Битеты Фатимӕ

Цхинвайлаг ӕвзонг сылгоймаг фервӕзын кодта сабийы дӕлдонӕй горӕты цады

194
(ранӕуӕггонд 16:13 06.07.2021)
Дыууӕ чысыл ӕфсымӕры ивгъуыд сабаты сӕхи надтой Цхинвалы цады, лӕппутӕй хистӕр фӕтыхст ӕмӕ ацыд доны бынмӕ

ЦХИНВАЛ, 6 июл — Sputnik, Плиты Фатимӕ. Цхинвалы цӕрӕг ӕвзонг сылгоймаг Битеты Фатимӕ фервӕзын кодта чысыл лӕппуйы горӕты цады, кӕцы доны хъазгӕйӕ фӕцӕйныгъуылд.

Ивгъуыд сабаты фыдбылыз хӕрзхӕстӕг бахъуызыд Цхинвалы Фаллагфарс районы цӕрӕг бирӕсывӕллонджын бинонтӕм.

"Уыцы бон мӕ рад нӕ уыд, фӕлӕ мын ӕй куыд радзырдтой, афтӕмӕй дыууӕ ӕфсымӕры хъазыдысты цады доны. Иуыл дзы уыд ирвӕзынгӕнӕг дарӕс, аннӕ та уыд ӕнӕ уымӕй. Хистӕр фӕтыхст ӕмӕ доны бынмӕ ацыд. Цалынмӕ ирвӕзынгӕнӕг цыд, уӕдмӕ сылгоймаг фӕразӕй ӕмӕ систа сабийы", - радзырдта ирвӕзынгӕнӕг-радгӕс.

Битеты Фатимӕ цӕры Цхинвалы Мамсырайы фырты уынгыл, изӕрыгон йӕ зӕнӕгимӕ ацӕуы улӕфӕн бынат - горӕты цады цурмӕ.  Фатимӕ профессимӕ гӕсгӕ у фармацевт, фӕлӕ йӕ сабибонты бирӕ рӕстӕг ӕрвыста Леуахийы былыл ӕмӕ хорз арӕхсы ленк кӕнынмӕ.

"Фыццаг сӕм куы фӕкомкоммӕ дӕн, уӕд мӕм афтӕ фӕкаст, цыма хъазгӕ кӕнынц, иу дзы иннӕйы 'ккой бырыд. Кӕстӕр, кӕцы уыд ирвӕзынгӕнӕг жилеты, стыхст ӕмӕ йӕ атъӕпп кодта ӕмӕ фӕхъӕр кодта "мама", иннӕ ныккуыдта ӕмӕ доны бынмӕ ацыд. Уӕд бамбӕрстон хъуыддаг бӕллӕх у", - радзырдта Sputnik Фатима.

Фатимӕ уайтагъд багӕпп кодта донмӕ ӕмӕ сласта сывӕллоны.

"Къабайы уыдтӕн фӕлӕ мӕ уый дӕр айрох, мӕ дзабыртӕ дӕр ахаудтой. Фӕлӕ сывӕллоны тагъд фелвӕстон донӕй, стӕй нӕм уӕдмӕ ӕххуысмӕ фӕзынд ирвӕзынгӕнӕг дӕр. Лӕппу аирвӕзт ӕрмӕст тасӕй", - бафтыдта уый.

Городское озеро
© Sputnik / Natalia Airiyan
Городское озеро

Ӕвдисӕнтӕ куыд дзурынц, афтӕмӕй лӕппуты мад уыцы рӕстӕджы архайдта йӕ ӕнахъом сабиимӕ.

Горӕты цады цур ӕдзух рады лӕууы ирвӕзынгӕнӕг, цӕмӕй улӕфӕн бынаты фыдбылыз ма 'рцӕуа.

194
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

8
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

8
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

13
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

13