COVID-19-ы ныхмӕ оперштабы рабадт

Маскӕтӕ, дезинфекци, дистанционкӕ: цы аскъуыддзаг кодта COVID-19-ы ныхмӕ оперштаб

11
(ранӕуӕггонд 15:11 07.07.2021)
Республикӕйы фӕстаг бонты фылдӕр кӕны коронавирусӕй рынчынкӕнынад. Сӕйраг санитарон дохтыр знон фехъусын кодта COVID-19-ы дыккаг уылӕны тыххӕй Хуссар Ирыстоны

ЦХИНВАЛ, 7 июл - Sputnik, Козаты Диана. Хуссар Ирыстоны коронавирусӕй рынчынты нымӕц кӕй фылдӕр кӕны, уый фӕдыл COVID-19-ы ныхмӕ тох кӕныны фӕдыл оперативон штаб райста цалдӕр скъуыддзаг ӕмӕ рекомендацийы, цӕмӕй инфекци дарддӕр ма парахат кӕна.

Оперативон штабы рабадт ацыд ӕртыццӕджы президент Бибылты Анатолий къухдариуӕгады бын.

"Мах иууылдӕр уынӕм, вирус ногӕй кӕй тыхджын кӕны. Ӕмӕ мах хъуамӕ алцыдӕр саразӕм, цӕмӕй бавӕрӕм не ‘мбӕстӕгтӕ цӕрдтӕ ӕмӕ ма ‘руадзӕм инфекцийы апарахат", - загъта президент.

Паддзахады сӕргълӕууӕг ӕрсидт цӕрджытӕм, цӕмӕй саразой вакцинӕ ӕмӕ бахъахъхъӕной сӕхи ӕмӕ сӕ хиуӕтты.

Бибылты Анатолий банысан кодта, фӕстаг бонты коронавирусы тыххӕй сӕ цӕрдтӕй ахицӕн сты республикӕйы цалдӕр ӕмбӕстаджы.

Оперативон штабы скъуыддзагмӕ гӕсгӕ, алкӕцы уагдоны дӕр рекомендаци кӕнынц сӕвӕрын "бахизӕн фильтр" тӕвд барынимӕ, бакӕнын маскӕты ӕмӕ дезинфекцион режим.

Афтӕ ма хистӕртӕн куыстӕй ссӕрибар кӕныны бар ис ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Уымӕй дарддӕр оперативон штаб тобӕ сӕвӕрдта боны уӕвынады режимимӕ сывӕллӕтты лагеры организацийыл. Рекомендациты ис арӕнӕвӕрдтӕ массон мадзӕлттӕм цӕуыныл дӕр.

Ӕнӕниздзинад хъахъхъӕнынады министрадӕн бахӕс кодтой бацӕттӕ кӕнын медицинон уагдӕттӕ пациентты райсынмӕ.

Президент ма бахӕс кодта санитарон уагдон ӕмӕ информацийы фӕдыл комитетӕн активонӕй дӕр уадзын ӕмбарынгӕнӕн ӕмӕ информацион куыст цӕрджыты хсӕн.

11
Автотрассӕ Цхинвал-Дменисыл фӕндагон-транспортон цау

Хуссари Иры ӕрцыд авари: ис зианбаййафджытӕ

10
(ранӕуӕггонд 10:59 31.07.2021)
Фӕндагон бӕллӕххы фӕстиуӕгӕн фӕцӕфуӕвджыты баластой республикон рынчындонмӕ буары алыгъуызон цӕфтимӕ

ЦХИНВАЛ, 31 июл - Sputnik. Автотрассӕ Цхинвал-Дменисыл майрӕмбоны изӕры ӕрцыд фӕндагон-транспортон цау, уый фӕстиуӕгӕн бахъыгдард сты дыууӕ адӕймаджы, хъусын кӕны республикӕйы МХМ пресс-службӕ.

"Авари ӕрцыд 21:00 сахатмӕ ӕввахс автотрассӕ Цхинвал-Дменисыл. Развӕлгъау бӕрӕггӕнӕнтӕм гӕсгӕ, хӕдтулгӕ ВАЗ-2109 фехӕлдта фӕндагон змӕлды фӕтк ӕмӕ сӕмбӕлд машинӕ Toyota Prado", - дзырдӕуы хъусинаджы.

Фӕндагон бӕллӕхы фӕстиуӕгӕн бахъыгдард сты дыууӕ адӕймаджы, уыдон буары алыгъуызон цӕфтимӕ фӕхӕццӕ кодтой РБМЦ. 

Уагдоны банысан кодтой, цауы бынаты кӕй кусынц ПАИ минӕвӕрттӕ, уыдон бӕлвырд кӕнынц аварийы аххосӕгтӕ.

10
Арт-тыгъдад Портал

Хуссар Иры ӕмбырд кӕнынц фӕрӕзтӕ арт-тыгъдад "Портал" сцалцӕг кӕнынӕн

16
(ранӕуӕггонд 15:02 30.07.2021)
Ӕртӕ азы размӕ ӕрдӕгпырх бӕстыхай Ирӕтты уынгыл рахицӕн кодтой инициативон фӕсивӕдӕн, цӕмӕй дзы сорганизаци кӕной арт-тыгъдад

ЦХИНВАЛ, 30 июл — Sputnik, Хъуылымбегты Зӕлинӕ. Инициативон фӕсивӕды къорд ӕмбырд кӕны ӕхцайы фӕрӕзтӕ, цӕмӕй кӕронмӕ саразой верандӕ арт-тыгъдад "Портал"-ы, фехъусын кодта Sputnik "Хуссар Портал"-ы организатортӕй иу Джиоты Къоста.

Ӕртӕуӕладзыгон бӕстыхай Ирӕтты уынгыл паддзахад рахицӕн кодта инициативон фӕсивӕдӕн, цӕмӕй дзы сорганизаци кӕной арт-тыгъдад. Джиоты Къостайы ныхӕстӕм гӕсгӕ, инициативон къорд куыстытӕм бавнӕлдта ӕртӕ азы размӕ – уыцы рӕстӕгмӕ уыдон сцалцӕг кодтой уӕлхӕдзар, раивтой рудзгуытӕ, сӕвӕрдтой дуӕрттӕ, сарӕзтой балкон ӕмӕ дыккаг уӕладзыг. Бӕстыхаймӕ бауагътой электроэнерги дӕр.

"Цалцӕггӕнӕн куыстытӕм ӕнӕкӕсгӕйӕ, фарон фӕззӕджы "Портал" бакодта йӕ дуӕрттӕ хорз музыкӕ уарзджытӕн. Мадзӕлтты рӕстӕджы, кӕцытӕ уагъд цыдысты ацы сӕрд, ӕрӕмбырд кодтой фӕрӕзтӕ мӕнгагъуысты каркасӕн. Сӕрды кӕронмӕ нӕ хӕс у саразын мӕнгагъуыст террасӕйыл, ӕндӕра ноджы иу зымӕг нӕ фасад не сфӕраздзӕн. Ацы куыстытӕ балхынцъ кӕнынӕн мах хъӕуы 30 мин сомы", - банысан кодта Джиоты Къоста.

Йӕ ныхӕстӕм гӕсгӕ, абоны боны онг ӕрӕмбырд кодтой 20 мин сомы.

Арт-тыгъдад "Портал"-ы хъуыды фӕзынд Дзӕуджыхъӕуы активон фӕсивӕды хсӕн. Ахӕм проект Хуссар Ирыстоны сорганизаци кӕныны хъӕппӕрис бахастой хуссарирыстойнаг активисттӕ: Гуыцмӕзты Инна, Джиоты Къоста, Дзигойты Карина ӕмӕ ӕндӕртӕ.

16