Уæрæсейаг герпетологтæ

Уæрæсейаг зонадон кусджытæ ахуыр кæнынц Хуссар Иры герпетологи

33
(ранӕуӕггонд 14:08 28.05.2021)
Зынгæ биолог Габайты Владимиры ныхæстæм гæсгæ, Хуссар Ирыстоны сахуыркæнинаг æрмæг ис бирæ - дырысӕй бӕрӕг не сты хæфсыты, гæккуырты æмæ æндæр мыггæгты хуызтæ республикӕйы

ЦХИНВАЛ, 28 май — Sputnik, Плиты Фатимæ. Уæрæсейаг герпетологты къорд бакусдзæн Хуссар Ирыстоны хилджытæ æмæ амфибиты хуызтæ сахуыр кæныныл. Зындгонд биолог æмæ телеамонæг Габайты Владимир куыд фехъусын кодта Sputnik, афтæмæй  æртæ зонадон кусæджы æрзылдысты республикæйы хицæн къуымтыл æмæ семæ ахастой ахуыр кæнынæн æрмæг.

Габайты Владимир йæхæдæг дæр бамбал ис уазæг ахуыргæндтимæ сæ балцы Хуссар Ирыстоныл.

"Уый уæрæсейаг специалисттæн у сæ радон æрцыд. Уазджыты нымæцы уыдысты дыгурæй æрцæугæ ахуыргонд, биологон зонæдты кандидат, Хуссар Иры "Сырх чиныджы æмавтор Лотиты Константин. Йæ ном зонады дунейы айхъуыст ног хъæстæ калмы бакондæй, кæцы хæссы ахуыргонды ном – "Гадюка Лотиева". Йемæ ма уыд æвзонг генентик Полина Джелеали, кæцы ахуыр кæны хилæгты сæ къæдзилтæм гæсгæ. Афтæ уый сахуыр кæндзæн гæккуыры биографи, йæ равзæрд, цы регионы цæры", - радзырдта Габайты Владимир.

Ахуыргæндтæ æрзылдысты Цхинвалы районыл, Рукъгом æмæ Урс Туалтыл, Чъех æмæ æндæр хъæутыл, федтой Жриайы карджын заз.

"Уазджыты куыстæн æмархайд кодтой бынæттон цæрджытæ. Ӕз æмæ сæ мæ чызг Зæлинæ æрзилын кодтам Хуссар Иры къуымты. Уый фæстæ сын Цхинвалы районы хистæры хæдивæг Бибылты Валерий фенын кодта æвæрд бынæттæ. Ӕрфысым сæ кодта Цхинвалы цæрæг Тасойты Юрий", - бафтыдта уый.

Хуссарирыстойнаг биологы ныхæстæм гæсгæ, ахуыргондтæ ноджы фæнд кæнынц æрцæуын Цхинвалмæ. Уый бахахх кодта, Хуссар Ирыстоны сахуыркæнинаг æрмæг бирæ кæй ис - дырысӕй бӕрӕг не сты хæфсыты, гæккуырты æмæ æндæр мыггæгты хуызтæ республикӕйы.

33
Ленингор

Хуссар Иры Ленингоры районы ссардтой нӕлгоймаджы мӕрдон буар

2
(ранӕуӕггонд 15:06 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты ӕууӕлтӕ.

2
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3