Фӕстаг дзӕнгӕрӕг Хуссар Иры

Фӕстаг дзӕнгӕрӕг Хуссар Иры айзӕлдзӕн 500-йӕ фылдӕр рауагъдонӕн

5
(ранӕуӕггонд 11:11 17.05.2021)
Хуссар Ирыстоны ахуырады министр радзырдта, куыд ацӕудзысты республикӕйы ахуыры азы фӕудӕн нывонд бӕрӕгбонон мадзӕлттӕ

ЦХИНВАЛ, 17 май – Sputnik, Козаты Диана. Хуссар Ирыстоны ацы аз скъолатӕ фӕуыдзысты фондзсӕдӕйӕфылдӕр рауагъдоны, фӕстаг дзӕнгӕрӕг уыдонӕн айзӕлдзӕн 25 майы, фехъусын кодта Sputnik ахуырады министр Гасситы Натали.

Ивгъуыд аз астӕуккаг скъолатӕ республикӕйы фесты 468 рауагъдоны.

"Фӕстаг дзӕнгӕрӕг скъоладзаутӕн айзӕлдзӕн 25 майы, ацы аз скъола фӕуыдзысты 519 иуӕндӕсӕмкъласоны", - загъта Гасситы Натали.

Министры ныхӕстӕм гӕгӕ, уыцы бон республикӕйы алкӕцы скъолайы дӕр ацӕудзысты традицион цытджын линейкӕтӕ, изӕры та Цхинвалы Театралон фӕзуаты ауадздзысты бӕрӕгбонон концерт Ирыстоны хуссар  ӕмӕ цӕгаты стъалыты хайадистӕй.

Уый ма зӕрды ӕрлӕууын кодта, зӕгъгӕ, цалдӕр азы размӕ Ахуырады министрады коллеги цы скъуыддзаг рахаста, уымӕ гӕсгӕ 25 майы рауагъдон банкеттӕ сты тобӕгонд.

"25 майы сывӕллӕттӕ нырма скъола нӕ фесты, разӕй сӕм ӕнхъӕлмӕ кӕсынц экзаментӕ. Ома уыдон нырма сты скъоладзаутӕ, ӕмӕ скъоладзауты хайадистӕй банкеттӕ аразын та бынтон раст нӕу", - бахахх кодта Гасситы Натали.

Уый ма фехъусын кодта, 11-къласонтӕн рауагъдон бал кӕй фӕнд кӕнынц ауадзын иу мӕй фӕстӕдӕр - 25 июны. Йӕ бацӕттӕ кӕнын, раздӕрау, бакодтой Сывӕллӕтты сфӕлдыстадон галуаны бӕрны.

"Бӕрӕгбонон мадзалы фӕлгӕтты рауагъдонтӕ цытджын уавӕры рацӕудзысты сырх гауызыл, уыдонӕн цӕттӕ кӕнынц хиирхӕфсӕн программӕ. Изӕры та сын театры залы ацӕудзӕн концерт", - радзырдта ахуырадон уагдоны сӕргълӕууӕг.

Фӕстаг дзӕргӕрӕджы цытӕн бӕрӕгбонон мадзӕлттӕ ацӕудзысты республикӕйы 53 астӕуккаг скъолайы.

5
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

2
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

2
Цхинвалы паддзахадон ӕртагкӕнӕн станц

Хуссар Иры азы райдианӕй фӕстӕмӕ дыккаг хатт схызт ӕртаджы аргъ

4
(ранӕуӕггонд 14:39 15.06.2021)
Унитарон куыстуат "Югосетнефтепродукт" дыццӕгӕй ӕртаг уӕй кӕны ног ӕргътӕм, хисӕрмагонд ӕртагкӕнӕн станцты та фӕфылдӕргон тарифтӕ бахастой цалдӕр боны размӕ

ЦХИНВАЛ, 15 июн – Sputnik, Козаты Диана. Хуссар Ирыстоны паддзахадон ӕртагкӕнӕн станцты АИ-92 бензины аргъ схызт ӕртӕ сомы, ныр йӕ литр уӕй цӕудзӕн адӕмӕн 43 сомӕй, уагдӕттӕн та - 45 сомӕй.

Азы райдианӕй бензины аргъ фӕфылдӕр ныр дыккаг хатт. Уалдзӕджы ӕргътӕфӕфылдӕр сты цыппар сомы (36-ӕй ӕртаг схызт 40 сомы онг). Фӕлӕ кӕд уалдзӕджы дизелон ӕртаджы аргъ не схызт, уӕд абонӕй фӕстӕмӕ та фӕзынаргъдӕр ис иу сом - ныр у 44 сомы, фехъусын кодта "Югосетнефтепродукт"-ы гендиректор Джыгкайты Сослан.

"Ӕртаджы ӕргъты фӕфылдӕр аххосаг у, ӕввонггӕнджытӕм дӕр кӕй фӕзынаргъдӕр ис, уый", - бамбарын кодта уый.

Республикӕйы хицауады дӕр ӕрхастой ацы аххосаг ӕртаджы фӕзынаргъы тыххӕй.

Хисӕрмагонд ӕртагкӕнӕн станцты, кӕй зӕгъын ӕй хъӕуы, бензин ӕмӕ дизелон ӕртаджы аргъ у зынаргъдӕр паддзахадонтӕм абаргӕйӕ.

Частная автозаправка в Цхинвале
© Sputnik / Диана Козаева
Цхинвалы хисӕрмагонд ӕртагкӕнӕн станц
4