Ӕвзонг техникты станц

Цхинвалы ӕвзонг техникты станц ауадздзӕн мастер-класстӕ Сывӕллӕтты хъахъхъӕныны бон

13
(ранӕуӕггонд 09:38 01.06.2021)
Мастер-класстӕ ӕмӕ равдыстӕй дарддӕр, сывӕллӕттӕм ӕнхъӕлмӕ кӕсынц алыгъуызон хъӕзтытӕ, кӕцытӕ сарӕзтой ӕвзонг техниктӕ

ЦХИНВАЛ, 1 июн — Sputnik, Хъуылымбегты Зӕлинӕ. Цхинвалы ӕвзонг техникты станцы ацӕудзысты алыгъуызон кружокты специалистты мастер-класстӕ, фехъусын кодта Sputnik ӕвзонг техникты станцы директор Калаты Нариман.

Йӕ ныхӕстӕм гӕсгӕ, Сывӕллӕтты хъахъхъӕныны бонӕн нывонд мадзал ацӕудзӕн станцы кӕрты 16.00 сахатыл.

"Мастер-класстӕ ацӕудзысты нывӕфтауын, робототехникӕ, хъӕдӕрмӕгыл зынгӕй ныв кӕнын, зырнгусӕджы хъуыддагӕй. Ноджы ма нӕм ацӕудзӕн равдыст, цы ран бавдисдзысты ӕвзонг мастерты куыстытӕ", - банысан кодта Калаты Нариман.

Ӕвзонг техникты станцы директор бахахх кодта, мастер-классты фӕстӕ сывӕллӕтӕм кӕй ӕнхъӕлмӕ кӕсынц алыгъуызон хъӕзтытӕ, кӕцытӕ сарӕзтой станцы ахуырдзаутӕ, сӕ нымӕцы "Ханойская башня". Ацы хъазт у тынг популярон рӕзгӕ фӕлтӕры хсӕн. Уымӕй дарддӕр ма бавдисдзысты хъазт "доска-лабиринт".

Мастер-классты рӕстӕджы хъӕдӕрмӕгӕй цы куыстытӕ саразой, уыдон сывӕллӕттӕ ахӕсдзысты семӕ куыд зӕрдылдарӕн лӕвӕрттӕ.

13
Ленингор

Хуссар Иры Ленингоры районы ссардтой нӕлгоймаджы мӕрдон буар

5
(ранӕуӕггонд 16:08 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты аххосæгтӕ.

5
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3