Стыр парк

Давынц дидинджытӕ, сӕттынц рухсытӕ: вандалты къухвӕд Цхинвалы "Стыр парчы"

90
(ранӕуӕггонд 14:29 22.06.2021)
Горӕты цӕрджытӕ домынц, цӕмӕй парчы сӕвӕрой видеокамерӕтӕ ӕмӕ ахӕм ӕдзӕсгом адӕймӕгтӕ карзӕй ӕфхӕрд цӕуой

ЦХИНВАЛ, 22 июн — Sputnik, Дриаты Лейла. Хуссар Ирыстоны столицӕйы Хуыбылты Валерийы номыл фæлладуадзæн парк цæрджытæн у иууыл уарзондæр фæлладуадзæн бынат. Æрвылбон дæр "Стыр парчы" бынæттон цæрджытæ фæтезгъо кæнынц, сæ фæллад уадзынц æд сывæллæттæ. Уыдон хæрзиуæгæн дзы арæзт æрцыд сæрмагонд фæндаг, сæвæрдтой дзы быронкалæнтæ, бандæттæ, электроны цырæгътæ, рæсугъддзинад цæстытæ сæхимæ здахынц.

Гъе, фæлæ сын сæ аивдзинадыл нæ ауæрдынц хицæн адæймæгтæ æмæ сæ фыдуынд кæнынц. Пырх кæнынц фонарьты, быронкалæнты, бандæтты. Сӕ бырон бырондонмæ нæ фæхæццæ кæнынц, фæлæ сæ кæмфæндыдæр аппарынц.

"Адæмы цинæн кæрон нал уыд, куы йӕ сарӕзтой, уӕд. Ног фæлладуадзæн бынатмæ цæрджытæ рагæй æнхъæлмæ кастысты. Ныр дзы сæ рæстæг пайдаимæ æрвитынц куыд сывæллæттæ, афтæ хистæр кары адæм дæр. Фæлæ йӕ цӕмӕн пырх кӕнӕм? Æндæр горæтты дæр кæнынц ахæм митæ, фæлæ уыдоны рабæрæг кæнынц видеокамерæты фæрцы æмæ сæ бафхæрынц, бæрндзинадмæ сæ æркæнынц", - зæгъы горæты цæрæг Тыбылты Верæ.

Большой парк
© Sputnik / Фатима Плиева
Стыр парк

Цхинвалы дæр бирæ уынгтыл конд ис видеокамерæтæ, фæлæ, ӕвӕццӕгӕн, нырма уыцы фадат нæй, цæмæй сӕ алы сквер æмæ улæфæн бынаты дæр сӕвӕрой.

"Парчы тезгъогæнгæйæ, мæ цæст схæцыд, газоны цы уардитæ сагъд ис, уыдонæй цалдæр къутæр чидæр куыд фелвæста æмæ сын сæ сыджыт та тезгъогæнæн тротуартыл куыд ныппырх кодта", - дзуры сылгоймаг.

Уардитӕ сагъд æрцыдысты æрæджы æхсæнадон-экологион организаци "Зеленая Алания"-йы руаджы. Ӕмӕ ахæм бынæтты уыцы рæсугъддзинад халынмæ кæй къухтæ æххæссынц, уыдон хъуамӕ цӕрджыты раз дӕр ӕмӕ сӕ ныссадзджыты раз дӕр ӕмбӕлон дзуапп раттикой.

90
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

10
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

10
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

16
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

16