Нагутни

Хуссар Иры санаторий "Ныфс" рауӕрӕх кӕндзӕн хоскӕныны фадӕттӕ

22
(ранӕуӕггонд 16:29 10.06.2021)
Мӕйы кӕрӕттӕм донхосгӕнӕндонмӕ хӕццӕ кӕндзӕн электрон хахх, фӕстӕдӕр дзы фӕзындзӕн мобилон бастдзинад, интернет ӕмӕ хоскӕныны ног фадӕттӕ

ЦХИНВАЛ, 10 июн – Sputnik, Плиты Фатимӕ. Хуссар Ирыстоны Знауыры районы Нагутнийы хъӕуы уӕвӕг донхосгӕнӕндон "Ныфс" фӕфӕстиад кӕндзӕн йӕ баконд, фӕлӕ уыдзӕн ног рауӕрӕхгонд фадӕттимӕ, фехъусын кодта Sputnik санаторийы хистӕр Чилӕхсаты Владимир.

Ӕрвылаз "Ныфс" бакӕны улӕфджытӕн йӕ дуӕрттӕ 20 июны, ацы аз ӕй аргъӕвтой мӕйы кӕронмӕ - цалынмӕ улӕфӕндон ифтонг ӕрцӕуа электрон рухсӕй.

"Ныридӕгӕн кусджытӕ активон темптӕй кусынц, архайы дзы ӕртӕ бригадӕйы. Республикӕйы разамынад бацархайдта, цӕмӕй улӕфӕндоны уавӕртӕ рауӕрӕх уой. Рухсы фӕстӕ ныфс дӕттынц скусын кӕнын мобилон бастдзинад ӕмӕ интернет", - загъта санаторийы хистӕр.

Уый ма бафтыдта, электроэнергийы фӕзынд улӕфӕндоны кӕй бакӕндзӕн хоскӕныны ног фадӕттӕ.

"Ног фадӕттӕн ифтонгад дӕр у цӕттӕ, ӕнхъӕлмӕ кӕсӕм электронон хаххыл куыстыты фӕудмӕ", - бахахх кодта Чилӕхсаты Владимир.

Донхосгӕнӕндонмӕ электрон рухс бауадзыныл рагӕй дзырдтой. Ныр йын бантыст балхынцъ кӕнын. Электронон лини цӕуы 10 километры дӕрддзӕф сыхаг хъӕуӕй.

22
Ленингор

Хуссар Иры Ленингоры районы ссардтой нӕлгоймаджы мӕрдон буар

5
(ранӕуӕггонд 16:08 15.06.2021)
Прокуратурӕ сгары цауы ӕууӕлтӕ, районы цӕрӕджы мӕлӕты аххосаг нырма бӕрӕг нӕу

ЦХИНВАЛ, 15 июн – Sputnik, Хъуылымбегты Азӕмӕт. Ленингоры районы йӕ хӕдзары кӕрты ссардтой 70-аздзыд бынӕттон цӕрӕджы мӕрдон буар, фехъусын кодта Sputnik районы прокуратурӕйы фӕдагурӕг Бязырты Алан.

Йӕ ныхӕстӕм гӕсгӕ, амӕлӕты аххосаг нырма бӕрӕг нӕу, уагъд цӕуы экспертизӕ. Социалон хызӕгты фӕзынд хъусинаг, ома нӕлгоймаг ӕрӕджы ӕрыздӕхт Гуырдзыстонӕй ӕмӕ хъуамӕ уыдаид карантиныл районы рынчындоны.

"Ацы нӕлгоймаг карантиныл кӕй хъуамӕ уыдаид, уый фӕдыл мӕм информаци нӕй. Уый уыд куырм ӕмӕ гӕнӕн ис ахаудаид, фӕлӕ уый у развӕлгъау верси, нырма хъуамӕ ауадзой экспертизӕ", - загъта Бязырты Алан.

Барадхъахъхъӕнӕг органтӕ бӕрӕг кӕнынц нӕлгоймаджы амӕлӕты аххосæгтӕ.

5
COVID-19

Хуссар Иры санитарон уагдоны радзырдтой COVID-19-ы статистикӕйы тыххӕй

3
(ранӕуӕггонд 14:38 15.06.2021)
Хуссар Ирыстоны пандемийы райдианӕй фӕстӕмӕ коронавирусӕй фӕрынчын сты 3372 адӕймаджы, ныртӕккӕ дохтырты хъусдарды бын сты 34 пациенты

ЦХИНВАЛ, 15 июн - Sputnik, Гӕбӕраты Элина. Хуссар Ирыстоны ивгъуыд майрӕмбоны коронавирусон инфекци рабӕрӕг ис фондз адӕймагӕн, фехъусын кодта Sputnik сӕйраг санитарон дохтыр Коцты Марина.

Уый бамбарын кодта, улæфт бонты "Югосетпотребнадзор"-ы ПЦР-лабораторийы кæй нæ сарæзтой тесттæ, къуырисæры  иртæстты тыххæй та фехъусын кæндзысты сом райсом.

"Югосетпотребнадзор"-ы бӕрӕггӕнӕнтӕм гӕсгӕ, COVID-19 рабӕрӕг кӕныны фӕдыл майрӕмбоны сарӕзтой 50 тесты, уыдонӕй фондз адӕймагӕн схаудта вирусы уӕвынад", - загъта Коцты Марина.

Санитарон уагдоны ПЦР-лабораторийы пандемийы рӕстӕджы ӕдӕппӕт сарӕзтой 23246 тесты коронавирусон инфекци рабӕрӕг кӕныны фӕдыл, уыдонӕй 3 372 радтой ӕвӕрццаг фӕстиуӕг.

Уагдоны сӕргълӕууӕг ма бафтыдта, пандемийы рӕстӕджы сӕнӕнизуӕвджыты иумӕйаг нымӕц кӕй схызт 3338 онг. Дохтырты хъусдарды бын ма стационарон ӕмӕ амбулаторон хоскӕнынадыл сты 34 адӕймаджы.

3