Гуменюк банысан кодта, зӕгъгӕ, дыууӕ горӕт кӕрӕдзимӕ дард кӕй сты, уый ницы зындзинӕдтӕ сӕвзӕрын кӕндзӕн ӕнгом бастдзинӕдтӕ райтынг кӕнынӕн.

"Ацы бадзырдӕй мах равдыстам, кӕй тырнӕм ӕввахс ахастытӕм. Уый махыл ӕвӕры серьезон бӕрндзинад, уымӕн ӕмӕ мах архайӕм ӕрмӕст нӕ горӕтты нӕ, фӕлӕ иумӕйагӕй нӕ бӕстӕты номӕй", - загъта Владивостокы мэр.

Йӕ уӕрӕсейаг коллегӕтӕн раарфӕ кодта Цхинвалы администрацийы сӕргълӕууӕг Коцты Алан ӕмӕ банысан кодта, ацы документы бафыст кӕй у историон цау.

"Махӕн тынг ӕхсызгон у, Владивастокы ӕрдхордон горӕтты нымӕцы ныр кӕй уыдзӕн горӕт-хъайтар Цхинвал дӕр. Цӕттӕ стӕм ӕмгуыстадмӕ ӕмӕ уӕм ӕнхъӕлмӕ кӕсӕм нӕ уазӕгуарзаг бӕстӕйы", - бахахх кодта уый.

Хуссар Ирыстоны фӕсарӕйнаг хъуыддӕгты министр Медойты Дмитрий дӕр равдыста ныфс, фарсытӕ кӕй ссардзысты иумӕйаг интерестӕ ӕмӕ ӕнтыстджынӕй ӕрӕвналдзысты ӕфсымӕрон ахастытӕ фидар кӕнынмӕ.

Бадзырд бафыссыны тыххӕй баныхастӕ горӕтты хсӕн цыдысты 2020 азы райдианӕй фӕстӕмӕ.

4
Ленингор

Хуссар Иры Ленингоры районы ссардтой нӕлгоймаджы мӕрдон буар

0
(ранӕуӕггонд 15:06 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты ӕууӕлтӕ.

0
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3