ХИПУ

Уæлахизæн кад æмæ хæсты ног сыфтæ: ХИПУ ацыд Стыр Фыдыбӕстон хӕстæн нывонд конференци

22
(ранӕуӕггонд 16:03 21.06.2021)
Организатортӕ, уазджытӕ ӕмӕ докладкӕсджытӕ сæ раныхасты иууылдӕр сидынц Стыр Уӕлахизы кад хъахъхъӕнын ӕмӕ зӕххыл ма руадзын ахӕм фыдбылыз ногæй

ЦХИНВАЛ, 21 июн — Sputnik, Плиты Фатимӕ. Хуссар Ирыстоны паддзахадон университеты йӕ куыст райдыдта зонадон-практикон конференци "80 лет начала Великой Отечественной войны".

Мадзалы хайад исынц зонадон кусджытӕ, ХИПУ-йы ахуыргӕнджытӕ ӕмӕ уазджытӕ, сӕ нымӕцы Уӕрӕсейы минӕвар Хуссар Ирыстоны Марат Кулахметов ӕмӕ РХИ Коммунистон партийы раздзог Коцты Станислав.

Организатортӕ, уазджытӕ ӕмӕ докладкӕсджытӕ сæ раныхасты иууылдӕр сидынц Стыр Уӕлахизы кад хъахъхъӕнын ӕмӕ зӕххыл ма руадзын ахӕм фыдбылыз ногæй.

Ахуырадон уагдоны ректор Тедеты Вадимы ныхӕстӕм гӕсгӕ, ивгъуыд аз, пандемимӕ ӕнӕкӕсгӕйӕ, ХИПУ Стыр Уӕлахизы юбилей банысан кодта уæрæхæй.

"Уагътам культурон-массон мадзӕлттӕ. Стыр куыст бакодта ЮОГУ ТВ. Уымæй дарддæр ма мах паспорттæ бацæттæ кодтам Хуссар Ирыстоны уæвæг Стыр Фыдыбӕстон хӕсты цыртытæн. Фӕстӕдӕр сараздзыстæм фӕндагон картӕ", - загъта уый.

Тедеты Вадим ма бузныг загъта ХИПУ-йы ахуыргӕнджытӕн, кӕцытӕ амонынц Уӕрӕсейы ӕмӕ Фыдыбӕстон истори студенттӕн.

Уӕрӕсейы минӕвар Хуссар Ирыстоны Марат Кулахметов банысан кодта, абон дунейы кӕй ныллӕг кæнынц Советон цӕдисы кад ӕмӕ бынат.

"80 азы фӕстӕ истори хъавынц ивынмӕ. Советон цӕдис нӕ уыд цӕттӕ уыцы стыр хӕстмӕ, блицкригы план райста ӕрмӕст 1945 азы. Советон цӕдисы адӕмӕн бантыст басӕттын немыцаг фашизм. Советон адӕмы фӕрцы сӕвзӕрд антигитлерон коалици. Стырӕй - гыццылӕй архайдтой, чи хӕцӕнгарзӕй, чи та æхсырфæй ӕввахс кодта уӕлахиз. Сӕ нымӕцы Хуссар Ирыстоны адӕм дӕр", - загъта минӕвар.

Хуссар Ирыстоны паддзахадон университеты историйы ахуыргӕнӕг, профессор Гатыгкоты Гиви йӕ доклады ӕрдзырдта хӕсты зиӕнттыл.

"Советон цӕдисы 1927 азы гуырд ӕфсӕддонтӕй сӕдӕ адӕймагӕй хӕсты аирвӕзт ӕрмӕстдӕр иу", - ӕрхаста ахуыргонд ӕрхӕндӕг статистикӕ.

Хуссар Ирыстоны Стыр Фыдыбæстон хӕсты æнæзонгæ хъайтарты тыххӕй та ӕрдзырдта историк Джиоты Мурӕт.

"Фыццаг сылгоймаг, кӕцыйы (1941 азы августы) бавдыстой Советон цӕдисы хъайтары номмӕ, уыд Салбиты Вера. Мӕ хион, Джиоты Лабаз Захары фырт, уый уыд партизанты отряды разамонӕг Белорусийы. Йӕ мӕлӕты фӕстӕ йӕ отрядӕн радтой йӕ ном, уый уыд фыццаг ахӕм цау СФХ. 1943 азы 3 июны амард, дыккаг бон ӕй бавдыстой Советон цӕдисы хъайтары номмӕ", - загъта йæ раныхасы уый.

Историк ма банысан кодта, йӕ номдзыд хӕстӕгыл кӕй ӕмбырд кӕны ӕрмӕг, уымӕн ӕмӕ уый бирӕ хъуыддӕгты уыд фыццаг. Хъыгагӕн уый нӕй ирӕтты номхыгъды, кӕцыты бавдыстой хъайтарты номмӕ, фӕлӕ сӕ нӕ райстой хицӕн аххосӕгтӕм гӕсгӕ.

22
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

14
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

14
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

18
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

18
Бесаты Дана

Бесаты Дана: ирон зарæг адæймаджы удæн дæтты тых

0
(ранӕуӕггонд 13:24 30.07.2021)
Музыкант, скърипæйæдзæгъдæг, къорд "Монзæл"-ы уæнг Бесаты Дана радио Sputnik Хуссар Ирыстоны эфиры радзырдта, ирон зарæгæн цы нысаниуæг ис йӕ царды, уый тыххæй
Бесаты Дана: ирон зарæг тых дæтты адæймаджы удæн

Фæстаг æзты Ирыстоны прогрессивон фæсивæд йæ хъусдард аздæхта ирон зарæгмæ. Музыкант Бесаты Данайы хъуыдымæ гæсгæ, уымæн йæ аххосаг у генетикæ.

"Æвæццæгæн, уый генетикæимæ дæр у баст, уый тыххæй ӕмæ адæймагæн йæ миддунемæ хæстæг цы уа, уымæ æлвасы йæхи. Ирон зарæг тых дæтты ирон адæймаджы удæн, цардмæ разæнгард кæны æмæ йæм энерги фæзыны", - загъта Дана.

Музыкант куыд банысан кодта, уымæ гæсгæ ирон зарæджы уыд бирæ æнæивгæ традицитæ дзæвгар рæстæг æмæ уый тыххæй фæсивæд сæхи иуварс кодтой уыцы зарджытæй.

"Англисаг æмæ уырыссаг æвзагыл бирæтæ зарынц, минтæ мæ минтæ дунейы мидæг, æмæ уыдон æхсæн англисагау куы азарай, уæд ницæмæй равдисдзынæ дæхи, уый уыдзæн мин фыццӕгæм зарæг. Ирон æвзаг та у экзотикон æвзаг днейы, ничи йæ зоны, афтæ ирон музыкæйы дæр ис индивидуалон зæлтæ, æмæ уыцы мелоди æндæр жанримæ куы сбæттай, уæд дзы райгуыры ног здæхт музыкæйы", - бафиппайдта Дана.

Уый бахахх кодта, алы музыкантæн дæр кæй у ахсджиаг уникалон уæвын, цæмæй макæй хуызæн уа йæ аивад.

0
Темӕтӕ:
Радио иронау