Хуссар Иры фӕсивӕдон комитет ауагъта фыццаг экоакци ацы аз

Уавӕр нӕ ивы: Хуссар Иры фӕсивӕдон комитет ауагъта фыццаг экоакци ацы аз

15
(ранӕуӕггонд 15:02 24.06.2021)
Ахӕм акцитӕ уагъд цӕуынц ӕрвылаз. Ацы аз уыдон райдыдтой фӕстӕдӕр – фыццаг ссыгъдӕг кодтой Сывӕллӕтты дзуары территори. Фидӕн акци райдайдзӕн ног къуыри Хуссар Ирыстоны Знауыры районы

ЦХИНВАЛ, 24 июн – Sputnik, Тъехты Дзерассӕ. Хуссар Ирыстоны фӕсивӕдон политикӕ ӕмӕ спорты фӕдыл комитет ауагъта фыццаг экологион акци ацы аз Сывӕллӕтты дзуары территорийыл, радзырдта Sputnik уагдоны сӕрдары хӕдивӕг Гатыгкоты Валентина.

"Фӕнды мӕ банысан кӕнын, фарон сӕрд мах кӕй ӕфснайдтам ацы ран. Ацы аз, акцийы размӕ, мах ацыдыстыӕм бынат фенынмӕ, ӕмӕ уавӕр нӕ фӕивта - уыд дзы бырӕ бырон" – загъта Гатыгкоты Валентина.

Йӕ ныхӕстӕм гӕсгӕ, ницы мадзӕлттӕ уромынц адӕмы ӕрдз чъизи кӕнынӕй.

Гатыгкоты Валентина бахахх кодта, ӕрдз чъизи кӕнынӕй бахъахъхъӕнынӕн кӕй хъӕуы сӕвӕрын видеоцӕстдарды камерӕтӕ.

"Цӕст дарын ахӕм адӕммӕ, ивар сӕ кӕнын, гӕнӕн ис сӕ ӕвдисын социалон хызӕгты ӕмӕ телеуынынады дӕр. Дыууӕ-ӕртӕ ахӕм цауы, ӕмӕ эффект фӕзындзӕн", - бафтыдта уый.

Комитеты сӕрдар ма фехъусын кодта, фидӕн экологион акци уыдон нывӕндынц ауадзын ног къуыри – хайадисджытӕ ацӕудзысты Знауыры районмӕ ӕмӕ ссыгъдӕг кӕндзысты Пронейы донбылгӕрӕттӕ.

15
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

10
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

10
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

16
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

16